சென்செக்ஸ் 1,000 புள்ளிகள் சரிவு! முதலீட்டாளர்களுக்கு ₹4 லட்சம் கோடி இழப்பு ஏற்படுத்திய 3 முக்கிய காரணங்கள்

எழுதியவர் Sekar Chinnappan

Oct 19, 2026

04:45 pm

செய்தி முன்னோட்டம்

திங்கட்கிழமை (அக்டோபர் 19) நடைபெற்ற வர்த்தகத்தில் இந்திய பங்குச் சந்தை மிகப்பெரிய சரிவை சந்தித்தது. மும்பை பங்குச் சந்தையின் சென்செக்ஸ் 1,000 புள்ளிகளுக்கு மேல் (1.4%) சரிந்து 73,709 புள்ளிகள் வரையிலும், தேசிய பங்குச் சந்தையின் நிஃப்டி 300 புள்ளிகளுக்கு மேல் (1.3%) சரிந்து 22,845 புள்ளிகள் வரையிலும் குறைந்தன. இதனால் பிஎஸ்இ பட்டியலில் உள்ள நிறுவனங்களின் ஒட்டுமொத்த சந்தை மூலதனம் சரிந்து, முதலீட்டாளர்கள் ஒரே நாளில் ₹4 லட்சம் கோடியை இழந்தனர்.

கச்சா எண்ணெய்

உயர்ந்து வரும் கச்சா எண்ணெய் விலை அச்சம்

உலகளாவிய பொருளாதார இறுக்கங்களுக்கு நடுவே சர்வதேச சந்தையில் ப்ரெண்ட் கச்சா எண்ணெய் விலை பேரலுக்கு $108 வரை உயர்ந்து வர்த்தகமானது.

கச்சா எண்ணெய் விலை உயர்வால் பணவீக்கம் அதிகரித்து, வட்டி விகிதங்களைக் குறைக்க முடியாத நிலை உருவாகியுள்ளது.

ஹார்முஸ் பகுதியில் ஏற்பட்டுள்ள பதற்றங்கள் எண்ணெய் விலையை மேலும் உயர்த்தியுள்ளன.

இது இந்திய பொருளாதார வளர்ச்சி மற்றும் நிறுவனங்களின் லாப வரம்பில் கடுமையான தாக்கத்தை ஏற்படுத்தும் என்ற அச்சம் சந்தையில் தீவிரமடைந்துள்ளது.

வங்கி பங்குகள்

தனியார் வங்கி பங்குகளின் கடுமையான வீழ்ச்சி

இரண்டாம் காலாண்டு நிதி முடிவுகள் வெளியான பிறகு, முன்னணி தனியார் வங்கி பங்குகளில் ஏற்பட்ட திடீர் விற்பனை சந்தையை மேலும் வீழ்த்தியது.

ஆக்சிஸ் வங்கி, எச்டிஎஃப்சி வங்கி மற்றும் யெஸ் வங்கி போன்ற பங்குகள் 5% வரை சரிவை சந்தித்தன.

இதனால் நிஃப்டி பிரைவேட் பேங்க் குறியீடு 2% அளவுக்குக் குறைந்தது.

பொதுத்துறை வங்கிகள் ஓரளவிற்கு சமாளித்த போதிலும், பெரிய தனியார் வங்கிகளின் வீழ்ச்சி சந்தை உணர்வைப் பெருமளவில் பாதித்தது.

வெளிநாட்டு முதலீட்டாளர்கள்

வெளிநாட்டு முதலீட்டாளர்களின் தொடர் வெளியேற்றம்

இந்திய பங்குச் சந்தையில் இருந்து வெளிநாட்டு போர்ட்ஃபோலியோ முதலீட்டாளர்கள் தொடர்ந்து தங்களது நிதியைத் திரும்பப் பெற்று வருகின்றனர்.

அக்டோபர் மாதத்தில் மட்டும் இதுவரை ₹52,100 கோடி மதிப்பிலான பங்குகள் விற்கப்பட்டுள்ளன.

2026 ஆம் ஆண்டில் இதுவரை வெளிநாட்டு முதலீட்டாளர் நிறுவனங்கள் ₹3,12,402 கோடி நிதியை வெளியேற்றியுள்ளன.

அமெரிக்கப் பத்திரங்களின் வட்டி உயர்வு மற்றும் சர்வதேச சூழல்கள் காரணமாக வெளிநாட்டு நிதி வெளியேறுவது சந்தை வீழ்ச்சிக்கு முதன்மை காரணியாக உள்ளது.