'போட்டிக்கு நாங்கள் எப்போதும் தயார்':எலான் மஸ்க்கின் Starlink குற்றச்சாட்டுக்கு ரிலையன்ஸ் பதிலடி
செய்தி முன்னோட்டம்
இந்தியாவில் எலான் மஸ்க்கின் ஸ்டார்லிங்க் செயற்கைக்கோள் இணைய சேவையின் நுழைவை ரிலையன்ஸ் நிறுவனம் தடுப்பதாக எழுந்த குற்றச்சாட்டுகளுக்கு, முகேஷ் அம்பானியின் ரிலையன்ஸ் இண்டஸ்ட்ரீஸ் நிறுவனம் பதிலளித்துள்ளது. "தொலைத்தொடர்பு மற்றும் செயற்கைக்கோள் சேவை பிரிவில் ஸ்டார்லிங்க் உள்ளிட்ட எந்த நிறுவனத்தின் போட்டியையும் வரவேற்கிறோம். ஜியோ உட்பட அனைத்து நிறுவனங்களும் இந்தியச் சட்டங்களுக்கும் விதிகளுக்கும் கட்டுப்பட்டுச் செயல்பட வேண்டும்" என ரிலையன்ஸ் தெரிவித்துள்ளது. தற்போது ஸ்டார்லிங்க், ஏர்டெல் ஓன்வெப் மற்றும் ஜியோ சாட்டிலைட் ஆகிய மூன்று நிறுவனங்களின் விண்ணப்பங்களும் இந்திய மத்திய உள்துறை அமைச்சகத்தின் பாதுகாப்பு அனுமதிச் சரிபார்ப்பு நிலையில் இருப்பது குறிப்பிடத்தக்கது.
பின்னணி
எலான் மஸ்க் - ரிலையன்ஸ் இடையிலான சர்ச்சை பின்னணி
கடந்த சில நாட்களாக எலான் மஸ்க் தனது X தளத்தில், இந்தியாவில் உள்ள "சில தொழிலதிபர்கள் (Oligarchs)" தங்களது சந்தை ஆதிக்கத்தை தக்கவைத்துக்கொள்ளச் ஸ்டார்லிங்க் சேவைக்கு அனுமதி கிடைக்காமல் முட்டுக்கட்டை போடுவதாகக் குற்றம்சாட்டினார்.
"உலகின் 165-க்கும் மேற்பட்ட நாடுகளில் அனுமதி பெற்றுள்ள ஸ்டார்லிங்க், இந்தியாவில் கடந்த 5 ஆண்டுகளாக அனைத்து விதிகளையும் பின்பற்றி வருகிறது; ஆனால் இன்னும் ஏன் அனுமதி கிடைக்கவில்லை? இந்தியாவில் அம்பானி தான் உண்மையான பாஸா?" எனச் சாடினார்.
இந்த விவகாரத்தில் தலையிட்ட மக்களவை எதிர்க்கட்சித் தலைவர் ராகுல் காந்தி, "இந்தியாவிற்கு நல்வரவு எலான், மற்றொரு நபரைப் பற்றி நீங்கள் தெரிந்துகொள்ளும் வரை காத்திருங்கள்" எனப் பதிவிட்டு அரசியல் வட்டாரத்தில் விவாதத்தைக் கிளப்பினார்.
விளக்கம்
ரிலையன்ஸ் நிறுவனம் அளித்த விளக்கம்
எலான் மஸ்க்கின் பெயரை நேரடியாகக் குறிப்பிடாமல் ரிலையன்ஸ் வெளியிட்ட அறிக்கையில்,"கடந்த 2016-ல் ஒரு வாடிக்கையாளர் கூட இல்லாமல் சந்தையில் களம் இறங்கிய ஜியோ, இன்று 53 கோடிக்கும் அதிகமான வாடிக்கையாளர்களின் நம்பிக்கையைப் பெற்றுள்ளது. போட்டிக்கு நாங்கள் எப்போதும் பயந்ததில்லை; அதுவே வாடிக்கையாளர்களுக்கு சிறந்த சேவையை வழங்க உதவும்."
"இந்திய மற்றும் வெளிநாட்டு நிறுவனங்கள் என அனைத்து விண்ணப்பதாரர்களுக்கும் இந்திய அரசு ஒரே மாதிரியான பாதுகாப்புச் சரிபார்ப்பு விதிகளையே பின்பற்றுகிறது. ஜியோவின் சாட்டிலைட் இணையச் சேவையும் இன்னும் அதிகாரப்பூர்வ அரசின் ஒப்புதலுக்காகக் காத்திருக்கிறது."
ஏற்கனவே ஏர்டெல் தலைவர் சுனில் பாரதி மிட்டல், தாமும் ஐந்து ஆண்டுகளுக்கு முன்பே சாட்டிலைட் சேவைக்கு விண்ணப்பித்து காத்திருப்பதாகத் தெரிவித்திருந்தார்.