ரயில்வே ஒப்பந்தத் தொழிலாளர்களுக்கு குறைந்தபட்ச ஊதியம் உயர்வு: அக்டோபர் 1 முன்தேதியிட்டு அமல்
செய்தி முன்னோட்டம்
இந்திய ரயில்வேயில் ஒப்பந்த அடிப்படையில் பணியாற்றும் பல்வேறு துறைத் தொழிலாளர்களுக்கான மாறுபடும் அகவிலைப்படி கட்டணங்களை உயர்த்த ரயில்வே அமைச்சகம் உத்தரவிட்டுள்ளது. இந்த புதிய ஊதிய மாற்றங்கள் அக்டோபர் 1, 2026 முதல் முன்தேதியிட்டு அமலுக்கு வருகின்றன. தொழிலாளர் பணியகத்தின் தொழில் நுகர்வோர் விலை குறியீட்டின் உயர்வைக் கருத்தில் கொண்டு இந்த ஊதிய சீரமைப்பு செய்யப்பட்டுள்ளது. இக்கூடுதல் ஊதிய உயர்வு ரயில்வேயின் ஒப்பந்தத் தொழிலாளர்கள் மத்தியில் மகிழ்ச்சியை ஏற்படுத்தியுள்ளது.
ஊதிய பங்கீடு
பல்வேறு பணிப் பிரிவுகள் மற்றும் ஏரியா வாரியான ஊதிய பங்கீடு
ரயில்வேயில் கட்டுமானம், பராமரிப்பு, தூய்மைப் பணி, பாதுகாப்பு மற்றும் சரக்குக் கையாளும் பணிகளில் ஈடுபட்டுள்ள தொழிலாளர்களுக்கு இந்த சம்பள உயர்வு பொருந்தும்.
ஏரியா A, B மற்றும் C என புவியியல் ரீதியாகப் பிரிக்கப்பட்டு ஊதியம் நிர்ணயிக்கப்பட்டுள்ளது.
சென்னை, அகமதாபாத், டெல்லி போன்ற முக்கிய நகரங்கள் ஏரியா A பிரிவின் கீழ் வருகின்றன.
தொழிலாளர்களின் பணித் திறன் மற்றும் அவர்கள் பணிபுரியும் நகரங்களின் அடிப்படையில் அவர்களுக்குரிய தினசரி குறைந்தபட்ச ஊதியம் கணக்கிடப்பட்டு வழங்கப்படவுள்ளது.
புதிய ஊதிய விவரங்கள்
சரக்குக் கையாளும் தொழிலாளர்களுக்கான தினசரி புதிய ஊதிய விவரங்கள்
சரக்குக் கையாளுதல் மற்றும் சுமை தூக்கும் தொழிலாளர்களுக்கு ஏரியா ஏ-வில் அடிப்படை ஊதியம் ₹523 மற்றும் அகவிலைப்படி கட்டணம் ₹317 சேர்த்து நாளொன்றுக்கு ₹840 குறைந்தபட்ச ஊதியமாக வழங்கப்படும்.
ஏரியா பி-யில் அடிப்படை ஊதியம் ₹437 மற்றும் அகவிலைப்படி கட்டணம் ₹267 சேர்த்து ₹704 வழங்கப்படும்.
அதேபோல் ஏரியா சி-யில் அடிப்படை ஊதியம் ₹350 மற்றும் அகவிலைப்படி கட்டணம் ₹215 சேர்த்து தினசரி ₹565 வழங்கப்படும்.
கட்டுமானத் துறையில் உள்ள மிக அதிகத் திறன் கொண்ட தொழிலாளர்களுக்கு ஏரியா ஏ-வில் அகவிலைப்படி கட்டணமாக ₹418 வழங்கப்படும்.
ரயில்வே வாரியம்
ஒப்பந்தக்காரர்கள் நிலுவையின்றி வழங்க ரயில்வே வாரியம் கண்டிப்பான உத்தரவு
இந்த உயர்த்தப்பட்ட புதிய அகவிலைப்படி மற்றும் குறைந்தபட்ச ஊதியத்தை ஒப்பந்தத் தொழிலாளர்களுக்கு ஒப்பந்தக்காரர்கள் தடையின்றி வழங்குவதை முதன்மை முதலாளி என்ற முறையில் ரயில்வே நிர்வாகம் உறுதி செய்ய வேண்டும்.
அக்டோபர் 28 நாளிட்ட கடிதம் மூலம் ரயில்வே வாரியம் அனைத்து மண்டல அதிகாரிகளுக்கும் இக்கட்டளையைப் பிறப்பித்துள்ளது.
இதன்படி, அக்டோபர் 1 முதல் கணக்கிடப்பட்டு நிலுவைத் தொகையுடன் தொழிலாளர்களுக்கு சரியான ஊதியம் வழங்கப்படுகிறதா என்பதை அதிகாரிகள் தீவிரமாகக் கண்காணிப்பார்கள்.