இரு நாடுகளுக்கும் இடையே புதிய ஒப்பந்தம்! வர்த்தக சலுகை தரவுகளை பகிர்ந்து கொள்ள இந்தியா - பிரிட்டன் முடிவு
செய்தி முன்னோட்டம்
இந்தியாவும் பிரிட்டனும் தங்களின் விரிவான பொருளாதார மற்றும் வர்த்தக ஒப்பந்தத்தின் (CETA) கீழ் வழங்கப்படும் வரி சலுகைகளின் பயன்பாட்டைக் கண்காணிக்க முடிவு செய்துள்ளன. இதற்காக ஆண்டுதோறும் இரு நாடுகளும் பரஸ்பரத் தரவுகளைப் பகிர்ந்து கொள்ள ஒப்புக்கொண்டுள்ளன. இந்த ஒப்பந்தம் மூலம் இரு நாட்டு ஏற்றுமதியாளர்களும், குறிப்பாகச் சிறு மற்றும் நடுத்தரத் தொழில் நிறுவனங்களும் (SMEs) உண்மையான பலன்களை அடைவதை உறுதி செய்ய முடியும். புதுடெல்லியில் நடைபெற்ற முக்கியக் கூட்டத்தில் இதற்கான அறிவிப்பு வெளியானது.
முக்கிய நோக்கம்
தரவுப் பகிர்வின் முக்கிய நோக்கம் மற்றும் செயல்பாடுகள்
CETA ஒப்பந்தம் அமலுக்கு வந்து சரியாக ஒரு ஆண்டிற்குப் பிறகு இந்த தரவுப் பகிர்வு முறை தொடங்கும்.
தொழில்துறையினர் எந்தளவுக்கு வரி சலுகைகளைக் கோருகிறார்கள் என்ற விபரங்கள் இதில் சேகரிக்கப்படும்.
மேலும், ஒப்பந்தத்தில் சிறப்பாகச் செயல்படும் அம்சங்கள் மற்றும் கூடுதல் உதவி தேவைப்படும் துறைகள் குறித்து வணிகர்களிடமிருந்து கருத்துகளும் பெறப்படும்.
இதன் மூலம் இரு நாடுகளும் தங்களின் வர்த்தக முன்னுரிமைகளை தெளிவாக அறிந்துகொண்டு சிறு தொழில்களுக்குத் தேவையான உதவிகளை உடனடியாக செய்ய முடியும்.
ஜெட்கோ கூட்டம்
16-வது ஜெட்கோ கூட்டத்தில் அமைச்சரின் அழைப்பு
புதுடெல்லியில் அக்டோபர் 12 அன்று நடைபெற்ற 16-வது கூட்டுப் பொருளாதார மற்றும் வர்த்தகக் குழு (JETCO) கூட்டத்தில் இத்தீர்மானம் எடுக்கப்பட்டது.
நிகழ்வில் பேசிய மத்திய வர்த்தக மற்றும் தொழில்துறை அமைச்சர் பியூஷ் கோயல், இந்த ஒப்பந்தத்தின் மூலம் உருவாக்கப்பட்டுள்ள வாய்ப்புகளைப் பயன்படுத்தி இரு நாட்டு வர்த்தகம், முதலீடு மற்றும் வேலைவாய்ப்புகளை அதிகரிக்க தொழில்துறையினருக்கு அழைப்பு விடுத்தார்.
மேலும், 2030-க்குள் இருதரப்பு வர்த்தகத்தை இரட்டிப்பாக்கும் இலக்கை அடைய அனைவரும் ஒருங்கிணைந்து தீவிரமாக உழைக்க வேண்டும் என்றும் கேட்டுக்கொண்டார்.
ஏற்றுமதி வாய்ப்புகள்
இந்திய ஏற்றுமதி வாய்ப்புகள் மற்றும் எதிர்கால இலக்குகள்
இந்தியாவில் ஸ்மார்ட்போன்கள், மருந்துகள், ஆபரணங்கள், ஜவுளி, தோல்பொருட்கள், அரிசி மற்றும் விவசாயப் பொருட்கள் அதிக அளவில் ஏற்றுமதி செய்யப்படுகின்றன.
மேலும், இயந்திரப் பாகங்கள் மற்றும் வாகன உதிரிபாகங்களின் உற்பத்தியிலும் இந்தியா முன்னணி வகிக்கிறது.
இத்தகைய ஏற்றுமதித் திறன்களைப் பயன்படுத்தி பிரிட்டன் சந்தையில் இந்திய நிறுவனங்கள் பெரிய அளவில் காலூன்ற முடியும்.
இரு நாடுகளுக்கும் இடையே சுமார் 1,500 நாட்கள் எஞ்சியுள்ள சூழலில், 2030-ஆம் ஆண்டிற்குள் இருதரப்பு வர்த்தக இலக்குகளை எட்டுவது மிக முக்கியமான திட்டமாக பார்க்கப்படுகிறது.