இந்தியா-நியூசிலாந்து இடையே வரலாற்று ஒப்பந்தம்; வரும் திங்கள் கையெழுத்தாகிறது
செய்தி முன்னோட்டம்
இந்தியா மற்றும் நியூசிலாந்து நாடுகளுக்கு இடையிலான வரலாற்று சிறப்புமிக்க சுதந்திர வர்த்தக ஒப்பந்தம் (FTA) வரும் திங்கள்கிழமை புது தில்லியில் கையெழுத்தாகவுள்ளது. நியூசிலாந்து பிரதமர் கிறிஸ்டோபர் லக்சன் இதற்கான அதிகாரப்பூர்வ அறிவிப்பை வெளியிட்டுள்ளார். இரு நாடுகளுக்கும் இடையே வர்த்தக உறவை அடுத்த கட்டத்திற்கு எடுத்துச் செல்லும் இந்த ஒப்பந்தம், அடுத்த ஐந்து ஆண்டுகளில் இருதரப்பு வர்த்தகத்தை 5 பில்லியன் டாலராக சுமார் ₹41,000 கோடி) உயர்த்த இலக்கு நிர்ணயித்துள்ளது.
அம்சங்கள்
ஒப்பந்தத்தின் முக்கிய அம்சங்கள்: இந்தியாவுக்குக் கிடைக்கும் நன்மைகள்
இந்த ஒப்பந்தம் இந்தியத் தொழில்துறைக்கு, குறிப்பாக ஏற்றுமதி மற்றும் வேலைவாய்ப்புத் துறையில் பெரும் மாற்றங்களை ஏற்படுத்தும் என எதிர்பார்க்கப்படுகிறது. நியூசிலாந்து சந்தையில் நுழையும் அனைத்து இந்தியப் பொருட்களுக்கும் (100% Tariff Lines) இறக்குமதி வரி முழுமையாக நீக்கப்படும். ஜவுளி, ஆடை, தோல் பொருட்கள், காலணிகள், நகைகள் மற்றும் பொறியியல் பொருட்கள் போன்ற உழைப்பு அதிகம் தேவைப்படும் துறைகளுக்கு வரி விலக்கு கிடைப்பதால் புதிய வேலைவாய்ப்புகள் உருவாகும். அடுத்த 15 ஆண்டுகளில் நியூசிலாந்திலிருந்து இந்தியாவுக்கு சுமார் 20 பில்லியன் டாலர் முதலீடுகளை ஈர்க்க இந்த ஒப்பந்தம் வழிவகை செய்யும்.
இந்தியச் சந்தை
நியூசிலாந்து பொருட்களுக்கான இந்தியச் சந்தை
இந்தியா தனது சந்தையில் சுமார் 70.03% வர்த்தகப் பொருட்களுக்கு வரிச் சலுகைகளை வழங்கியுள்ளது. அதேசமயம், உள்நாட்டு விவசாயிகளை பாதுகாக்க சில முக்கிய முடிவுகளையும் எடுத்துள்ளது. மரம், கம்பளி (Wool), செம்மறி ஆட்டு இறைச்சி மற்றும் பதப்படுத்தப்படாத தோல் போன்ற பொருட்களுக்கு வரி உடனடியாக நீக்கப்படும். பெட்ரோலிய எண்ணெய், இயந்திரங்கள் மற்றும் சில மின்சாதனப் பொருட்களுக்கு அடுத்த 3 முதல் 10 ஆண்டுகளில் படிப்படியாக வரி குறைக்கப்படும். இந்திய விவசாயிகளின் நலன் கருதி பால் பொருட்கள் (பால், தயிர், சீஸ்), சர்க்கரை, வெங்காயம், கடலை, பருப்பு வகைகள் மற்றும் சில முக்கிய உலோகங்களுக்கு வரி விலக்கு அளிக்கப்படவில்லை.
மாணவர்
மாணவர்களுக்கான நன்மைகள்
கல்வி துறையிலும் இந்த ஒப்பந்தம் ஒரு முக்கியப் பங்காற்றுகிறது. நியூசிலாந்தில் படிக்கும் இந்திய மாணவர்களுக்குப் படிப்பிற்குப் பிந்தைய பணி உரிமைகள் (Post-study work rights) வழங்கப்படவுள்ளன. குறிப்பாக STEM (அறிவியல், தொழில்நுட்பம், பொறியியல், கணிதம்) பட்டதாரிகளுக்கு 3 ஆண்டுகள் வரையிலும், முனைவர் பட்ட ஆய்வாளர்களுக்கு 4 ஆண்டுகள் வரையிலும் பணி உரிமைகள் வழங்கப்படும். மார்ச் 2025-ல் தொடங்கப்பட்ட இந்தப் பேச்சுவார்த்தை, வெறும் ஒன்பது மாதங்களில் (டிசம்பர் 2025) முடிவுக்கு வந்தது. இது இந்தியாவின் மிக வேகமான சுதந்திர வர்த்தக ஒப்பந்தங்களில் ஒன்றாகக் கருதப்படுகிறது. இந்த ஒப்பந்தம் மூலம் ஓசியானியா (Oceania) பிராந்தியத்தில் இந்தியாவின் வர்த்தக ஆதிக்கம் வலுப்படும் எனப் பொருளாதார நிபுணர்கள் கருதுகின்றனர்.