2026இல் இந்தியாவின் பொருளாதார வளர்ச்சி 7.3 சதவீதமாக உயரும்: கணிப்பை உயர்த்தியது IMF

எழுதியவர் Sekar Chinnappan

Jan 19, 2026

07:27 pm

செய்தி முன்னோட்டம்

சர்வதேச நாணய நிதியம் (IMF), 2026 ஆம் நிதியாண்டிற்கான இந்தியாவின் பொருளாதார வளர்ச்சி கணிப்பை 7.3 சதவீதமாக உயர்த்தியுள்ளது. இதற்கு முன்பு கணிக்கப்பட்டதை விட இது 0.7 சதவீதம் அதிகமாகும். உலகளவில் அமெரிக்காவின் வர்த்தக வரி தொடர்பான நிச்சயமற்ற நிலைகள் மற்றும் உலகளாவிய பதற்றங்கள் நிலவி வரும் சூழலிலும், இந்தியாவின் பொருளாதாரம் வலுவாக இருக்கும் என்று IMF தெரிவித்துள்ளது. இந்தியாவின் இந்த அபரிமிதமான வளர்ச்சிக்கு முக்கியக் காரணங்களாகச் சில காரணிகளை IMF சுட்டிக்காட்டியுள்ளது. இந்தியாவில் நிலவும் வலுவான உள்நாட்டுத் தேவை பொருளாதாரத்தை நிலைநிறுத்துகிறது. உள்கட்டமைப்பு மற்றும் பொதுத்துறை சார்ந்த திட்டங்களில் அரசு தொடர்ந்து செய்து வரும் முதலீடுகள் முக்கிய பங்கு வகிக்கிறது.

ஒப்பீடு

உலக நாடுகளுடன் ஒரு ஒப்பீடு

தனியார் நிறுவனங்களின் மூலதனச் செலவுகள் படிப்படியாக மீண்டு வருவது ஒரு சாதகமான அம்சமாகக் கருதப்படுகிறது. மற்ற வளர்ந்த மற்றும் வளரும் நாடுகளுடன் ஒப்பிடுகையில் இந்தியா மிகச் சிறந்த நிலையில் உள்ளது. IMF இன் அறிக்கையின்படி அமெரிக்கா 2026 இல் 2.4 சதவீத வளர்ச்சியையே எட்டும் எனக் கணிக்கப்பட்டுள்ளது. சீனா 4.5 சதவீத வளர்ச்சி பெறும் என்று எதிர்பார்க்கப்படுகிறது மற்றும் ஐரோப்பிய நாடுகள் வெறும் 1.3 சதவீத வளர்ச்சியை மட்டுமே எட்டும் என கணிக்கப்பட்டுள்ளது. உலகப் பொருளாதாரம் ஒட்டுமொத்தமாக 2025 மற்றும் 2026 ஆம் ஆண்டுகளில் 3.3 சதவீத வளர்ச்சியை மட்டுமே எட்டும் என்று கணிக்கப்பட்டுள்ள நிலையில், இந்தியாவின் 7.3 சதவீத வளர்ச்சி உலகையே உற்றுநோக்க வைத்துள்ளது.

கணிப்பு

வரும் ஆண்டுகளுக்கான கணிப்பு

நிதியாண்டு 2026 க்கு 7.3 சதவீதம் என்று குறிப்பிட்டாலும், காலண்டர் ஆண்டுகளுக்கான கணிப்பில் சிறு மாற்றங்கள் உள்ளன. 2026 மற்றும் 2027 காலண்டர் ஆண்டுகளில் இந்தியாவின் வளர்ச்சி முறையே 6.3 சதவீதம் மற்றும் 6.5 சதவீதமாக இருக்கும் என்று கணிக்கப்பட்டுள்ளது. தற்காலிகமாக நிலவும் சில பொருளாதாரச் சுழற்சிகள் குறையும் போது, வளர்ச்சி விகிதம் சற்று சீராகும் என்று IMF தனது அறிக்கையில் விளக்கியுள்ளது.