ரூ.5,000 பழுதுக்குக் காப்பீடு கோரினால் ரூ.10,500 தள்ளுபடி போச்சு! No Claim Bonus சலுகையை பயன்படுத்துவது எப்படி?

எழுதியவர் Sekar Chinnappan

Sep 11, 2026

06:53 pm

செய்தி முன்னோட்டம்

வாகனக் காப்பீடு என்பது எதிர்பாராத நிதி இழப்புகளிலிருந்து பாதுகாப்பு அளித்தாலும், சிறிய கீறல்கள் அல்லது சிறு பழுதுகளுக்குக் காப்பீட்டுக் கோரிக்கை செய்வதைத் தவிர்ப்பதே புத்திசாலித்தனமாகும். ஏனெனில், காப்பீட்டுக் காலத்தில் எந்தவொரு கிளைமும் செய்யாமல் இருக்கும்போது, அடுத்த ஆண்டு புதுப்பித்தலின் போது நோ கிளைம் போனஸ் (No Claim Bonus) என்ற தள்ளுபடி சலுகை கிடைக்கிறது. இந்தத் தள்ளுபடியின் மதிப்பு, நீங்கள் செய்யும் சிறிய பழுதுபார்ப்பு செலவை விட அதிகமாக இருக்கும் என்பதால், சொந்தமாக செலவழிப்பது அதிக நிதி நன்மையை அளிக்கும்.

கணக்கீடு

நோ கிளைம் போனஸ் எவ்வாறு கணக்கிடப்படுகிறது?

காப்பீட்டு ஆண்டின் போது எந்தக் கோரிக்கையும் செய்யாவிட்டால், அடுத்தடுத்த ஆண்டுகளில் சொந்தச் சேத பிரீமியத்தில் (Own-Damage Premium) தள்ளுபடி வழங்கப்படுகிறது.

முதல் ஆண்டில் 20 சதவீதத்தில் தொடங்கும் இந்தத் தள்ளுபடி, தொடர்ச்சியாகக் கிளைம் இல்லாத 5 ஆம் ஆண்டில் 50 சதவீதம் வரை அதிகரிக்கிறது.

உதாரணமாக, ரூ. 30,000 அடிப்படை பிரீமியம் கொண்ட ஒரு வாகனத்திற்கு, 3 வது ஆண்டில் 35% தள்ளுபடி மூலம் ரூ. 10,500 பிரீமியம் குறைகிறது.

இந்தத் தள்ளுபடி வாகன உரிமையாளருக்கு சொந்தமானது என்பதால், புதிய வாகனம் வாங்கும் போதும் இதனை மாற்றிக்கொள்ள முடியும்.

கிளைம்

சொந்தமாக செலவழிப்பதா அல்லது கிளைம் செய்வதா?

உங்கள் வாகனத்திற்கு சிறிய சேதம் ஏற்பட்டு பழுதுபார்ப்புக் கட்டணம் ரூ. 5,000 வருகிறது எனக் வைத்துக்கொள்வோம்.

நீங்கள் காப்பீட்டுக் கோரிக்கை செய்தால், அடுத்த புதுப்பித்தலில் உங்களுக்குக் கிடைக்கவிருக்கும் ரூ. 10,500 மதிப்புள்ள நோ கிளைம் போனஸ் தள்ளுபடியை இழக்க நேரிடும்.

இதில் ரூ. 5,000 பழுது செலவை சொந்தமாக செலுத்துவதே ரூ. 10,500 தள்ளுபடியைக் காப்பாற்றும் சிறந்த நிதி முடிவாகும்.

மாறாக, பழுது செலவு பல்லாயிரம் ரூபாயைத் தாண்டும் போது மட்டுமே காப்பீட்டுத் திட்டத்தின் கீழ் கிளைம் செய்வது புத்திசாலித்தனமாகும்.

சலுகை

என்சிபி புரோடெக்ட் (NCB Protect) கூடுதல் சலுகை

தொடர்ச்சியாகப் பல ஆண்டுகள் காப்பீட்டுக் கோரிக்கை செய்யாமல் அதிகளவில் என்சிபி தள்ளுபடியை சேர்த்து வைத்துள்ள வாகன உரிமையாளர்களுக்கு 'என்சிபி புரோடெக்ட்' (NCB Protect Add-On) என்ற கூடுதல் பாதுகாப்பு வசதி பெரிதும் உதவுகிறது.

இந்த வசதியைப் பாலிசியில் இணைத்துக்கொண்டால், ஒருமுறை காப்பீட்டுக் கோரிக்கை செய்தாலும் உங்களின் நோ கிளைம் போனஸ் தள்ளுபடி முழுமையாகப் பறிபோகாது.

எனவே, கிளைம் செய்வதற்கு முன் எதிர்காலத் தள்ளுபடி இழப்பையும் பழுது செலவையும் ஒப்பிட்டுப் பார்த்து முடிவெடுப்பது மிகவும் அவசியமாகும்.