வரி செலுத்துவோருக்கு முக்கிய அறிவிப்பு; வரி தணிக்கை அறிக்கை காலக்கெடு அக்டோபர் 31 வரை நீட்டிப்பு
செய்தி முன்னோட்டம்
மத்திய நேரடி வரிகள் வாரியம் (CBDT), 2025-26 ஆம் மதிப்பீட்டு ஆண்டிற்கான வரி தணிக்கை அறிக்கைகளை (TARs) தாக்கல் செய்வதற்கான காலக்கெடுவை நீட்டித்துள்ளது. முன்பு செப்டம்பர் 30 ஆக இருந்த இந்தக் காலக்கெடு, தற்போது அக்டோபர் 31, 2025 வரை ஒரு மாதம் நீட்டிக்கப்பட்டுள்ளது. வரி வல்லுநர்கள் விடுத்த கோரிக்கைகள் மற்றும் ராஜஸ்தான், கர்நாடகா உயர் நீதிமன்றங்களின் உத்தரவுகளுக்கு இணங்க இந்த முடிவு எடுக்கப்பட்டுள்ளது. நாடு முழுவதும் உள்ள பட்டயக் கணக்காளர் அமைப்புகள் உட்பட பல்வேறு தொழில்முறை சங்கங்களிடமிருந்து CBDT க்கு கோரிக்கைகள் வந்தன.
வெள்ளம்
வெள்ளம் மற்றும் இயற்கை சீற்றங்கள்
இவற்றில், குறிப்பாகச் சில பகுதிகளில் ஏற்பட்ட வெள்ளம் மற்றும் இயற்கை சீற்றங்களால் இயல்பு நிலை பாதிக்கப்பட்டதால், தணிக்கை அறிக்கைகளை உரிய நேரத்தில் முடிப்பதில் வரி செலுத்துவோர் மற்றும் வல்லுநர்களுக்கு ஏற்பட்ட சிரமங்கள் சுட்டிக்காட்டப்பட்டன. வெளியான அதிகாரப்பூர்வ அறிவிப்பில், நீதிமன்றங்களின் முன் வைக்கப்பட்ட சமர்ப்பிப்புகள் மற்றும் வரிச் சமூகத்தினரின் கோரிக்கைகளை கருத்தில் கொண்டே இந்த நீட்டிப்பு வழங்கப்பட்டுள்ளது என்று CBDT உறுதிப்படுத்தியுள்ளது. இருப்பினும், இந்த நீட்டிப்பு தொழில்நுட்பக் கோளாறுகள் காரணமாக இல்லை என்பதையும் வாரியம் தெளிவுபடுத்தியுள்ளது. வருமான வரி மின்-தாக்கல் இணையதளம் நிலையானதாகவும், முழு செயல்பாட்டில் இருப்பதாகவும் CBDT தெரிவித்துள்ளது.