தங்கள் எலெக்ட்ரிக் ஸ்கூட்டர்களின் வெளியீட்டுத் தேதியை அறிவித்து சிம்பிள் எனர்ஜி!
பெங்களூருவை தலைமையகமாகக் கொண்ட சிம்பிள் எனர்ஜி எலெக்ட்ரிக் ஸ்கூட்டர் நிறுவனம் கடந்த ஆண்டு மார்ச் மாதம் தங்கள் எலெக்ட்ரிக் ஸ்கூட்டர் சிம்பிள் ஒன்-ன் விலையை அறிவித்தது. அந்த அறிவிப்பு வெளியானதில் இருந்து கிட்டத்தட்ட ஓராண்டுக்கும் மேல் ஆகிவிட்ட நிலையில், தற்போது அந்த எலெக்ட்ரிக் ஸ்கூட்டர்களின் வெளியீட்டுத் தேதியை அறிவித்திருக்கிறது. கடந்த ஆண்டு விலையை அறிவித்திருந்தாலும், அதற்கு முன்னர் ஏப்ரல் 2021-ல் தங்கள் ஸ்கூட்டர்களை அறிமுகப்படுத்தியிருந்தது சிம்பிள் எனர்ஜி. அறிமுகப்படுத்தப்பட்ட பிறகு கிட்டதட்ட 30,000 புக்கிங்குகளைப் பெற்றிருக்கின்றன அந்த எலெக்ட்ரிக் ஸ்கூட்டர்கள். இந்தியாவில் விற்பனை செய்யப்பட்டு வரும் ஏத்தர் 450X மற்றும் ஓலா S1 ப்ரோ ஆகிய மாடல்களுக்குப் போட்டியாக வெளியாகவிருக்கின்றன.
என்னென்ன வசதிகள்?
12-இன்ச் அலாய் வீல்கள், 7-இன்ச் இன்ஸ்ட்ரூமன்ட் கிளஸ்டர், எல்இடி முகப்புவிளக்குகள், சிங்கள் பீஸ் சீட், ஃபிளாட்டான புட்போர்டு ஆகியவற்றைக் கொண்டிருக்கிறது சிம்பிள் ஒன். இந்த எலெக்ட்ரிக் ஸ்கூட்டர்களில் மொத்தமாக 6.4kWh திறன் கொண்ட இரண்டு பேட்டரிக்களுடன், 4.5kW PMS எலெக்ட்ரிக் மோட்டார் பயன்படுத்தப்பட்டிருக்கிறது. இந்த ஸ்கூட்டர்களின் இரண்டு வீல்களிலும் CBS-உடன் கூடிய டிஸ்க் பிரேக்குகள், சிறந்த பிரேக்கிங்கிற்காக ரீஜெனரேட்டிவ் பிரேக்கிங் கொடுக்கப்பட்டிருக்கிறது. அடுத்த மாதம் மே 23-ம் தேதி தங்கள் ஸ்கூட்டர்களை வெளியிடவிருப்பதாக அறிவித்திருக்கிறது அந்நிறுவனம். மேற்கூறியவற்றைய அம்சங்களையே முன்னர் அறிவித்திருந்தது சிம்பிள் எனர்ஜி நிறுவனம். அடுத்த மாதம் வெளியாகும் போது இதே அம்சங்களுடனேயே வெளியாகும் என்றே எதிர்பார்க்கப்படுகிறது.
