ஹோண்டா நிறுவனத்திற்கு 70 ஆண்டுகளில் இல்லாத பேரிடி! முதல்முறையாக நஷ்டத்தைச் சந்திக்க காரணம் என்ன?
செய்தி முன்னோட்டம்
உலக ஆட்டோமொபைல் சந்தையில் அசைக்க முடியாத ஒரு சக்தியாகத் திகழும் ஹோண்டா நிறுவனம், கடந்த 1955 ஆம் ஆண்டிற்குப் பிறகு முதல்முறையாக தனது நிதி ஆண்டில் நஷ்டத்தைப் பதிவு செய்துள்ளது. எலக்ட்ரிக் வாகன சந்தையில் நிலவும் மந்தநிலை மற்றும் அமெரிக்க அரசின் புதிய கொள்கை மாற்றங்கள் காரணமாக, ஹோண்டா சுமார் $2.6 பில்லியன் (சுமார் 403.3 பில்லியன் யென்) நிகர நஷ்டத்தைச் சந்தித்துள்ளது. தசாப்தங்களாக லாபத்தில் இயங்கி வந்த ஒரு நிறுவனம், எலக்ட்ரிக் கார் திட்டங்களில் செய்த பல பில்லியன் டாலர் முதலீடுகளைத் திரும்பப் பெற்றதால் இந்த நிலை ஏற்பட்டுள்ளது.
கார் நிறுவனங்களுக்குக் காத்திருந்த அதிர்ச்சி
அமெரிக்காவின் விதி மாற்றங்களும் $7,500 வரிச்சலுகை ரத்தும்
அமெரிக்காவில் டிரம்ப் நிர்வாகம் பதவியேற்ற பிறகு, முந்தைய பிடன் நிர்வாகம் கொண்டு வந்திருந்த கடுமையான எமிஷன் (Emissions) விதிகளைத் தளர்த்தியது. மேலும், எலக்ட்ரிக் கார் வாங்குபவர்களுக்கு வழங்கப்பட்டு வந்த $7,500 வரிச்சலுகையும் கடந்த செப்டம்பர் மாதத்துடன் ரத்து செய்யப்பட்டது. இதனால் அமெரிக்காவில் எலக்ட்ரிக் கார் விற்பனை அதிரடியாகச் சரிந்தது. இதன் விளைவாக, எதிர்காலத்தில் பெட்ரோல் கார்களே இருக்காது என்று நம்பி பில்லியன் கணக்கில் முதலீடு செய்த ஹோண்டா போன்ற நிறுவனங்கள், இப்போது அந்த முதலீடுகளைக் கைவிட வேண்டிய நிலைக்குத் தள்ளப்பட்டுள்ளன.
$10 பில்லியன் இழப்பு
லாபத்தில் முடிய வேண்டிய ஆண்டு நஷ்டத்தில் முடிந்தது எப்படி?
மார்ச் மாதத்துடன் முடிந்த நிதி ஆண்டில், ஹோண்டா நிறுவனம் தனது எலக்ட்ரிக் வாகன முதலீடுகளில் சுமார் 1.6 டிரில்லியன் யென் (சுமார் $10 பில்லியன்) மதிப்பைக் குறைத்துக் கொண்டது. இந்த மிகப்பெரிய இழப்பு இல்லையென்றால், அந்த நிறுவனம் $7.4 பில்லியன் லாபத்தைச் சம்பாதித்திருக்கும். ஆனால், இந்த முதலீட்டுத் தொகையைக் கணக்கில் காட்டியதால், இறுதியில் $2.6 பில்லியன் நஷ்டத்தில் முடிந்தது. வரும் காலங்களிலும் இத்தகைய முதலீட்டு இழப்புகள் தொடரக்கூடும் என்று ஹோண்டா எச்சரித்துள்ளது.
ஃபோர்டு, ஜிஎம் மற்றும் ஸ்டெல்லாண்டிஸ்
வரிசையாக நஷ்டத்தைச் சந்திக்கும் ஜாம்பவான்கள்
ஹோண்டா மட்டுமல்லாது, அமெரிக்காவின் ஃபோர்டு மற்றும் ஸ்டெல்லாண்டிஸ் போன்ற முன்னணி நிறுவனங்களும் 2025-ஆம் ஆண்டில் மிகப்பெரிய நஷ்டத்தைப் பதிவு செய்துள்ளன. ஃபோர்டு $17.4 பில்லியனும், ஸ்டெல்லாண்டிஸ் சுமார் $29.7 பில்லியனும் இழப்பைச் சந்தித்துள்ளன. எலக்ட்ரிக் கார்களை விட பெட்ரோலில் இயங்கும் பெரிய டிரக்குகள் மற்றும் எஸ்யூவி கார்களிலேயே அதிக லாபம் கிடைப்பதால், நிறுவனங்கள் மீண்டும் பழைய பெட்ரோல் இன்ஜின் தொழில்நுட்பத்திற்கே முக்கியத்துவம் கொடுக்கத் தொடங்கியுள்ளன.
எலக்ட்ரிக் கார்களின் எதிர்காலம்
சீன நிறுவனங்களின் போட்டி மற்றும் ஐரோப்பிய விதிகள்
அமெரிக்காவில் பின்னடைவு ஏற்பட்டிருந்தாலும், ஐரோப்பா மற்றும் ஆசிய நாடுகளில் இன்னும் கடுமையான எமிஷன் விதிகள் அமலில் உள்ளன. மேலும், சீன நிறுவனங்கள் மிகக் குறைந்த விலையில் எலக்ட்ரிக் கார்களை உலகச் சந்தையில் அறிமுகப்படுத்தி வருவது உலக நாடுகளுக்குப் பெரும் சவாலாக உள்ளது. கலிபோர்னியா போன்ற சில அமெரிக்க மாநிலங்கள் 2035க்குள் பெட்ரோல் கார்களைத் தடை செய்யத் திட்டமிட்டுள்ளன. இதனால், நிறுவனங்கள் எலக்ட்ரிக் கார் திட்டங்களை முழுமையாகக் கைவிடாமல், தங்களின் உத்திகளை மட்டும் மாற்றியமைத்து வருகின்றன.