X440 பைக்கின் விலையை உயர்த்தி அறிவித்திருக்கும் ஹார்லி டேவிட்சன்
செய்தி முன்னோட்டம்
கடந்த மாதத் தொடக்கத்தில் இந்தியாவின் தொடக்கநிலை ப்ரீமியம் பைக் பிரிவில், தங்களுடைய முதல் பைக்கான X440-யை அறிமுகப்படுத்தியது அமெரிக்காவைச் சேர்ந்த ப்ரீமியம் பைக் தயாரிப்பு நிறுவனமான ஹார்லி டேவிட்சன்.
இந்தியாவைச் சேர்ந்த ஹீரோ மோட்டோகார்ப் நிறுவனத்துடன் இணைந்து இந்த புதிய பைக்கை வெளியிட்டது ஹார்லி. பைக்கின் வடிவமைப்பு மற்றும் வெளியீட்டை ஹார்லி மேற்கொள்ள, இந்தியாவில் அதன் உற்பத்தி மற்றும் சர்வீஸை பார்த்துக் கொள்ளவிருக்கிறது ஹீரோ.
இந்தியாவில் ரூ.2.29 லட்சம் முதல் ரூ.2.69 லட்சம் வரையிலான எக்ஸ்-ஷோரூம் விலைகளில் மூன்று வேரியன்ட்களாக புதிய X440-யை அறிமுகம் செய்திருந்தது ஹார்லி டேவிட்சன். ஆனால், தற்போது அந்த பைக்கின் விலையை உயர்த்தி அறிவித்திருக்கிறது அந்நிறுவனம்.
ஹார்லி டேவிட்சன்
விலை உயரும் ஹார்லி டேவிட்சன் X440:
அறிமுகப்படுத்தி ஒரு மாதமே ஆகியிருக்கும் நிலையில் தங்களது X440 பைக்கின் அனைத்து வேரியன்ட்களின் விலைகளையும் உயர்த்தியிருக்கிறது ஹார்லி டேவிட்சன்.
X440-யின் மூன்று வேரியன்டகளின் விலையையும், ரூ.10,500 வரை உயர்த்தி அறிவித்திருக்கிறது அந்நிறுவனம். இதனைத் தொடர்ந்து, அடிப்படை வேரியன்டான டெனிமின் விலை ரூ.2.39 லட்சமாகவும், மிடில் வேரியன்டான விவிடின் விலை ரூ.2.59 லட்சமாகவும் உயர்ந்திருக்கிறது.
ஹார்லி டேவிட்சன் X440-யின் டாப் எண்டான S வேரியன்டின் விலை ரூ.2.79 லட்சம் எக்ஸ்-ஷோரூமாக தற்போது அதிகரித்திருக்கிறது.
தொடக்க விலையிலேயே புதிய X440 பைக்கை பெற விரும்புபவர்கள் ஆகஸ்ட் 3 (நாளை) வரை முன்பதிவு செய்து கொள்ளலாம் என அறிவித்திருக்கிறது அந்நிறுவனம். நாளையுடன் முதற்கட்ட முன்பதிவையும் நிறுத்தவிருப்பதாக ஹார்லி டேவிட்சன் நிறுவனம் முன்பே அறிவித்திருந்தது குறிப்பிடத்தக்கது.