டித்வா புயல் பாதிப்பு: 120க்கும் மேற்பட்டோர் பலி; இலங்கையில் அவசர நிலை பிரகடனம்
செய்தி முன்னோட்டம்
டித்வா புயலின் காரணமாக ஏற்பட்ட கடும் பாதிப்புகளைத் தொடர்ந்து, இலங்கையின் அதிபர் அனுரா குமார திசநாயக்க, நாடு முழுவதும் அவசர நிலையைப் பிரகடனம் செய்துள்ளார். புயல் நாட்டை விட்டு வெளியேறினாலும், அதன் கோரத் தாண்டவத்தால் இதுவரை 120க்கும் மேற்பட்டோர் உயிரிழந்துள்ளனர். வெள்ளிக்கிழமை (நவம்பர் 28) அனைத்துக் கட்சிக் கூட்டத்தில் எதிர்க்கட்சித் தலைவர்கள் அவசர நிலையை அறிவிக்கக் கோரியதைத் தொடர்ந்து, சனிக்கிழமை வெளியிடப்பட்ட அதிகாரப்பூர்வ அரசிதழில் இந்த அவசர நிலை அறிவிப்பு உறுதிப்படுத்தப்பட்டது. இந்த அறிவிப்பின் மூலம், மீட்பு மற்றும் நிவாரணப் பணிகளைத் துரிதப்படுத்த முடியும் என்று அதிகாரிகள் தெரிவித்துள்ளனர். இதன்மூலம், ராணுவம், காவல்துறை, சுகாதாரப் பிரிவு மற்றும் சிவில் நிர்வாகப் பிரிவுகளை விரைவாகப் பயன்படுத்தி, தற்போதையச் சூழலைச் சமாளிக்க முடியும் என்று எதிர்பார்க்கப்படுகிறது.
உயிரிழப்பு
கடும் உயிரிழப்பு மற்றும் இந்தியாவின் உதவி
டித்வா புயல் பலத்த அழிவையும், உள்கட்டமைப்புச் சேதத்தையும் ஏற்படுத்தியுள்ளது. அதிகாரப்பூர்வ உயிரிழப்பு எண்ணிக்கை சனிக்கிழமை காலை 123 ஆக இருந்தது. மேலும், 130 பேர் காணவில்லை என்று பேரிடர் மேலாண்மை ஆணையம் தெரிவித்துள்ளது. மோசமான வானிலை காரணமாகப் பாதிக்கப்பட்டப் பகுதிகளில் தகவல் தொடர்பு துண்டிக்கப்பட்டிருப்பதால், உயிரிழப்புகளின் எண்ணிக்கை இன்னும் அதிகமாக இருக்கலாம் என்று அஞ்சப்படுகிறது. இதற்கிடையே, 'ஆபரேஷன் சாகர் பந்து' (Operation Sagar Bandhu) திட்டத்தின் கீழ், இந்தியா விரைந்து செயல்பட்டு இலங்கைக்கு உதவிகளை அனுப்பியுள்ளது. மத்திய வெளியுறவுத் துறை அமைச்சர் எஸ்.ஜெய்சங்கர், சனிக்கிழமை 12 டன் எடையுள்ள மனிதாபிமான உதவிகள் கொழும்பில் தரையிறங்கியதாக அறிவித்தார். இதற்கு முன், ஐஎன்எஸ் விக்ராந்த் கப்பல் மூலம் 4.5 டன் அத்தியாவசியப் பொருட்கள் வழங்கப்பட்டதும் குறிப்பிடத்தக்கது.