இலங்கையில் டித்வா புயலின் கோரத் தாண்டவம்: பலி எண்ணிக்கை 123 ஆக உயர்வு
செய்தி முன்னோட்டம்
டித்வா புயலால் தூண்டப்பட்ட கனமழை மற்றும் வெள்ளப்பெருக்கு காரணமாக இலங்கையில் பலி எண்ணிக்கை 123 ஆக உயர்ந்துள்ளதுடன், மேலும் 130 பேர் காணாமல் போயுள்ளனர் என்று அந்நாட்டின் பேரிடர் மேலாண்மை மையம் சனிக்கிழமை (நவம்பர் 29) தெரிவித்துள்ளது. புயல் கடந்த புதன்கிழமை கரையை கடந்து அண்டை நாடான இந்தியாவை நோக்கி நகர்ந்தாலும், அது ஏற்படுத்திய தாக்கம் தீவின் பல பகுதிகளில் மிகப் பெரிய அழிவை ஏற்படுத்தியுள்ளது. தொடர்ந்து பெய்த மழையால் தாழ்வான பகுதிகளில் வெள்ளப்பெருக்கு மோசமடைந்தது. கொழும்பில் இந்தியப் பெருங்கடலில் கலக்கும் கெளனி நதியின் கரையோரம் வசிக்கும் மக்களை வெளியேறும்படி அதிகாரிகள் உத்தரவிட்டுள்ளனர். கெளனி நதி வெள்ளிக்கிழமை மாலை உடைப்பெடுத்ததால் நூற்றுக்கணக்கான மக்கள் தற்காலிக நிவாரண மையங்களுக்கு மாற்றப்பட்டுள்ளனர்.
நிவாரணப் பணிகள்
நிவாரணப் பணிகள் மற்றும் இந்தியா உதவி
வெள்ளம் காரணமாக வீடுகளை இழந்த 43,995 பேர் அரசு மையங்களுக்கு மாற்றப்பட்டுள்ளனர் என்று பேரிடர் மேலாண்மை மைய இயக்குநர் ஜெனரல் சம்பத் கொட்டுவேகொட தெரிவித்தார். ஆயுதப் படைகளின் உதவியுடன் மீட்பு மற்றும் நிவாரண நடவடிக்கைகள் போர்க்கால அடிப்படையில் நடந்து வருகின்றன. இந்திய பிரதமர் நரேந்திர மோடி, உயிரிழப்புகளுக்குத் தனது இரங்கலைத் தெரிவித்ததோடு, மேலும் உதவிகளை அனுப்பத் தயாராக இருப்பதாக உறுதியளித்தார். அதன் தொடர்ச்சியாக, இன்று அதிகாலையில் இந்தியா, பாதிக்கப்பட்டவர்களுக்குத் தேவையான அத்தியாவசியப் பொருட்களை விமானம் மூலம் அனுப்பி வைத்தது. இந்த வாரத்தில் ஏற்பட்ட உயிர்ச்சேதம், கடந்த ஜூன் மாதம் 26 பேர் பலியான சம்பவத்திற்குப் பிறகு மிக அதிகமாகும்.