அமெரிக்கா - ஈரான் போர் தீவிரம்: ஜோர்டானில் 2 அமெரிக்க வீரர்கள் பலி! மொஜ்தபா கமேனி பகீர் எச்சரிக்கை
செய்தி முன்னோட்டம்
மத்திய கிழக்கு பிராந்தியத்தில் அமெரிக்கா மற்றும் ஈரான் இடையே நீடித்து வரும் மோதல் தற்பொழுது ஒரு புதிய போராக வெடித்துள்ளது. ஜோர்டானில் நிறுத்தப்பட்டிருந்த அமெரிக்க மற்றும் அதன் கூட்டுப் படைகளைக் குறிவைத்து ஈரான் நடத்திய அதிநவீன பாலிஸ்டிக் ஏவுகணை மற்றும் ட்ரோன் தாக்குதலில் இரண்டு அமெரிக்க ராணுவ வீரர்கள் கொல்லப்பட்டுள்ளனர். மேலும் ஒரு அமெரிக்க வீரர் மாயமாகியுள்ளதாக அமெரிக்க மத்திய கட்டளை அமைப்பு (சென்ட்காம்) அதிகாரப்பூர்வமாக உறுதிப்படுத்தியுள்ளது.
ஈரான் தாக்குதல்
ஜோர்டான் மற்றும் குவைத்தில் ஈரானின் தாக்குதல்
அமெரிக்க ராணுவத்தின் கூற்றுப்படி, இந்தத் தாக்குதல் கடந்த ஜூலை 17 அன்று அதிகாலை அரங்கேறியுள்ளது.
ஜோர்டானில் உள்ள முவாஃபக் சால்டி விமான தளத்தை குறிவைத்து இந்தத் தாக்குதல் நடத்தப்பட்டதாகத் தகவல்கள் தெரிவிக்கின்றன.
இந்த தாக்குதலில் காயமடைந்த மேலும் நான்கு அமெரிக்க வீரர்கள் உடனடியாக ஜோர்டான் மருத்துவமனைகளுக்குக் கொண்டு செல்லப்பட்டு தற்பொழுது சிகிச்சை பெற்று வருகின்றனர்.
ஜோர்டான் மட்டுமின்றி குவைத்தில் உள்ள ஒரு எண்ணெய் சுத்திகரிப்பு ஆலை மற்றும் நீர் சுத்திகரிப்பு நிலையத்தின் மீதும் ஈரான் ஏவுகணைகளை வீசி தாக்குதல் நடத்தியுள்ளது.
ஈரான் எச்சரிக்கை
ஈரானின் புதிய உச்ச தலைவரின் பகீர் எச்சரிக்கை
இந்தத் தாக்குதலைத் தொடர்ந்து ஈரானின் புதிய உச்ச தலைவர் ஆயதுல்லா செயத் மொஜ்தபா கமேனி அமெரிக்காவிற்கு கடுமையான எச்சரிக்கை விடுத்துள்ளார்.
சுமார் ஒரு மாதத்திற்கு முன்பு இரு நாடுகளுக்கும் இடையே கையெழுத்தான தற்காலிக அமைதி ஒப்பந்தத்தை அமெரிக்கா மீறிவிட்டதாக அவர் குற்றம் சாட்டியுள்ளார்.
மேலும், அமெரிக்க அதிபர் டொனால்ட் டிரம்பின் கையெழுத்து முற்றிலும் மதிப்பற்றது மற்றும் செல்லாதது என்றும் அவர் சாடியுள்ளார்.
எதிர்ப்பு
எதிர்ப்பு அச்சின் மறக்க முடியாத பாடம்
அமெரிக்கா தொடர்ந்து தாக்குதல் நடத்தினால், ஈரானும் அதன் ஆதரவுப் படைகளும் அமெரிக்காவுக்கு மறக்க முடியாத பாடங்களைக் கற்பிக்கும் என்று மொஜ்தபா கமேனி எச்சரித்துள்ளார்.
தற்காலிக ஒப்பந்தத்தில் இருந்து ஈரான் பின்வாங்குவதாக அறிவித்த சில மணி நேரங்களிலேயே, இந்த எச்சரிக்கை அதிகாரப்பூர்வ அரசு தொலைக்காட்சியில் ஒளிபரப்பப்பட்டது.
இதனால் மத்திய கிழக்கில் போர் இன்னும் தீவிரமடைந்துள்ளது.
ஹார்முஸ் ஜலசந்தி
ஹார்முஸ் ஜலசந்தியில் கச்சா எண்ணெய் அச்சுறுத்தல்
உலக கச்சா எண்ணெய் விநியோகத்தில் ஐந்தில் ஒரு பங்கு கடந்து செல்லும் மூலோபாய முக்கியத்துவம் வாய்ந்த ஹார்முஸ் ஜலசந்தி பகுதியைத் தங்கள் கட்டுப்பாட்டுக்குள் கொண்டு வர இரு தரப்பும் தீவிரமாக மோதி வருகின்றன.
இந்த ஜலசந்தி பகுதியில் போர் தீவிரமடைந்துள்ளதால், உலகளாவிய எரிசக்தி விநியோகம் பாதிக்கப்பட்டு கச்சா எண்ணெய் விலை உயரும் அபாயம் ஏற்பட்டுள்ளது.
அமெரிக்கா
அமெரிக்காவின் தொடர் வான்வழிப் பதிலடி
தங்கள் நாட்டு வீரர்கள் கொல்லப்பட்டதைத் தொடர்ந்து, அமெரிக்க ராணுவம் ஈரானின் ராணுவ தளங்கள் மீது தொடர் வான்வழிப் பதிலடித் தாக்குதல்களை நடத்தி வருகிறது.
போர் விமானங்கள் மற்றும் ட்ரோன்களைப் பயன்படுத்தி ஈரானின் நிலத்தடி ஆயுதக் கிடங்குகளை அமெரிக்கா இலக்கு வைத்துள்ளதாக சென்ட்காம் தெரிவித்துள்ளது.
இந்தத் தொடர் மோதல்களால் மத்திய கிழக்கு பிராந்தியம் பெரும் பதற்றத்தில் உள்ளது.