சர்வதேச டி20யில் 2500 ரன்கள்! மிதாலி, ஸ்மிருதி வரிசையில் இணைந்த இந்திய இளம் நட்சத்திரம் ஜெமிமா ரோட்ரிக்ஸ்

எழுதியவர் Sekar Chinnappan

Feb 21, 2026

06:29 pm

செய்தி முன்னோட்டம்

இந்திய மகளிர் கிரிக்கெட் அணியின் நட்சத்திர வீராங்கனை ஜெமிமா ரோட்ரிக்ஸ், சர்வதேச டி20 போட்டிகளில் 2,500 ரன்கள் என்ற மைல்கல்லைக் கடந்து சாதனை படைத்துள்ளார். பிப்ரவரி 21, 2026 அன்று ஆஸ்திரேலியாவுக்கு எதிரான மூன்றாவது மற்றும் கடைசி டி20 போட்டியின் போது அவர் இந்த சாதனையை நிகழ்த்தினார். தனது 118வது போட்டியில் விளையாடிய ஜெமிமா, கிம் கார்த் வீசிய பந்தில் பவுண்டரி அடித்து இந்த இலக்கை எட்டினார். இதன் மூலம் டி20 கிரிக்கெட்டில் 2500 ரன்களைக் கடந்த நான்காவது இந்திய வீராங்கனை என்ற பெருமையை அவர் பெற்றுள்ளார்.,

நட்சத்திரங்கள்

எலைட் பட்டியலில் இணைந்த நட்சத்திரங்கள்

இந்தச் சாதனையை ஏற்கனவே எட்டியுள்ள மற்ற மூன்று மகளிர் இந்திய கிரிக்கெட் அணியின் வீராங்கனைகள்: ஹர்மன்பிரீத் கவுர் (கேப்டன்) ஸ்மிருதி மந்தனா (துணை கேப்டன்) ஷஃபாலி வர்மா குறிப்பாக, ஷஃபாலி வர்மா இதே தொடரின் முந்தைய போட்டியிலேயே 2,500 ரன்களைக் கடந்தார். ஜெமிமா இந்தப் போட்டியில் 46 பந்துகளில் 59 ரன்கள் குவித்து இந்தியாவின் ஸ்கோர் உயர முக்கியக் காரணமாக இருந்தார். டெல்லி கேப்பிடல்ஸ் அணியின் கேப்டனாகவும் இருக்கும் ஜெமிமாவின் இந்த சீரான ஆட்டம் இந்திய அணிக்கு பெரும் பலமாக உள்ளது.

வெற்றி

ஆஸ்திரேலியாவுக்கு எதிரான தொடர் வெற்றி

அடிலெய்டு ஓவல் மைதானத்தில் நடந்த இந்தப் போட்டியில் இந்தியா 17 ரன்கள் வித்தியாசத்தில் வெற்றி பெற்று, 3 போட்டிகள் கொண்ட டி20 தொடரை 2-1 என்ற கணக்கில் கைப்பற்றியது. முதலில் பேட்டிங் செய்த இந்தியா, ஸ்மிருதி மந்தனாவின் அதிரடி 82 ரன்கள் மற்றும் ஜெமிமாவின் 59 ரன்கள் உதவியுடன் 20 ஓவர்களில் 176 ரன்கள் குவித்தது. பின்னர் ஆடிய ஆஸ்திரேலிய அணியை 159 ரன்களுக்குள் சுருட்டி இந்தியா வரலாற்றுச் சிறப்புமிக்க வெற்றியைப் பதிவு செய்தது. 10 ஆண்டுகளுக்குப் பிறகு ஆஸ்திரேலிய மண்ணில் இந்தியா டி20 தொடரை வென்றுள்ளது குறிப்பிடத்தக்கது.

சாதனைகள்

ஹர்மன்பிரீத் மற்றும் எலிஸ் பெர்ரியின் உலக சாதனைகள்

இதே தொடரில் மற்றுமொரு வரலாற்று நிகழ்வாக, இந்திய கேப்டன் ஹர்மன்பிரீத் கவுர் சர்வதேச மகளிர் கிரிக்கெட்டில் அதிக போட்டிகளில் (356) விளையாடிய வீராங்கனை என்ற உலக சாதனையைப் படைத்தார். அவர் நியூசிலாந்தின் சூசி பேட்ஸின் சாதனையை முறியடித்தார். மறுபுறம், ஆஸ்திரேலியாவின் எலிஸ் பெர்ரி தனது 350 வது சர்வதேசப் போட்டியில் பங்கேற்று, இச்சாதனையை எட்டும் முதல் ஆஸ்திரேலிய வீராங்கனை என்ற பெருமையைப் பெற்றார்.