இந்திய அணியின் வங்கதேச சுற்றுப்பயணம் 2026 செப்டம்பர் மாதத்திற்கு மாற்றம்; போட்டிகளின் முழு பட்டியல் விவரம்
செய்தி முன்னோட்டம்
இந்திய கிரிக்கெட் அணி 2025 ஆம் ஆண்டு ஆகஸ்ட் மாதம் வங்கதேசத்தில் சுற்றுப்பயணம் மேற்கொண்டு விளையாடவிருந்த ஒருநாள் மற்றும் டி20 கிரிக்கெட் தொடர்கள், தற்போது 2026 செப்டம்பர் மாதத்திற்கு மாற்றப்பட்டுள்ளன. இது குறித்த அதிகாரப்பூர்வ அறிவிப்பை வங்கதேச கிரிக்கெட் வாரியம் வெளியிட்டுள்ளது. முதலில் 2025 இல் திட்டமிடப்பட்டிருந்த இந்தத் தொடர், இரு நாடுகளுக்கும் இடையே நிலவும் தற்போதைய சூழல் மற்றும் சர்வதேசப் போட்டிகளுக்கான கால அட்டவணை நெருக்கடி ஆகியவற்றைக் கருத்தில் கொண்டு ஒத்திவைக்கப்பட்டது. இரு நாடுகளின் கிரிக்கெட் வாரியங்களும் பேசி எடுத்த முடிவின்படி, இந்தத் தொடர் இப்போது 2026 ஆம் ஆண்டின் வங்கதேச உள்நாட்டுப் போட்டி அட்டவணையில் சேர்க்கப்பட்டுள்ளது.
அட்டவணை
திருத்தப்பட்ட போட்டி அட்டவணை (செப்டம்பர் 2026)
இந்திய அணி ஆகஸ்ட் 28, 2026 அன்று வங்கதேசம் சென்றடையும் என்று எதிர்பார்க்கப்படுகிறது. போட்டிகளின் விவரம் இதோ: ஒருநாள் கிரிக்கெட் தொடர் (ODI Series): முதல் போட்டி: செப்டம்பர் 1 இரண்டாம் போட்டி: செப்டம்பர் 3 மூன்றாம் போட்டி: செப்டம்பர் 6 டி20 கிரிக்கெட் தொடர் (T20I Series): முதல் போட்டி: செப்டம்பர் 9 இரண்டாம் போட்டி: செப்டம்பர் 12 மூன்றாம் போட்டி: செப்டம்பர் 13
வங்கதேசம்
வங்கதேசத்தின் பிஸியான 2026 சீசன்
இந்திய அணியைத் தவிர, 2026 ஆம் ஆண்டில் பாகிஸ்தான், நியூசிலாந்து, ஆஸ்திரேலியா மற்றும் வெஸ்ட் இண்டீஸ் ஆகிய அணிகளும் வங்கதேசத்தில் சுற்றுப்பயணம் மேற்கொண்டு வங்கதேச கிரிக்கெட் அணியுடன் மோத உள்ளன. பாகிஸ்தான்: மார்ச் மாதம் (ஒருநாள் தொடர்) மற்றும் மே மாதம் (டெஸ்ட் தொடர்). நியூசிலாந்து: ஏப்ரல் - மே மாதங்களில் வெள்ளைப்பந்து தொடர். ஆஸ்திரேலியா: ஜூன் மாதம் வெள்ளைப்பந்து தொடர். வெஸ்ட் இண்டீஸ்: அக்டோபர் - நவம்பர் மாதங்களில் டெஸ்ட் தொடர். இந்தப் போட்டிகள் நடைபெறும் மைதானங்கள் குறித்த அறிவிப்பு பின்னர் வெளியாகும் எனத் தெரிவிக்கப்பட்டுள்ளது.