"குடும்பத்தினருக்கு அனுமதியில்லை": டி20 உலகக் கோப்பையில் BCCI அதிரடி

எழுதியவர் Venkatalakshmi V

Feb 10, 2026

01:52 pm

செய்தி முன்னோட்டம்

தற்போது நடைபெற்று வரும் 2026 டி20 உலகக் கோப்பை தொடரில், இந்திய கிரிக்கெட் வீரர்கள் தங்கள் மனைவி அல்லது குடும்பத்தினருடன் தங்குவதற்கு இந்திய கிரிக்கெட் கட்டுப்பாட்டு வாரியம் (BCCI) அதிரடித் தடை விதித்துள்ளது. இது தொடர்பான அணி நிர்வாகத்தின் கோரிக்கையைப் பிசிசிஐ திட்டவட்டமாக நிராகரித்துள்ளது. கடந்த 2024-25 பார்டர்-கவாஸ்கர் கோப்பை தொடரில் ஆஸ்திரேலியாவிடம் 1-3 என்ற கணக்கில் இந்தியா தோல்வியடைந்ததை தொடர்ந்தே இந்த முடிவு எடுக்கப்பட்டது. அந்த தொடரின் போது, சில வீரர்கள் தங்கள் குடும்பத்தினருடன் நேரத்தை செலவிட்டதால், முக்கியமான ஆலோசனைக் கூட்டங்களில் பங்கேற்கவில்லை என்று பயிற்சியாளர்கள் தரப்பில் புகார் எழுந்தது. இதன் விளைவாக, நீண்ட வெளிநாட்டுத் தொடர்களில் 14 நாட்களுக்கு மேல் குடும்பத்தினருடன் தங்கக் கூடாது என்ற விதிமுறை அமலுக்கு வந்தது.

கட்டுப்பாடுகள்

BCCI விதித்துள்ள புதிய கட்டுப்பாடுகள்

டி20 உலகக் கோப்பையில் வீரர்கள் தங்கள் குடும்பத்தினரை தனிப்பட்ட முறையில் அழைத்து வரலாம், ஆனால் அவர்கள் வீரர்களுடன் தங்கும் விடுதிகளில் வசிக்க அனுமதி கிடையாது. வீரர்கள் தங்கள் தனிப்பட்ட சமையல்காரர்களை (Personal Chefs) அழைத்து வரலாம். ஆனால், அவர்கள் மைதானத்திற்கு அருகில் உள்ள விடுதிகளில் தங்கி உணவை சமைத்து அனுப்ப மட்டுமே அனுமதி. உலகக் கோப்பைத் தொடர் முழுவதும் இந்திய அணி தனி விமானம் மூலமே பயணம் செய்யும் என்றும் பிசிசிஐ உறுதி செய்துள்ளது.

போட்டி

இந்தியாவின் அடுத்தடுத்த போட்டிகள்

சூர்யகுமார் யாதவ் தலைமையிலான இந்திய அணி, தனது முதல் போட்டியில் அமெரிக்காவைத் தோற்கடித்து வெற்றியைத் தொடங்கியுள்ளது. அடுத்ததாக பிப்ரவரி 12-ம் தேதி டெல்லியில் நமீபியாவுடன் மோதவுள்ளது. இதனைத் தொடர்ந்து, பிப்ரவரி 15-ம் தேதி கொழும்பில் நடைபெறவுள்ள பாகிஸ்தானுக்கு எதிரான மிக முக்கியமான போட்டிக்கு இந்திய அணி தயாராகி வருகிறது. வீரர்கள் விளையாட்டில் முழு கவனத்தை செலுத்த வேண்டும் என்பதற்காகவே இந்த கடுமையான விதிகள் அமல்படுத்தப்பட்டுள்ளதாக பிசிசிஐ வட்டாரங்கள் தெரிவிக்கின்றன.