வாட்ஸ்அப் பாதுகாப்பு வசதிகள்: ஆன்லைன் மோசடிகளில் இருந்து தப்பிக்க உதவும் 5 புதிய செக்யூரிட்டி அம்சங்கள்!
செய்தி முன்னோட்டம்
இந்தியாவிலும் சர்வதேச அளவிலும் நாளுக்கு நாள் அதிகரித்து வரும் ஆன்லைன் பண மோசடிகள் மற்றும் டிஜிட்டல் ஏமாற்று வேலைகளில் இருந்து பயனர்களைப் பாதுகாக்க வாட்ஸ்அப் நிறுவனம் 5 புதிய பாதுகாப்பு அம்சங்களை அறிமுகப்படுத்தியுள்ளது. தற்கால மோசடி நபர்கள் வங்கி அதிகாரிகள் அல்லது டெலிவரி ஊழியர்கள் போலப் போலி முகமூடி அணிந்து, பொதுமக்களின் ஓடிபி மற்றும் வங்கி விபரங்களைத் திருடுவதை வாட்ஸ்அப் நிறுவனம் சுட்டிக்காட்டியுள்ளது. இத்தகைய அச்சுறுத்தல்களைத் முறியடித்து, பயனர்கள் தங்களது கணக்குகளை முழுமையான கட்டுப்பாட்டில் வைத்துக்கொள்ள உதவும் வகையில் இந்த புதிய பாதுகாப்புச் செயலிகள் வடிவமைக்கப்பட்டுள்ளன.
போலி அழைப்புகள் தடுப்பு
தேவையற்ற அழைப்புகளைத் தவிர்க்கும் 'சைலன்ஸ் அன்நோன் காலர்ஸ்' மற்றும் காண்டெக்ஸ்ட் கார்டுகள்
வாட்ஸ்அப்பில் அறிமுகமாகியுள்ள 'Silence Unknown Callers' வசதியை ஆன் செய்வதன் மூலம், நமக்குத் தெரியாத புதிய எண்களில் இருந்து வரும் போலி அழைப்புகள் ஒலிப்பதைத் தடுத்து அவற்றை செயலற்றதாக்க முடியும். இந்த தேவையற்ற அழைப்புகள் அனைத்தும் தனியாக 'Calls' பகுதியில் மட்டுமே பதிவாவதால், அவசரக் காலத்தில் பதற்றத்தை உண்டாக்கி மோசடி செய்யும் போலி நபர்களிடம் இருந்து நாம் தப்பித்துக் கொள்ளலாம். மேலும் அறிமுகமில்லாத புதிய எண்களில் இருந்து வரும் மெசேஜ்களுடன் தோன்றும் 'Context Cards' மூலமாக, அந்த எண் எந்த நாட்டைச் சேர்ந்தது மற்றும் அது எப்போது தொடங்கப்பட்டது போன்ற விபரங்களை எளிதாக அறியலாம்.
அக்கவுண்ட் ஹேக்கிங் தடுப்பு
ஸ்கிரீன் ஷேர் எச்சரிக்கைகள் மற்றும் அக்கவுண்ட் திருட்டைத் தடுக்கும் சாதன இணைப்பு விழிப்பூட்டல்கள்
வீடியோ கால்களின் போது மோசடி நபர்கள் பயனர்களின் ஸ்கிரீனைப் பகிரச் (Screen Share) செய்து வங்கி ரகசியங்களை திருடுவதைத் தடுக்க, வாட்ஸ்அப் தற்பொழுது புதிய எச்சரிக்கை விழிப்பூட்டல்களை வழங்குகிறது. அறிமுகமில்லாத நபர்களுடன் ஸ்கிரீனைப் பகிர முயலும் போது தோன்றும் இந்த எச்சரிக்கை, நமது முக்கியமான வங்கி ஆவணங்கள் மற்றும் ரகசியத் தரவுகள் திருட்டுப் போவதை முன்கூட்டியே தடுத்து நிறுத்துகிறது. அதுமட்டுமின்றி, நமது வாட்ஸ்அப் கணக்கைப் பிற சாதனங்களுடன் இணைக்க (Device Linking) யாரேனும் முயன்றால், அது குறித்த விபரங்களை உடனுக்குடன் பயனர்களுக்கு அனுப்பிப் போலி இணைப்புகளை ரத்து செய்ய வழிவகை செய்யப்பட்டுள்ளது.
கணக்கு பாதுகாப்பு முறை
இருபடி சரிபார்ப்பு (Two-Step Verification) மூலம் வாட்ஸ்அப் கணக்குகளுக்கு முழுப் பாதுகாப்பு
ஹேக்கர்கள் நமது வாட்ஸ்அப் கணக்கிற்குள் நுழைவதைத் தடுக்க, மிகச் சிறந்த பாதுகாப்பு அரணாக விளங்கும் டூ-ஸ்டெப் வெரிஃபிகேஷன் (Two-step verification) வசதியை ஆன் செய்வது அவசியமாகும். இந்த வசதியைச் செயல்படுத்துவதன் மூலம், நமது கணக்கை மறுமுறை சரிபார்க்கும் போது 6 இலக்க ரகசிய பின் (PIN) எண்ணை வாட்ஸ்அப் உள்ளீடு செய்யக் கோரும். இதன் மூலம் மோசடி நபர்கள் ஏதேனும் ஒரு வழியில் நமது சரிபார்ப்புக் குறியீட்டைப் பெற்றாலும், இந்த ரகசிய பின் எண் இல்லாமல் நமது கணக்கிற்குள் அவர்களால் ஒருபோதும் நுழைய முடியாது எனப் பாதுகாப்பு நிபுணர்கள் உறுதிப்படுத்துகின்றனர்.