இன்ஸ்டாகிராம் DM-களில் என்கிரிப்ஷன் வசதியை நீக்கும் மெட்டா, என்ன காரணம்?
செய்தி முன்னோட்டம்
மெட்டா (Meta) நிறுவனம், தனது சமூக வலைதளப் பக்கமான இன்ஸ்டாகிராமில் (Instagram) நேரடிச் குறுஞ்செய்திகளுக்கான (DMs) 'எண்ட்-டு-எண்ட் என்கிரிப்ஷன்' வசதியை நீக்கப்போவதாக அதிகாரப்பூர்வமாக அறிவித்துள்ளது. கடந்த சில ஆண்டுகளாகப் பயனர் பாதுகாப்பிற்காகச் செயற்கை நுண்ணறிவு மற்றும் என்கிரிப்ஷன் வசதிகளை மேம்படுத்தி வந்த மெட்டா நிறுவனம், தற்போது இன்ஸ்டாகிராமில் மட்டும் ஒரு தலைகீழ் மாற்றத்தைக் கொண்டு வந்துள்ளது. இதன்படி, வரும் மே 8, 2026 முதல் இன்ஸ்டாகிராம் டிஎம்களில் எண்ட்-டு-எண்ட் என்கிரிப்ஷன் வசதி நிறுத்தப்படவுள்ளது.
இன்ஸ்டாகிராம்
எண்ட்-டு-எண்ட் என்கிரிப்ஷன் என்றால் என்ன?
இந்த வசதி இருக்கும்போது, ஒருவர் அனுப்பும் குறுஞ்செய்தியை அனுப்பியவர் மற்றும் பெறுபவரைத் தவிர வேறு யாராலும் (மெட்டா நிறுவனம் உட்பட) அந்தச் செய்தியைப் படிக்க முடியாது. இது ஒரு டிஜிட்டல் பூட்டு போலச் செயல்படும். தற்போது இந்த வசதி நீக்கப்படுவதால், தேவைப்பட்டால் மெட்டா நிறுவனத்தால் உங்கள் குறுஞ்செய்திகளை அணுக முடியும். ஏன்?: இன்ஸ்டாகிராமில் இந்த வசதியை மிகக் குறைவான வாடிக்கையாளர்களே (Opt-in) பயன்படுத்தி வருகின்றனர். எனவே, இதனைத் தொடர்ந்து பராமரிக்க வேண்டிய அவசியமில்லை என நிறுவனம் கருதுகிறது. சிறுவர்களுக்கு எதிரான குற்றங்கள், தவறான தகவல்கள் பரவுதல் மற்றும் சட்டவிரோதச் செயல்களைத் தடுக்க, செய்திகளைக் கண்காணிப்பது அவசியம் எனப் பல்வேறு நாடுகளின் அரசாங்கங்கள் அழுத்தம் கொடுத்து வருகின்றன.
தனியுரிமை
பயனர்கள் செய்ய வேண்டியது என்ன?
ஏற்கனவே என்கிரிப்ட் செய்யப்பட்ட உரையாடல்களை வைத்திருப்பவர்கள், மே 8-ஆம் தேதிக்குள் தங்களது மெசேஜ்கள் மற்றும் மீடியாக்களைத் தரவிறக்கம் செய்துகொள்ளுமாறு அறிவுறுத்தப்பட்டுள்ளனர். தொடர்ந்து என்கிரிப்ஷன் வசதி தேவைப்படுபவர்கள் மெட்டாவின் மற்றொரு செயலியான வாட்ஸ்அப் (WhatsApp)-ஐப் பயன்படுத்துமாறு நிறுவனம் பரிந்துரைத்துள்ளது. மெட்டாவின் இந்த முடிவு தனியுரிமை (Privacy) ஆர்வலர்களிடையே பெரும் விவாதத்தை ஏற்படுத்தியுள்ளது. வாட்ஸ்அப்பில் என்கிரிப்ஷனைத் தொடர்ந்து வழங்கும் மெட்டா, இன்ஸ்டாகிராமில் மட்டும் அதனை நீக்குவது ஏன் என்ற கேள்வி எழுந்துள்ளது. இது பயனர்களின் தனிப்பட்ட உரையாடல்களை விளம்பரங்களுக்காகவோ அல்லது ஏஐ (AI) பயிற்சிக்காகவோ பயன்படுத்த வழிவகுக்கலாம் என்ற அச்சமும் எழுந்துள்ளது. உங்களின் மிக ரகசியமான உரையாடல்களுக்கு இனி இன்ஸ்டாகிராம் பாதுகாப்பானதாக இருக்காது என்பதே இந்த மாற்றத்தின் முக்கியச் செய்தியாகும்.