விண்வெளியில் குழந்தை பெற்றுக்கொள்ள முடியுமா? அறிவியல் சொல்லும் திடுக்கிடும் உண்மைகள்
செய்தி முன்னோட்டம்
செவ்வாய் கிரகத்தில் குடியேறுவது அல்லது நிலவில் வாழ்வது என்பது இப்போது வெறும் அறிவியல் புனைகதை அல்ல. ஸ்பேஸ்எக்ஸ் போன்ற நிறுவனங்கள் விண்வெளிச் சுற்றுலாவிற்குத் தயாராகி வரும் வேளையில், மனித இனப்பெருக்கம் குறித்த ஒரு மிகப்பெரிய உயிரியல் கேள்வி எழுகிறது. பூமியில் இயல்பாக நடக்கும் இனப்பெருக்கச் செயல்முறை, விண்வெளியின் கடுமையான சூழலில் பெரும் பாதிப்புக்கு உள்ளாகிறது என்று அறிவியல் ஆய்வுகள் எச்சரிக்கின்றன.
விந்தணுக்கள்
விண்வெளியில் விந்தணுக்களின் நிலை
பூமியின் ஈர்ப்பு விசை நமது உடல் செயல்பாடுகளில் முக்கியப் பங்கு வகிக்கிறது. 'PLOS One' இதழில் வெளியான ஆய்வின்படி, விண்வெளியில் நிலவும் நுண்-ஈர்ப்பு விசை விந்தணுக்களின் இயக்கத்தைக் கணிசமாக மாற்றுகிறது. புவிஈர்ப்பு விசை இல்லாத நிலையில், விந்தணுக்கள் தங்கள் திசையை இழக்கின்றன, இது இயற்கையான கருத்தரிப்பை மிகவும் கடினமாக்குகிறது. எடையற்ற நிலையில், ரத்த ஓட்டம் உடலின் கீழ்ப்பகுதியிலிருந்து தலைப்பகுதியை நோக்கி நகர்கிறது. இது தாம்பத்திய உறவிற்குத் தேவையான உடலியல் மாற்றங்களைத் தடைசெய்கிறது.
கதிர்வீச்சு
மரபணுவை சிதைக்கும் விண்வெளி கதிர்வீச்சு
ஈர்ப்பு விசையை விடப் பெரிய அச்சுறுத்தல் விண்வெளி கதிர்வீச்சு ஆகும். பூமியின் வளிமண்டலம் நம்மைப் பாதுகாக்கிறது. ஆனால், விண்வெளியில் சூரியன் மற்றும் நட்சத்திரங்களிலிருந்து வரும் அதிவேகத் துகள்கள் மனித டிஎன்ஏவை நேரடியாகத் தாக்குகின்றன. இந்த கதிர்வீச்சுகள் விந்தணு மற்றும் முட்டை செல்களைச் சிறிய குண்டுகள் போலத் தாக்கி, மரபணு குறைபாடுகளை ஏற்படுத்தலாம் அல்லது நிரந்தர மலட்டுத்தன்மையை உண்டாக்கலாம். கதிர்வீச்சு பெண்களின் கருப்பை நுண்அறைகளை விரைவாக சிதைக்கும் அபாயம் உள்ளது.
ஐவிஎஃப்
ஐவிஎஃப் மட்டுமே தீர்வா?
இயற்கையான முறையில் விண்வெளியில் குழந்தை பெற்றுக்கொள்வது கடினம் என்பதால், விஞ்ஞானிகள் செயற்கை கருத்தரிப்பு தொழில்நுட்பத்தை ஒரு தீர்வாகப் பார்க்கின்றனர். சர்வதேச விண்வெளி நிலையத்தில் பல மாதங்கள் வைக்கப்பட்டிருந்த எலியின் விந்தணுக்கள், பூமிக்குத் திரும்பிய பிறகு ஆரோக்கியமான குட்டிகளை உருவாக்கியுள்ளன. கதிர்வீச்சிலிருந்து பாதுகாக்கப்பட்ட ஆய்வகச் சூழலில், கிரையோபிரிசர்வேஷன் முறையில் மரபணுக்களைக் கொண்டு செல்வதே பாதுகாப்பானது என நிபுணர்கள் கருதுகின்றனர். எதிர்காலத்தில் விண்வெளியில் பிறக்கும் குழந்தைகள் இயற்கையான முறையில் பிறக்காமல், மரபணு ஆரோக்கியத்தை உறுதி செய்யும் வகையில் அதிநவீன ஆய்வக முறைகள் மூலமே பிறக்கக்கூடும்.