செவ்வாயின் நிலவிலிருந்து முதன்முறையாக மாதிரி சேகரிப்பு: ஜப்பானின் பிரம்மாண்ட MMX விண்வெளி திட்டம்
செய்தி முன்னோட்டம்
செவ்வாய் கிரகத்தின் நிலவான போபோஸ் அமைப்பில் இருந்து மாதிரிகளை சேகரித்து பூமிக்குக் கொண்டு வரும் நோக்கில், ஜப்பான் தனது MMX (Martian Moons eXploration) விண்கலத்தை செவ்வாய்க்கிழமை (அக்டோபர் 20) விண்ணில் செலுத்துகிறது. H3 ராக்கெட் மூலம் ஏவப்படும் இந்த விண்கலம், 10 மாதப் பயணத்திற்குப் பிறகு ஆகஸ்ட் 2027-இல் செவ்வாயின் சுற்றுப்பாதையை அடையும். இது வெற்றிகரமாக அமைந்தால், செவ்வாய் நிலவிலிருந்து மாதிரி சேகரித்து வரப்படும் உலகின் முதல் விண்வெளித் திட்டமாக இது அமையும்.
ரோவர் தரையிறக்கம்
குறைந்த ஈர்ப்புவிசையும் கடினமான ரோவர் தரையிறக்கமும்
போபோஸ் நிலவு சுமார் 20 கிமீ விட்டம் மட்டுமே கொண்ட மிகவும் சிறிய விண்வெளிப் பாறையாகும்.
இதற்கென பிரான்ஸ் மற்றும் ஜெர்மனி நாடுகளின் கூட்டுத் தயாரிப்பில் உருவாகியுள்ள IDEFIX என்ற சிறிய ரோவர் அனுப்பப்படுகிறது.
போபோஸின் ஈர்ப்புவிசை மிகவும் குறைவாக இருப்பதால், 40 மீட்டர் உயரத்தில் இருந்து ரோவரை தாராளமாக விழச்செய்து தரையிறக்குவது மிகப்பெரிய சவாலாகும்.
2028 இறுதியில் அல்லது 2029 தொடக்கத்தில் இந்த தரையிறக்கம் நடைபெறும் என எதிர்பார்க்கப்படுகிறது.
மாதிரிகள் சேகரிப்பு
மாதிரிகள் சேகரிப்பும் பூமிக்குத் திரும்பும் பயணமும்
MMX விண்கலம் தனது இயந்திர கை மற்றும் இரண்டு மாதிரி சேகரிப்புக் கருவிகள் மூலம் போபோஸ் நிலவிலிருந்து குறைந்தபட்சம் 10 கிராம் பாறைத் தூசிகளை சேகரிக்கும்.
செவ்வாய் நிலவுகளின் தோற்றம் மற்றும் சூரியக் குடும்பத்தின் ஆரம்பக் கால வரலாற்றை அறிய இந்த சோதனை உதவும்.
மூன்று ஆண்டுகள் செவ்வாயின் சுற்றுப்பாதையில் ஆய்வு செய்த பிறகு, சேகரிக்கப்பட்ட மாதிரிகள் அடங்கிய காப்ஸ்யூல் 2031 ஆம் ஆண்டில் ஆஸ்திரேலியாவின் வூமேரா பாலைவனத்தில் பாதுகாப்பாகத் தரையிறக்கப்படும்.
அறிவியல்
செவ்வாய் நிலவுகளின் தோற்றம் குறித்த அறிவியல் புதிர்
செவ்வாய் கிரகத்தின் போபோஸ் மற்றும் டீமோஸ் ஆகிய இரு நிலவுகளும் எவ்வாறு உருவாயின என்பதில் அறிவியலாளர்களிடையே இருவேறு கருத்துக்கள் உள்ளன.
அவை ஈர்க்கப்பட்ட சிறுகோள்களா அல்லது செவ்வாய் மீது விண்கல் மோதியதால் உடைந்த பாறைத் துகள்களா என்ற புதிர் நீடிக்கிறது.
MMX கொண்டுவரும் பாறை மாதிரிகளை ஆய்வகத்தில் பரிசோதிப்பதன் மூலம் இந்த நீண்டகால அறிவியல் புதிருகு முற்றுப்புள்ளி வைக்க முடியும் என நாசா மற்றும் ஜப்பான் விண்வெளி அமைப்புகள் நம்புகின்றன.