பிரஷ் முழுவதும் டூத்பேஸ்ட் தடவுறீங்களா? பற்களுக்கு ஏற்படும் ஆபத்தும் சரியான முறையும்
செய்தி முன்னோட்டம்
நாம் தினமும் காலையில் பல் துலக்கும் போது டூத்பேஸ்ட்டை பிரஷ்ஷின் முழு நீளத்திற்கும் கோடு போலத் தடவிப் பயன்படுத்துவதையே வழக்கமாகக் கொண்டுள்ளோம். ஆனால் பல் மருத்துவர்களின் கூற்றுப்படி, இவ்வாறு பிரஷ் முழுவதும் டூத்பேஸ்ட் வைப்பது முற்றிலும் தவறான மற்றும் தேவையற்ற ஒரு வழக்கமாகும். தொலைக்காட்சி விளம்பரங்களில் தங்களின் விற்பனையை அதிகப்படுத்துவதற்காகவே பிரஷ் முழுவதும் டூத்பேஸ்ட் வைப்பது போன்று காட்டப்படுகிறது. இந்த விளம்பரங்களைப் பார்த்து நாமும் அதே தவறைத் தொடர்ந்து செய்து வருகிறோம்.
சரியான அளவு
பல் மருத்துவர்கள் பரிந்துரைக்கும் சரியான அளவு எவ்வளவு?
முதியவர்கள் மற்றும் பெரியவர்கள் பல் துலக்குவதற்கு ஒரு சிறிய பட்டாணி அளவு டூத்பேஸ்ட் மட்டுமே போதுமானது என்று உலகளாவிய பல் மருத்துவ அமைப்புகள் தெரிவிக்கின்றன.
மூன்று வயதிற்குட்பட்ட சிறிய குழந்தைகளுக்கு அரிசி தானிய அளவு டூத்பேஸ்ட் மட்டுமே பயன்படுத்தப்பட வேண்டும்.
பற்களைத் தூய்மைப்படுத்துவது டூத்பேஸ்ட் அல்ல, நாம் பல் துலக்கும் சரியான முறையும் பிரஷ்ஷின் இழைகளும் தான் என்பதை உணர்ந்து கொள்ள வேண்டும்.
பக்கவிளைவுகள்
அதிக டூத்பேஸ்ட் பயன்படுத்துவதால் ஏற்படும் பக்கவிளைவுகள்
டூத்பேஸ்ட்டில் சேர்க்கப்படும் ஃபுளோரைடு மற்றும் இரசாயனங்கள் அளவுக்கு அதிகமாக உடலுக்குள் செல்லும்போது பற்களுக்கு பாதிப்பை ஏற்படுத்துகின்றன.
குறிப்பாக குழந்தைகளுக்கு பற்களின் எனாமல் பகுதியில் ஃபுளோரோசிஸ் என்ற நோய் ஏற்பட்டு பற்களில் வெள்ளை அல்லது பழுப்பு நிறக் கரைகள் தோன்றும்.
மேலும் அதிகப்படியான நுரை வருவதால் வாய் சீக்கிரமே நிறைந்து முழுமையாக இரண்டு நிமிடங்கள் பல் துலக்க முடியாமல் அவசரமாகத் துப்ப வேண்டிய சூழல் உருவாகிறது.
சரியான முறை
சரியான முறையில் பல் துலக்கும் நுட்பங்கள்
டூத்பேஸ்ட்டை பட்டாணி அளவு எடுத்து பிரஷ்ஷின் இழைகளுக்குள் லேசாக அழுத்திக் கொள்ள வேண்டும்.
அதன் பிறகு பற்களின் வெளிப்பகுதி, உட்பகுதி மற்றும் கடவாய் பற்களை சுழற்சி முறையில் மென்மையாகப் பல் துலக்க வேண்டும்.
தினமும் இரண்டு நிமிடங்கள் மட்டுமே பல் துலக்குவது போதுமானது.
அதிக நேரம் துலக்குவதோ அல்லது அதிக டூத்பேஸ்ட் பயன்படுத்துவதோ பற்களின் எனாமலைத் தேய்த்து கூச்சத்தை உண்டாக்கிவிடும்.