கும்பகோணம் தனி மாவட்டமாக பிரிக்கப்பட்டால் உண்டாகும் மாற்றங்கள் - ஓர் பார்வை
செய்தி முன்னோட்டம்
தமிழ்நாடு மாநிலத்திலுள்ள தஞ்சை மாவட்டத்தின் ஓர் முக்கிய அங்கமாக கும்பகோணம் திகழ்கிறது. கடந்த 1868ம்ஆண்டு கும்பகோணம் ஜில்லாவாக இருந்ததற்கு சான்றுகள் உள்ளதாகவும் கூறப்படுகிறது. கும்பகோணத்தில் தென்னகத்தின் கேம் பிரிட்ஜ் என கூறப்படும் அரசு கல்லூரி, நவகிரஹ கோயில்கள், புராதான சின்னங்கள், 12ஆண்டுகளுக்கு ஒருமுறை நடக்கும் மாசி மகாமகம், பல்வேறு கோயில்கள், உலக புகழ்பெற்ற விழாக்கள், வர்த்தகம் என அனைத்து வசதிகளும் நிறைந்துள்ளது. பல்வேறு அரசுத்துறை தலைமை அலுவலகங்களும், தனியார் வங்கிகளின் தலைமையகமும் இங்கு தான் அமைந்துள்ளது. தஞ்சை மாவட்ட தலைமை குற்றவியல் நீதிமன்றமே கும்பகோணத்தில் தான் அமைந்துள்ளது. இத்தகைய பல்வேறு சிறப்பம்சங்களை கொண்ட கும்பகோணத்தினை தனி மாவட்டமாக அறிவிக்க வேண்டும் என்பது அப்பகுதி மக்களின் 25 ஆண்டுகால போராட்டத்துடன் கூடிய கோரிக்கை ஆகும்.
தனி மாவட்டம்
கும்பகோணத்தின் சிறப்புகள் குறித்து வழக்கறிஞர் ஜீவானந்தம் பேட்டி
இதுகுறித்து தஞ்சை வழக்கறிஞர் ஜீவானந்தம் அளித்துள்ள பேட்டியில், மாற்றம் என்பது வளர்ச்சி மற்றும் தற்போதைய காலகட்டத்தில் தவிர்க்க முடியாததாகும். தஞ்சையில் உள்ள அணைக்கரை போன்ற பகுதியில் உள்ளோர் மாவட்ட ஆட்சியரை சந்திக்க வேண்டுமென்றால் சுமார் 75கி.மீ.,பயணம் செய்யவேண்டும். அதுவே கும்பகோணம் தனிமாவட்டமாக பிரிக்கப்பட்டால் தனி மாவட்ட ஆட்சியர் அலுவலகம் அமைக்கப்படும். அதுமட்டுமின்றி புதிய காவல்ஆய்வாளர் அலுவலகம், தனி ஆர்டிஓ.,அலுவலகம், புது பாலங்கள் போன்றவைகளும் அமையும். கும்பகோணத்திற்காக ஒதுக்கப்படும் நிதி அதிகரிக்கும். இதனால் மாவட்டரீதியாகவும் வளர்ச்சி பெறுவதோடு, பொதுமக்களும் பயனடைவர். மன்னர்கள் ஆண்ட பூமியாக, போர்கள் அதிகம் நடந்த இடமாக திகழும் கும்பகோணத்தினை நிதி பற்றாக்குறை காரணமாகவே தமிழக அரசு தனி மாவட்டமாக பிரிக்காமல் காலம் தாழ்த்தி வருகிறது என்று அவர் கூறியுள்ளது குறிப்பிடத்தக்கது.