ஆழ்ந்த காற்றழுத்தத் தாழ்வுப் பகுதி வலுவிழப்பு - டிசம்பர் 29ம் தேதி வரை மிதமான மழைக்கு வாய்ப்பு
சமீபத்தில் வங்கக்கடலில் உருவான ஆழ்ந்த காற்றழுத்த தாழ்வு பகுதி நேற்று குமரி கடல் மற்றும் அதனை ஒட்டிய பகுதிகளில் காற்றழுத்த தாழ்வு பகுதியாக வலுவிழுந்து காணப்பட்டது. இது மேலும் வடக்கு மற்றும் வடமேற்கு பகுதிகளுக்கு நகர்ந்து அரபிக்கடல் பகுதிகளுக்கு செல்ல வாய்ப்புள்ளதாக கூறப்படுகிறது. இதனால் தென் தமிழகத்தில் அதிக இடங்களிலும், வட தமிழகம், புதுவை, காரைக்கால் பகுதிகளில் ஒரு சில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் என்று சென்னை வானிலை ஆய்வு மையம் தகவல்களை வெளியிட்டுள்ளது.
சென்னை வானிலை ஆய்வு மைய இயக்குனர் செந்தாமரை கண்ணன் அறிக்கை
மேலும் இது குறித்து சென்னை வானிலை ஆய்வு மைய இயக்குனர் செந்தாமரை கண்ணன் சென்னை மற்றும் புறநகர் பகுதிகளில் அடுத்த 48 மணிக்கு லேசான முதல் மிதமான மழை பெய்யக்கூடும் என்று கூறியுள்ளார். சென்னையில் வெப்பநிலை அதிகப்பட்சமாக 30 டிகிரியும், குறைந்தபட்ச வெப்பநிலை 24லில் இருந்து 25வரை இருக்கக்கூடும். இதனை தொடர்ந்து, லட்சத்தீவு மற்றும் அதனை ஒட்டியுள்ள குமரிக்கடல் பகுதிகள், கேரள கடலோரப்பகுதிகள், மற்றும் அதனை ஒட்டியுள்ள தென்கிழக்கு அரபிக்கடல் பகுதிகளில் மணிக்கு 40 முதல் 50 கி.மீ. பகுதிகளில் சூறாவளி காற்று வீசப்படும். இடையிடையே 60 கி.மீ. வேகத்திலும் காற்று வீசக்கூடும் என்பதால் மீனவர்கள் அப்பகுதிகளுக்கு செல்ல வேண்டாம் என்றும் எச்சரிக்கை விடப்பட்டுள்ளது குறிப்பிடத்தக்கது.
