முத்துராமலிங்க தேவர் நினைவிடத்தில் 2 மண்டபங்கள் அமைக்கப்படும் - மு.க.ஸ்டாலின் அறிவிப்பு
செய்தி முன்னோட்டம்
ராமநாதபுரம் மாவட்டம் கமுதியில் அமைந்துள்ளது பசும்பொன் முத்துராமலிங்க தேவரின் நினைவிடம்.
இங்கு இவரின் 116வது-ஜெயந்தி விழாவும், 61வது குருபூஜை விழாவும் வரும் 30ம் தேதி நடைபெறவுள்ளது.
பல்வேறு வரலாற்று சிறப்புகளை பெற்ற பசும்பொன் தேவரின் பிறந்தநாள் விழா ஒவ்வொரு ஆண்டும் அரசு விழாவாக கொண்டாடப்படுகிறது.
அதன்படி இந்தாண்டின் விழாவில் பங்கேற்க தமிழ்நாடு மட்டுமின்றி வெளிமாநிலங்களில் இருந்தும் முக்கிய அரசியல் பிரமுகர்கள், பொதுமக்கள் என பலரும் பசும்பொன் தேவரின் நினைவிடத்தில் மரியாதை செலுத்தி வருகிறார்கள்.
இதனால் அப்பகுதியில் கூட்டம் அதிகம் கூடும் காரணத்தினால் பொதுமக்கள் வெட்டவெளியில் பல மணிநேரம் காத்திருக்க வேண்டிய நிலை ஏற்பட்டுள்ளது.
இதன் காரணமாக ஒவ்வொரு ஆண்டும் அங்கு கூடும் மக்களை வெயில் மற்றும் மழையிலிருந்து பாதுகாத்திட தற்காலிக பந்தல்கள் போடப்படும்.
முதல்வர்
மு.க.ஸ்டாலின் உத்தரவிட்டுள்ளார்
இந்நிலையில், இப்பகுதியில் ஓர் நிரந்தர மண்டபம் அமைத்து தருமாறு மக்கள் நீண்ட நாட்களாக கோரிக்கை வைத்து வருகின்றனர்.
பொதுமக்களின் இந்த கோரிக்கையினை ஏற்று முத்துராமலிங்க தேவரின் நினைவிட முகப்பில் அவர்கள் பாதுகாப்பாக அஞ்சலி மற்றும் மரியாதை செலுத்த ரூ.1 கோடியே 42 லட்சத்து 80 ஆயிரம் மதிப்பீட்டில் ஓர் மண்டபம் அமைக்கப்படும் என்று முதல்வர் மு.க.ஸ்டாலின் அண்மையில் ஓர் அறிவிப்பினை வெளியிட்டுள்ளார்.
மேலும், மிக முக்கிய பிரமுகர்கள் வந்து மரியாதை செய்வதற்கான பாதையில் 12 லட்சத்து 54 ஆயிரம் மதிப்பீட்டில் ஓர் மற்றுமோர் மண்டபம் என மொத்தம் ரூ.1 கோடியே 55 லட்சத்து 34 ஆயிரம் மதிப்பீட்டில் இரண்டு மண்டபங்கள் அமையவுள்ளதாகவும் அவர் தெரிவித்து அதற்கான உத்தரவினை பிறப்பித்துள்ளார் என்று செய்திகள் வெளியாகியுள்ளது.