தமிழக அரசு - அனைத்து ஒப்புதல்கள் பெற்ற பிறகே பேனா சின்னம் அமைக்கப்படும் என பதில் மனுத்தாக்கல்
முன்னாள் முதல்வரும் திமுக கட்சி தலைவருமான கருணாநிதிக்கு சென்னை மெரினா கடற்கரை பகுதியில் நினைவு மண்டபம் ஏற்கனவே கட்டப்பட்டு வருகிறது. இந்நிலையில் அவருக்கு சென்னை மெரினாவில் கடலுக்குள் பேனா நினைவு சின்னம் அமைப்பதாக கூறி அதற்கான கருத்துக்கேட்பு கூட்டமும் அண்மையில் நடத்தப்பட்டது. இதற்கு எதிர்ப்பு தெரிவித்து திருச்செந்தூரை சேர்ந்த ராம்குமார் ஆதித்தன் என்பவர் கடந்த டிசம்பர் மாதம் மனுத்தாக்கல் செய்தார். அதில் சுற்றுசூழல் பாதிப்பு ஏற்படும் வாய்ப்பு இத்திட்டத்தின் மூலம் அதிகம் உள்ளது என்பதால் இதற்கு தடை விதிக்கவேண்டும் என்று குறிப்பிட்டிருந்தார். மேலும் மத்திய அரசு கடற்கரை ஒழுங்குமுறை மண்டல மேலாண்மை விதிகளின் கீழ் இந்த திட்டத்துக்கு அனுமதியளிக்க தடை விதிக்கவேண்டும் என்றும் வலியுறுத்தப்பட்டிருந்தது.
பசுமை தீர்பாயத்தில் பதில் மனு தாக்கல் செய்த தமிழக அரசு
இது குறித்த விசாரணை மீண்டும் நேற்று(பிப்.,3) நடந்த நிலையில், மத்திய,மாநில அரசுத்துறை சார்ந்த சுற்றுசூழல்துறை, மீன்வளத்துறை, கடலோர ஒழுங்குமுறை மண்டல ஆணையம் உள்ளிட்ட அரசுத்துறைகள் பதில் மனுத்தாக்கல் செய்ய கோரி உத்தரவிட்டது. இதனையடுத்து, சென்னை மெரினா கடற்கரையில் பேனா நினைவு சின்னத்திற்கு தடைகோரி தொடரப்பட்ட வழக்கில் தமிழக அரசு பதில் மனுவினை தற்போது தாக்கல் செய்துள்ளது. அந்த மனுவில், 'அனைத்து ஒப்புதல்களும் பெற்ற பிறகே கருணாநிதி நினைவிடத்தில் பேனா நினைவு சின்னம் அமைப்பதற்கான பணிகள் துவங்கப்படும்' என்று தெரிவிக்கப்பட்டுள்ளது. முன்னதாக நடந்த கருத்துக்கேட்பு கூட்டத்தில் நாம் தமிழர் கட்சி தலைவர் சீமான் அவர்கள், இந்த நினைவு சின்னம் அமைக்கப்படக்கூடாது, மீறி அமைத்தால் இருந்த இடம் தெரியாமல் செய்துவிடுவேன் என்று எச்சரிக்கை விடுத்தது குறிப்பிடத்தக்கது.
