உலக எய்ட்ஸ் நாள் 2025: புதிய தொற்று இல்லாத தமிழ்நாடு உருவாக்க முதல்வர் மு.க.ஸ்டாலின் வலியுறுத்தல்
செய்தி முன்னோட்டம்
ஆண்டுதோறும் டிசம்பர் 1 ஆம் தேதி அனுசரிக்கப்படும் உலக எய்ட்ஸ் தினத்தை முன்னிட்டு, தமிழக முதல்வர் மு.க.ஸ்டாலின், 'புதிய எச்ஐவி தொற்று இல்லாத தமிழ்நாடு' என்ற இலக்கை அடையத் தமிழக மக்களுக்குச் செய்தி வெளியிட்டுள்ளார். 1986 ஆம் ஆண்டு சென்னையில் முதன்முதலில் எச்ஐவி கண்டறியப்பட்ட நாள் முதல், கடந்த 39 ஆண்டுகளாகத் தமிழ்நாடு அரசு வெற்றிகரமாகப் பணியாற்றி வருகிறது. தமிழ்நாடு மாநில எய்ட்ஸ் கட்டுப்பாடு சங்கம் (TANSACS) மற்றும் அரசு சாரா நிறுவனங்களின் சிறப்பான செயல்பாடுகளால், தமிழ்நாட்டில் எச்ஐவி தொற்றின் தாக்கம் 2002 ஆம் ஆண்டில் இருந்த 1.11 விழுக்காட்டிலிருந்து 2023-24ஆம் நிதியாண்டில் 0.16 விழுக்காடாகக் குறைந்துள்ளது. இது தேசிய சராசரியான 0.23 விழுக்காட்டை விடக் குறைவாகும்.
திட்டங்கள்
அரசு உதவிகள் மற்றும் திட்டங்கள்
எச்ஐவி தொற்றைக் கண்டறிய 2,600 நம்பிக்கை மையங்களும், சிகிச்சையளிக்க 81 கூட்டு மருத்துவ சிகிச்சை மையங்களும் செயல்படுகின்றன. கர்ப்பிணிப் பெண்களுக்கும் எச்ஐவி பரிசோதனை கட்டாயமாக்கப்பட்டுள்ளது. மேலும், எச்ஐவி தொற்றால் பாதிக்கப்பட்ட 7,618 குழந்தைகளுக்கு ஊட்டச்சத்து, கல்வி மற்றும் மருத்துவத் தேவைகளுக்காக மாதந்தோறும் ₹1,000 நிதி உதவி வழங்கும் திட்டம் 2025-26ஆம் நிதியாண்டில் நடைமுறைப்படுத்தப்பட்டுள்ளது. இறுதியாக, எச்ஐவி தொற்றுடன் வாழும் மக்கள் எவ்விதப் பாகுபாடும், ஒதுக்குதலும் இன்றிச் சம வாய்ப்பு, மரியாதை மற்றும் மதிப்புடன் நடத்தப்பட வேண்டும் என்றும், அவர்களுக்கு அன்பையும் ஆதரவையும் அளிக்க வேண்டும் என்றும் முதல்வர் மு.க.ஸ்டாலின் கேட்டுக்கொண்டுள்ளார்.