திண்டுக்கல் மாநகராட்சி ஆணையர் வீட்டில் லஞ்ச ஒழிப்புத்துறை அதிகாரிகள் சோதனை
செய்தி முன்னோட்டம்
திருப்பூரை சேர்ந்த மகேஸ்வரி 3 மாதங்களுக்கு முன் திண்டுக்கல் மாநகராட்சி ஆணையராக பதவியேற்றார்.
அதற்கு முன்னர் அவர் காஞ்சிபுரத்தில் ஆணையராக பணிபுரிந்தப்பொழுது பல ஊழல் புகார்கள் அவர்மீது எழுந்ததாக தகவல்கள் தெரிவிக்கின்றன.
அதனை தொடர்ந்து, அவர் திண்டுக்கல்லில் பதவியேற்ற பின்னரும் அவர் மீது பல்வேறு குற்றச்சாட்டுகள் கூறப்பட்டு வந்தது.
அதிலும், டெண்டர் விட்டதில் அவர் பல்வேறு முறைகேடுகள் செய்ததாக கூறப்படுகிறது.
இது குறித்த புகார்கள் அரசின் கவனத்திற்கு கொண்டு செல்லப்பட்ட நிலையில், திண்டுக்கல் மாவட்ட லஞ்ச ஒழிப்புத்துறை காவல் துணை கண்காணிப்பாளரான நாகராஜ் தலைமையில் 10 பேர் கொண்ட குழு இன்று(ஜூன்.,23)மகேஸ்வரி வீட்டிற்கு சென்று அதிரடி சோதனையில் ஈடுபட்டது.
சோதனை
கிருமி நாசினி வாங்கியதில் முறைகேடு
இந்த சோதனையில் அதிகாரிகள் அவரது வீட்டில் இருந்த ஆவணங்கள், மடிக்கணினி உள்ளிட்ட பொருட்களை எடுத்து சோதனை நடத்தி இருக்கின்றனர்.
அதேபோல் இந்த சோதனையின்போது, அப்பகுதியில் உள்ள யாரும் அந்த குடியிருப்பு பகுதிக்குள் அனுமதிக்கப்படவில்லை என்றும் கூறப்படுகிறது.
தொடர்ந்து, இவர் காஞ்சிபுரத்தில் ஆணையராக இருந்தப்பொழுது, கொரோனா காலகட்டத்தில் கிருமி நாசினி கொள்முதல் செய்ததில் முறைகேடு செய்ததாக புகார்கள் அளிக்கப்பட்டதையடுத்து, இந்த சோதனையானது மேற்கொள்ளப்பட்டுள்ளது என்று காவல்துறை தகவல் அளித்துள்ளது.
மேலும் இவரது குடும்பத்தினர் வெளியூரில் வசித்து வரும் நிலையில், அவர்கள் உள்ள வீடுகளிலும் சோதனை நடத்தப்பட்டதாக செய்திகள் வெளியாகி உள்ளன.