மத்திய கிழக்கு போர்: கச்சா எண்ணெய், மின்சாரம் மற்றும் உர விநியோகம் குறித்து பிரதமர் மோடி அவசர ஆலோசனை
செய்தி முன்னோட்டம்
மத்திய கிழக்கில் தொடர்ந்து அதிகரித்து வரும் போர் பதற்றங்களுக்கு மத்தியில், இந்தியாவின் கச்சா எண்ணெய், எரிவாயு, மின்சாரம் மற்றும் உரத் துறைகளின் தற்போதைய நிலை குறித்து பிரதமர் நரேந்திர மோடி ஞாயிற்றுக்கிழமை (மார்ச் 22) தீவிர ஆலோசனை நடத்தினார். சர்வதேச விநியோகச் சங்கிலியில் ஏற்பட்டுள்ள தடைகளை முறியடித்து, நாட்டு மக்களுக்குத் தடையின்றி அத்தியாவசியப் பொருட்கள் கிடைப்பதை உறுதி செய்வதே இந்தச் சந்திப்பின் முக்கிய நோக்கமாக இருந்தது. இந்த உயர்மட்டக் கூட்டத்தில் பாதுகாப்புத்துறை அமைச்சர் ராஜ்நாத் சிங், உள்துறை அமைச்சர் அமித் ஷா, வெளியுறவுத்துறை அமைச்சர் எஸ்.ஜெய்சங்கர், நிதியமைச்சர் நிர்மலா சீதாராமன் மற்றும் பெட்ரோலியத் துறை அமைச்சர் ஹர்தீப் சிங் பூரி உள்ளிட்ட முக்கிய அமைச்சர்கள் மற்றும் உயர் அதிகாரிகள் பங்கேற்றனர்.
ஹார்மஸ் ஜலசந்தி
ஹார்முஸ் ஜலசந்தி முடக்கமும் இந்தியாவின் கவலையும்
பிப்ரவரி 28 அன்று அமெரிக்கா மற்றும் இஸ்ரேல் ஈரான் மீது நடத்திய தாக்குதலைத் தொடர்ந்து, ஈரான் தனது கட்டுப்பாட்டில் உள்ள ஹார்முஸ் ஜலசந்தியை கிட்டத்தட்ட மூடியுள்ளது. உலகின் 20 சதவீத எரிசக்தி விநியோகம் இந்த வழித்தடம் வழியாகவே நடைபெறுகிறது. ஈரானின் இந்தத் தடையால் இந்தியா உள்ளிட்ட பல நாடுகளுக்குக் கச்சா எண்ணெய் மற்றும் எரிவாயு கொண்டு வருவதில் பெரும் சிக்கல் ஏற்பட்டுள்ளது.
நடவடிக்கை
அரசின் முன்னெச்சரிக்கை நடவடிக்கைகள்
கூட்டத்தில் ஆலோசிக்கப்பட்ட முக்கிய அம்சங்கள்: தடையற்ற விநியோகம்: பெட்ரோலியப் பொருட்கள் மற்றும் உரங்கள் தடையின்றி கிடைப்பதை உறுதி செய்ய மாற்று வழித்தடங்கள் மற்றும் லாஜிஸ்டிக்ஸ் வசதிகளை மேம்படுத்துதல். விலை கட்டுப்பாடு: உலகளாவிய எரிசக்தி நெருக்கடியால் உள்நாட்டில் விலை உயர்வு ஏற்படாமல் நுகர்வோர் மற்றும் தொழில்துறையினரின் நலன்களைப் பாதுகாத்தல். சர்வதேசத் தொடர்பு: போர் தொடங்கியதிலிருந்து சவுதி அரேபியா, ஐக்கிய அரபு அமீரகம், கத்தார், ஈரான் மற்றும் இஸ்ரேல் உள்ளிட்ட நாடுகளின் தலைவர்களுடன் பிரதமர் மோடி தொலைபேசி வாயிலாகத் தொடர்ந்து பேசி வருகிறார்.
கருத்து
பிரதமர் மோடியின் கருத்து
'மத்திய கிழக்கில் நிலவும் போர் உலகளாவிய எரிசக்தி நெருக்கடியைத் தூண்டியுள்ளது. இது நமது தேசிய குணாதிசயத்திற்கு ஒரு சவால். அமைதி, பொறுமை மற்றும் விழிப்புணர்வுடன் இந்தச் சூழலை நாம் கையாள வேண்டும்." என்று பிரதமர் ஏற்கனவே குறிப்பிட்டிருந்தார். சர்வதேச விநியோகச் சங்கிலியில் ஏற்பட்டுள்ள இடையூறுகளைக் களையத் தனது அரசாங்கம் இடைவிடாது உழைத்து வருவதாகவும் அவர் உறுதி அளித்துள்ளார்.