இன்று கூடுகிறது சிறப்பு நாடாளுமன்ற கூட்டம்: 3 முக்கிய மசோதாக்கள் தாக்கல்; அனல் பிறக்கப்போகும் விவாதம்
செய்தி முன்னோட்டம்
இந்திய நாடாளுமன்றத்தின் வரலாற்றில் ஒரு திருப்புமுனையாக, லோக்சபாவின் உறுப்பினர் எண்ணிக்கையை 850 ஆக உயர்த்தும் 131-வது அரசியலமைப்பு திருத்த மசோதா உள்ளிட்ட மூன்று முக்கிய மசோதாக்கள் இன்று (ஏப்ரல் 16) நாடாளுமன்றத்தில் தாக்கல் செய்யப்படுகின்றன. 2029 பொதுத்தேர்தலில் பெண்களுக்கு 33% இடஒதுக்கீட்டை உறுதி செய்வதற்காக இந்த அதிரடி மாற்றங்களை மத்திய அரசு முன்னெடுத்துள்ளது. இருப்பினும், தொகுதி மறுவரையறை (Delimitation) தொடர்பான இந்த நடவடிக்கை தென்னிந்திய மாநிலங்களின் அரசியல் பலத்தை குறைக்கும் என்று எதிர்க்கட்சிகள் கடும் எதிர்ப்பு தெரிவித்து வருகின்றன.
850 இடங்கள்
புதிய நாடாளுமன்றத்தின் கட்டமைப்பு
மத்திய அரசு தாக்கல் செய்யும் முதல் மசோதாவான 131-வது அரசியலமைப்பு திருத்த மசோதா, லோக்சபாவின் தற்போதைய 543 இடங்களை 850 ஆக உயர்த்த முன்மொழிகிறது. இதில் 815 இடங்கள் மாநிலங்களுக்கும், 35 இடங்கள் யூனியன் பிரதேசங்களுக்கும் ஒதுக்கப்படும். 1971-ம் ஆண்டு மக்கள் தொகை கணக்கெடுப்பின் அடிப்படையில் முடக்கப்பட்டிருந்த தொகுதி எண்ணிக்கையை, தற்போது 2011 கணக்கெடுப்பின் அடிப்படையில் "அன்ஃபிரீஸ்" செய்ய இந்த மசோதா வழிவகை செய்கிறது. இதன் மூலம் தொகுதி பங்கீட்டில் உள்ள சிக்கல்களை தீர்த்து, மகளிர் இடஒதுக்கீட்டை உடனடியாக அமல்படுத்த முடியும் என்று அரசு வாதிடுகிறது.
மற்றவை
மகளிர் இடஒதுக்கீடும் தொகுதி மறுவரையறை இணைப்பும்
பெண்களுக்கான 33% இடஒதுக்கீடு எப்போது அமலுக்கு வரும் என்ற கேள்விக்கு, தொகுதி மறுவரையறை முடிந்த பின்னரே அது சாத்தியம் என்று மசோதா கூறுகிறது. இதற்காக தொகுதி மறுவரையறை ஆணையம் அமைக்கப்படும். 850 இடங்களில் சுமார் 283 இடங்கள் பெண்களுக்காக ஒதுக்கப்படும். இந்த இடங்கள் சுழற்சி முறையில் (Rotation) மாற்றப்படும். எஸ்சி/எஸ்டி (SC/ST) பிரிவினருக்கான ஒதுக்கீட்டிற்குள்ளேயே பெண்களுக்கு 33% உள்ஒதுக்கீடு வழங்கவும், அந்த இடங்களையும் சுழற்சி முறையில் மாற்றவும் மசோதா வகை செய்கிறது.
போர்க்கொடி
தென்மாநிலங்களின் கவலைகளும் எதிர்க்கட்சிகளின் போர்க்கொடியும்
இந்த மசோதாவிற்கு தமிழ்நாடு உள்ளிட்ட தென்மாநிலங்கள் கடும் எதிர்ப்பு தெரிவித்து வருகின்றன. மக்கள் தொகையை கட்டுப்படுத்திய மாநிலங்களின் பிரதிநிதித்துவம் குறையும் என்றும், மக்கள் தொகை அதிகம் உள்ள வடமாநிலங்களின் ஆதிக்கம் அதிகரிக்கும் என்றும் முதலமைச்சர் மு.க. ஸ்டாலின் எச்சரித்துள்ளார். "திறம்படச் செயல்பட்ட மாநிலங்களுக்குத் தண்டனையா?" என்ற கேள்வியை முன்வைத்து, தமிழகம் முழுவதும் இன்று கருப்புக்கொடி போராட்டம் நடைபெறுகிறது. காங்கிரஸ் உள்ளிட்ட எதிர்க்கட்சிகள் மகளிர் இடஒதுக்கீட்டை ஆதரித்தாலும், அதைத் தொகுதி மறுவரையறையுடன் இணைப்பதை எதிர்க்கின்றன.
சட்டமன்ற மாற்றம்
சட்டமன்றங்கள் மற்றும் யூனியன் பிரதேசங்களில் மாற்றம்
இரண்டாவது மசோதா, ஜம்மு-காஷ்மீர் மற்றும் டெல்லி போன்ற சட்டமன்றங்களைக் கொண்ட யூனியன் பிரதேசங்களின் சட்டங்களில் திருத்தம் கொண்டு வர முயல்கிறது. மூன்றாவது மசோதா, புதிய தொகுதி மறுவரையறை ஆணையத்தை அமைப்பதற்கான அதிகாரத்தை வழங்குகிறது. இந்த ஆணையம் லோக்சபா மற்றும் மாநில சட்டமன்றத் தொகுதிகளை மறுசீரமைக்கும் பணியை மேற்கொள்ளும். 2029 தேர்தலுக்கு முன்பாக இந்த முழுப் பணிகளையும் முடிக்க மத்திய அரசு திட்டமிட்டுள்ளது. நாடாளுமன்றத்தில் இந்த மசோதாக்கள் நிறைவேற மூன்றில் இரண்டு பங்கு பெரும்பான்மை தேவை என்பதால், வரும் மூன்று நாட்களும் இந்திய அரசியலில் மிக முக்கியமானதாகக் கருதப்படுகிறது.