'மக்களோடு மக்களாக சுற்றி பார்த்துவிட்டு செல்கிறேன்' என்று காவல்துறையிடம் கூறிய எளிமையான முதல்வர்
செங்கல்பட்டு மாவட்டம், மாமல்லப்புரத்திற்கு மத்திய பிரதேச முதல்வர் சிவராஜ் சிங் சவுகான் தனது குடும்பத்தோடு நேற்று வருகை தந்துள்ளார். முன்னதாக பலத்த போலீஸ் பாதுகாப்புடன் கடற்கரை கோயில் பகுதிக்கு வந்த அவரை தமிழக அரசு சார்பில் சுற்றுலா அலுவலர் எஸ்.சக்திவேல் பூங்கொடுத்து வரவேற்றார். பிறகு சுற்றுலாத்துறை சார்பில் அவருக்கு மாமல்லப்புரம் வரலாற்று சின்னங்கள் குறித்த சுற்றுலா தகவல் புத்தகம் கொடுக்கப்பட்டது. இதனை பெற்றுக்கொண்ட சிவராஜ் சிங் காவல்துறை அதிகாரிகளை அருகில் அழைத்து "சுற்றுள்ள வந்துள்ள மக்களை தொந்தரவு செய்ய வேண்டாம். மக்களோடு மக்களாகவே நான் சுற்றிப்பார்த்து விட்டு செல்கின்றேன்" என்று கூறியுள்ளார். பிறகு அவர் மாமல்லபுரம் கடற்கரை கோயில் வளாகத்திற்குள் சென்று, பல்லவ மன்னர்களால் வடிவமைக்கப்பட்ட எழில்மிகு கோயில் தோற்றத்தை கண்டு ரசித்தார்.
சுற்றுலா வந்த சில மத்திய பிரதேச மாநில மக்களுடன் செல்பி எடுத்துக்கொண்ட முதல்வர் சிவராஜ் சிங்
இதனைத் தொடர்ந்து, அவருடன் இருந்த மாமல்லபுர சுற்றுலா வழிகாட்டி காதர் பாஷா என்பவர், அங்குள்ள சிற்பங்கள் குறித்தும், கடலோரத்தில் பல ஆண்டுகளுக்கு முன்னர் எவ்வாறு உருவாக்கப்பட்டது. உப்பு காற்றில் சிற்பங்கள் மற்றும் கோயில்கள் பாதிப்படையாமல் எவ்வாறு தொல்லியல் துறையால் பாதுகாக்கப்பட்டு வருகிறது என்பது போன்றவைகளை அவருக்கும் அவர் குடும்பத்தினருக்கும் எடுத்துரைத்தார். இறுதியாக சிவராஜ் சிங் அவர்கள் தனது குடும்பத்துடன் புகைப்படங்களை எடுத்துக்கொண்டார். அப்போது அங்கு வந்த மத்திய பிரதேச சுற்றுலா பயணிகள் சிலர் அவர் அருகில் சென்று செல்பி எடுத்துக்கொண்டனர். அவரும் அவர்களுக்கு அனுமதி அளித்து, தனது மாநில மக்களை சந்தோஷபடுத்தினார். இவர் வருகையையொட்டி அங்குள்ள பகுதிகளில் போலீஸ் துணை சூப்பிரண்டு ஜெகதீஸ்வரன் தலைமையில் பல போலீஸ் பாதுகாப்பு பணியில் ஈடுபட்டிருந்தனர்.என்பது குறிப்பிட்டத்தக்கது.
