டிட்வா புயல் கோரத் தாண்டவம்: டெல்டாவில் 1.35 லட்சம் ஏக்கர் பயிர்கள் நீரில் மூழ்கின
செய்தி முன்னோட்டம்
டிட்வா புயலின் தாக்கத்தால் தமிழ்நாடு முழுவதும் கனமழை கொட்டி வருகிறது. டெல்டா மாவட்டங்களான நாகப்பட்டினம், மயிலாடுதுறை, தஞ்சாவூர் மற்றும் திருவாரூரில் பெய்த தொடர் மழையால் சுமார் 1.35 லட்சம் ஏக்கர் நெற்பயிர்கள் நீரில் மூழ்கின. மேலும், கடல் சீற்றம் காரணமாக ஒரு லட்சத்துக்கும் மேற்பட்ட மீனவர்கள் கடலுக்குச் செல்லவில்லை. ராமேஸ்வரம் தீவுப் பகுதியில் கடந்த இரு நாட்களாகக் கனமழை பெய்து வருகிறது. பலத்த காற்று மணிக்கு 55 முதல் 60 கிமீ வேகத்தில் வீசியதால், பாம்பன் பாலத்தில் இரண்டாவது நாளாக ரயில் போக்குவரத்து நிறுத்தப்பட்டது. ராமேஸ்வரத்தில் விசுவாச நகர் உள்ளிட்ட குடியிருப்புகளை மழைநீர் சூழ்ந்து, மக்களின் இயல்பு வாழ்க்கை முற்றிலும் பாதிக்கப்பட்டுள்ளது. வேதாரண்யம் பகுதியில் சுமார் 9,000 ஏக்கர் உப்பளங்கள் தண்ணீரில் மூழ்கின.
ரத்து
விமான சேவைகள் ரத்து
புயல் காரணமாக விமான சேவைகள் பெரிய அளவில் பாதிக்கப்பட்டன. திருச்சியில் இருந்து புறப்படும் 10 விமான சேவைகள் ரத்து செய்யப்பட்டன. மதுரை விமான நிலையத்தில் 16 உள்நாட்டுச் சேவைகளில் 12 ரத்து செய்யப்பட்டது. மேலும், தூத்துக்குடி-சென்னை, தூத்துக்குடி-பெங்களூரு வழித்தடங்களில் 7 விமான சேவைகள் ரத்து செய்யப்பட்டன. கடலூர், விழுப்புரம், நெல்லை, தூத்துக்குடி உள்ளிட்ட பல மாவட்டங்களிலும் பரவலாக மழை பெய்துள்ளது. திண்டுக்கல் மாவட்டம் கொடைக்கானலில், தொடர் மழையால் மோயர் பாயிண்ட், குணா குகை உள்ளிட்டச் சுற்றுலாத் தளங்கள் அனைத்தும் மூடப்பட்டுள்ளன. மேலும், புயலின் எதிரொலியாகத் திருச்செந்தூர் கோவில் அருகே கடல் உள்வாங்கி காணப்பட்டதும் குறிப்பிடத்தக்கது.