கரூர் கூட்ட நெரிசல் சோகம்: உயிரிழந்தோர் குடும்பங்களுக்கு ரூ.1 கோடி நிவாரணம் வழங்குவதாக காங்கிரஸ் கட்சி அறிவிப்பு
செய்தி முன்னோட்டம்
கரூர் மாவட்டத்தில் தமிழக வெற்றிக் கழகத்தின் (தவெக) தலைவர் விஜயின் பேரணியில் ஏற்பட்ட கூட்ட நெரிசலில் 40 பேர் உயிரிழந்த துயரச் சம்பவத்தையடுத்து, காங்கிரஸ் கட்சித் தலைமை உயிரிழந்தோரின் குடும்பங்களுக்குப் பெரும் நிதியுதவியை அறிவித்துள்ளது. தமிழ்நாடு காங்கிரஸ் கமிட்டியின் தலைவர் செல்வப்பெருந்தகை ஞாயிற்றுற்கிழமை (செப்டம்பர் 28) வெளியிட்டுள்ள அறிவிப்பில், இந்தச் சோகச் சம்பவத்தில் உயிரிழந்தோரின் குடும்பங்களுக்கு காங்கிரஸ் கட்சி சார்பில் மொத்தமாக ரூ.1 கோடி நிவாரணத் தொகை பகிர்ந்தளிக்கப்படும் என்று அறிவித்துள்ளார். இந்தப் பெரும் நிதியுதவி, உயிரிழந்த ஒவ்வொரு குடும்பத்திற்கும் கணிசமான ஆதரவை வழங்கும் என்று எதிர்பார்க்கப்படுகிறது.
இரங்கல்
உயிரிழந்தோரின் குடும்பத்திற்கு இரங்கல்
கரூர் சென்று பாதிக்கப்பட்டவர்களை சந்தித்த காங்கிரஸ் கட்சியின் மாநிலத் தலைவர் செல்வப் பெருந்தகை, இந்தத் துயரச் சம்பவம் குறித்து ஆழ்ந்த இரங்கலைத் தெரிவித்தார். "இந்த எதிர்பாராத இழப்பை ஈடுசெய்ய முடியாது என்றாலும், பாதிக்கப்பட்ட குடும்பங்களின் துயரத்தைப் போக்குவதற்கும், அவர்களின் உடனடித் தேவைகளைப் பூர்த்தி செய்வதற்கும் இந்த உதவிப் பணம் உதவும்," என்று அவர் குறிப்பிட்டார். மேலும், இச்சம்பவம் குறித்துத் தீவிரமான விசாரணை நடத்தப்பட வேண்டும் என்றும், எதிர்காலத்தில் இதுபோன்ற பொது நிகழ்ச்சிகளில் முறையான பாதுகாப்பு ஏற்பாடுகள் உறுதி செய்யப்பட வேண்டும் என்றும் அவர் வலியுறுத்தினார். முன்னதாக, மத்திய அரசு, மாநில அரசு மற்றும் தவெக சார்பிலும் நிதியுதவி அறிவிக்கப்பட்டிருப்பது குறிப்பிடத்தக்கது.