பொள்ளாச்சியில் கல்லூரி மாணவி கத்தியால் குத்தப்பட்டு கொலை
செய்தி முன்னோட்டம்
கோவை மாவட்டம் பொள்ளாச்சி இடையார்பாளையம் பகுதியினை சேர்ந்தவர் சுஜய்(28).
இவருக்கும் கேரளா மாநிலம் பாலக்காடு பகுதியினை சேர்ந்த ரேஷ்மா(25)என்பவருக்கும் கடந்த ஒன்றரை ஆண்டுக்கு முன்னர் திருமணம் நடந்துள்ளது.
திருமணத்திற்கு பின்னர் இவர்கள் பொள்ளாச்சி கெளரி நகரில் உள்ள அடுக்குமாடி குடியிருப்பில் வசித்து வந்துள்ளனர்.
தற்போது ரேஷ்மா கர்ப்பமாக உள்ளதால் பிரசவத்திற்காக தனது தாய்வீட்டிற்கு சென்றுள்ளார்.
இதற்கிடையே நேற்று(மே.,2)இரவு அந்த அடுக்குமாடி குடியிருப்பில் இருந்து இளம்பெண் ஒருவரின் அலறல் சத்தம் கேட்டுள்ளது.
அதனையடுத்து அப்பகுதி மக்கள் அங்குச்சென்று பார்க்கையில் சுஜய் வீட்டில் கல்லூரி மாணவி ஒருவர் கத்திக்குத்து காயங்களுடன் ரத்த வெள்ளத்தில் இறந்து கிடந்துள்ளார்.
இதுகுறித்து காவல்துறைக்கு தகவலளிக்கப்பட்டது.
தகவல் கிடைத்ததன்பேரில், அவர்கள் அங்கு விரைந்துவந்து சடலத்தைமீட்டு பிரேதப்பரிசோதனைக்காக கோவை இஎஸ்ஐ மருத்துவமனைக்கு அனுப்பிவைத்தனர்.
கொலை
தனிப்படை போலீசார் கேரளாவிற்கு விரைவு
பின்னர் இதுகுறித்து நடத்தப்பட்ட விசாரணையில், இறந்து கிடந்த கல்லூரி மாணவி சுப்புலட்சுமி(20) தகவல் தொழில்நுட்பம் 3ம் ஆண்டு படித்து வந்துள்ளார் என்று தெரியவந்துள்ளது.
மேலும், திருமணத்திற்கு முன்னர் ஒரே பகுதியில் வசித்து வந்துள்ள சுஜய்க்கும் இந்த பெண்ணிற்கும் காதல் ஏற்பட்டுள்ளது.
இந்நிலையில் நேற்று இரவு இந்த மாணவி சுஜய் வீட்டிற்கு வந்துள்ளார். தன்னை காதலித்து விட்டு வேறு ஒரு பெண்ணை திருமணம் செய்து கொண்டது ஏன் என இவர்கள் மத்தியில் வாக்குவாதம் ஏற்பட்டிருக்கலாம்.
அந்த ஆத்திரத்தில் சுஜய் அப்பெண்ணை கத்தியால் குத்திவிட்டு தப்பித்திருக்கலாம் என்னும் கோணத்தில் தற்போது போலீசார் விசாரணை நடத்தி வருகிறார்கள்.
இதனையடுத்து கொலை செய்துவிட்டு தப்பித்து ஓடிய சுஜயினை பிடிக்க தனிப்படை போலீசார் கேரளாவிற்கு விரைந்துள்ளார்கள் என்பது குறிப்பிடத்தக்கது.