ஜெயிலர் 2 படத்தில் சந்தானம் நடித்த காட்சிகள் நீக்கமா? வெளியான படப்பிடிப்பு வீடியோ
செய்தி முன்னோட்டம்
நெல்சன் திலீப்குமார் இயக்கத்தில் சூப்பர் ஸ்டார் ரஜினிகாந்த் நடிப்பில் கடந்த அக்டோபர் 15 அன்று திரையரங்குகளில் வெளியாகி வசூல் சாதனை படைத்து வரும் ஜெயிலர் 2 திரைப்படத்தில், முன்னணி நகைச்சுவை நடிகர் சந்தானம் ஒரு முக்கிய கதாபாத்திரத்தில் நடித்திருந்ததாகவும், ஆனால் படத்தின் நீளம் அதிகமாக இருந்த காரணத்தால் அவரது காட்சிகள் முழுமையாக நீக்கப்பட்டதாகவும் தகவல்கள் வெளியாகியுள்ளன. படப்பிடிப்பின் போது படக்குழுவினருடன் சந்தானம் கலந்துகொண்ட கொண்டாட்டக் காணொளி ஒன்று இணையத்தில் வெளியாகிப் பரவி வரும் நிலையில், இந்தத் தகவல் ரசிகர்கள் மத்தியில் பெரும் விவாதத்தை ஏற்படுத்தியுள்ளது.
நீக்கப்பட்ட காட்சி
கல்பக் குடும்ப பிறந்தநாள் விழா
திரைப்பட வட்டாரங்களில் இருந்து கசிந்துள்ள தகவலின்படி, படத்தில் வரும் கல்பக் குடும்பத்தினரின் பிரம்மாண்ட பிறந்தநாள் விழாவை நடத்தும் நிகழ்வு ஒருங்கிணைப்பாளராக நடிகர் சந்தானம் நடித்திருந்ததாகக் கூறப்படுகிறது.
அந்த விழாவில் முத்துவேல் பாண்டியன் (ரஜினிகாந்த்) தனது திட்டத்திற்காக சந்தானத்தை மடக்கி, தங்களுக்குத் தேவையான பணிகளை அவரிடம் இருந்து மிரட்டி வாங்குவது போலவும், முழுக்க முழுக்க நகைச்சுவை நிறைந்த காட்சியாகவும் அது படமாக்கப்பட்டதாகத் தெரிகிறது.
எனினும், திரையரங்க வெளியீட்டின் போது படத்தின் கால அளவு மிக அதிகமாக நீண்டு சென்றதால், ஒட்டுமொத்தக் கதையோட்டத்திற்கு பாதிப்பு ஏற்படாத வகையில் சந்தானம் நடித்த முழுமையான அந்தப் பகுதியைத் திரைப்படத்திலிருந்து படக்குழுவினர் நீக்கியுள்ளதாகத் தெரியவந்துள்ளது.
நடிகர் சந்தானம்
படக்குழு கொண்டாட்ட காணொளி
முன்னதாக சந்தானம் நடித்ததாக வெளியான தகவல்களுக்குப் போதிய ஆதாரங்கள் இல்லாமல் இருந்த நிலையில், தற்போது படப்பிடிப்புத் தளத்தில் எடுக்கப்பட்ட வீடியோ ஒன்று சமூக வலைதளங்களில் வெளியாகி அனைவரின் கவனத்தையும் ஈர்த்துள்ளது.
அந்த வீடியோவில் ரஜினிகாந்த், இயக்குநர் நெல்சன் திலீப்குமார், எஸ்.ஜே. சூர்யா, வித்யா பாலன் ஆகியோருடன் நடிகர் சந்தானமும் இணைந்து மகிழ்ச்சியாகக் கொண்டாட்டத்தில் ஈடுபட்டிருப்பது பதிவாகியுள்ளது.
இதன் மூலம் அவர் இப்படத்தில் நடித்தது உண்மைதான் என்பது உறுதியாகியுள்ள நிலையில், ஓடிடி தளத்தில் வெளியாகும் போது நீக்கப்பட்ட இந்தக் காட்சிகள் கூடுதலாக சேர்க்கப்படுமா அல்லது யூடியூப் தளத்தில் தனியாக வெளியிடப்படுமா என்பதை அறிய ரசிகர்கள் ஆவலுடன் காத்திருக்கின்றனர்.