தலைவர் 173; தனுஷ் இயக்கத்தில் ரஜினிகாந்த் நடிக்க பேச்சுவார்த்தையா? புதிய தகவலால் ரசிகர்கள் உற்சாகம்
செய்தி முன்னோட்டம்
நடிகர் ரஜினிகாந்த் நடிப்பில், கமல்ஹாசனின் ராஜ் கமல் ஃபிலிம்ஸ் இன்டர்நேஷனல் தயாரிப்பில் உருவாகவிருந்த தலைவர் 173 திரைப்படம், இயக்குநர் சுந்தர் சி திடீரென விலகியதையடுத்து மீண்டும் கவனம் பெற்றுள்ளது. தற்போது, இந்தப் படத்தை ரஜினிகாந்தின் முன்னாள் மருமகனும், பிரபல நடிகரும், இயக்குனருமான தனுஷ் இயக்க வாய்ப்புள்ளதாகத் தகவல் வெளியாகியுள்ளது. சுந்தர் சி விலகியது குறித்துப் பேசிய தயாரிப்பாளர் கமல்ஹாசன், "சுந்தர் சி தனது விலகலுக்கானக் காரணத்தை ஒரு பத்திரிகைச் செய்திக் குறிப்பு மூலம் விளக்கியுள்ளார். என் நட்சத்திரமான ரஜினிகாந்திற்குத் திருப்தி அளிக்கும் கதையைத் தேடுவதுதான் ஒரு தயாரிப்பாளராக எனது வேலை. தரமானக் கதையை இறுதி செய்யும் பணியில் தற்போது ஈடுபட்டுள்ளோம்." என்று தெரிவித்தார்.
இளம் இயக்குனர்
கதை நன்றாக இருந்தால் இளம் இயக்குனருக்கும் வாய்ப்பு
மேலும், ஒரு இளம் இயக்குநரைக் கூடக் கருத்தில் கொள்ளலாம் என்றும், எதிர்பாராததை எதிர்பாருங்கள் என்றும் அவர் கூறியது ரசிகர்களிடையே எதிர்பார்ப்பை ஏற்படுத்தியுள்ளது. இந்நிலையில் தான், நடிகரும் இயக்குனருமான தனுஷ் ரஜினிகாந்த் படத்தை இயக்க வாய்ப்புள்ளதாக கோலிவுட் வட்டாரங்களில் இருந்து உறுதிப்படுத்தப்படாத தகவல் கசிந்துள்ளது. முன்னதாக, இயக்குனர் சுந்தர் சி, சில நாட்களுக்கு முன் தவிர்க்க முடியாத மற்றும் எதிர்பாராத சூழ்நிலைகள் காரணமாக இந்தப் புகழ்பெற்றத் திட்டத்திலிருந்து விலகுவதாக அறிவித்தார். ரஜினிகாந்த் மற்றும் கமல்ஹாசனுடன் இணைந்து பணியாற்றுவது தனது கனவு என்றும், அவர்களுக்குத் தனது மனமார்ந்த நன்றியையும் தெரிவித்திருந்தார். ரஜினிகாந்த் மற்றும் கமல்ஹாசன் இணைந்து 46 ஆண்டுகளுக்குப் பிறகு மீண்டும் இணையும் இந்தப் படம், பொங்கல் 2027 அன்று வெளியாகும் என அறிவிக்கப்பட்டிருந்தது குறிப்பிடத்தக்கது.