ஆஸ்கார் விருது விழாவில் பேசமுடியாமல் போனது குறித்து மனம் திறந்த குனீத் மோங்கா
ஆஸ்கார் விழாவில், 'தி எலிஃபண்ட் விஸ்பரர்ஸ்' வெற்றி பெற்ற பிறகு, மேடையில் பேச அனுமதிக்கப்படாதது குறித்து தயாரிப்பாளர் குனீத் மோங்கா மனம் திறந்துள்ளார். விருது விழாவின் போது, சிறந்த ஆவணப்பட குறும்படத்திற்கான அகாடமி விருதை கையில் பிடித்தபடி குனீத், இயக்குநர் கார்த்திகி கோன்சால்வ்ஸ் தனது உரையை முடிப்பதற்காக காத்திருந்தார். கார்த்திகி தனது உரையை முடித்தது, மைக் முன்னாள் பேச வந்தபோது, நேரம் முடிவடைந்தது என்பது போல தெரிவிக்கப்பட்டு, அவர் உரையாற்ற முடியாமல் போனது. அந்த வீடியோ இணையத்தில் வைரலானது. பலர் இது மேலைநாட்டு மக்களின் ஒடுக்கும் மனப்பான்மை என்பது போலக்கூட சாடினர். இந்த விவகாரம் குறித்து தற்போது பேசியுள்ளார் குனீத் மோங்கா.
"இந்திய தயாரிப்பில் இந்தியாவின் முதல் ஆஸ்கார்"
ஆஸ்கார் விருது வென்ற பிறகு, மும்பைக்கு திரும்பிய அவரிடம், விருது மேடையில் பேசமுடியாமல் போனது குறித்து பல ஊடகங்கள் கேள்வி எழுப்பின. அதற்கு பதில் அளித்த அவர், "எனது ஆஸ்கார் விருது உரையை நிகழ்த்த எனக்கு வாய்ப்பு கிடைக்கவில்லை. என் முகத்தில் ஒரு அதிர்ச்சி. இந்திய தயாரிப்பில் இந்தியாவின் முதல் ஆஸ்கார் விருது இது என்று நான் சொல்ல விரும்பினேன். இவ்வளவு தூரம் வந்து, நான் இதை சொல்லாமல் இருக்கக்கூடாது என என் இதயம் படபடக்க ஆரம்பித்தது," என்று அவர் கூறினார். ஆஸ்கார் விருது வென்ற இந்த ஆவணப்படத்தின் நாயகர்களான பொம்மன் மற்றும் பெல்லி இருவரையும் இரு தினங்களுக்கு முன்னர், தலைமைச்செயலகத்திற்கு அழைத்து கௌரவித்தார் தமிழக முதல்வர் என்பது குறிப்பிடத்தக்கது.
