அசோக் செல்வனின் 'அன்பில் அவன்' ஓடிடி வெளியீட்டு தேதி அறிவிப்பு: எங்கு, எப்போது பார்க்கலாம்
செய்தி முன்னோட்டம்
நடிகர் அசோக் செல்வன் மற்றும் ப்ரீத்தி முகுந்தன் நடிப்பில் காதல், குடும்ப உணர்வுகள் மற்றும் மர்மங்கள் நிறைந்த படமாக உருவாகி திரையரங்குகளில் வரவேற்பைப் பெற்ற 'அன்பில் அவன்' திரைப்படத்தின் ஓடிடி வெளியீட்டுத் தேதி அதிகாரப்பூர்வமாக அறிவிக்கப்பட்டுள்ளது. கடந்த அக்டோபர் 2 அன்று திரையரங்குகளில் வெளியான இத்திரைப்படம், வரும் நவம்பர் 13 முதல் சோனிலிவ் ஓடிடி தளத்தில் தமிழ், தெலுங்கு, மலையாளம், கன்னடம் மற்றும் ஹிந்தி ஆகிய ஐந்து மொழிகளில் வெளியாகவுள்ளது. அறிமுக இயக்குநர் கார்த்திகேயன் இயக்கியுள்ள இப்படத்தை ஐங்கரன் இன்டர்நேஷனல் மற்றும் ஹேப்பி ஹை பிக்சர்ஸ் நிறுவனங்கள் இணைந்து தயாரித்துள்ளன.
கதைகளம்
காதல் தம்பதியை சூழும் மர்மங்களும் அச்சுறுத்தல்களும்
காதலித்துத் திருமணம் செய்து கொண்ட இளம் தம்பதி தங்கள் வாழ்க்கையை மகிழ்ச்சியாகத் தொடங்குகின்றனர்.
தனது மனைவியின் நீண்ட நாள் ஆசையை நிறைவேற்றும் நோக்கில், மலைப்பிரதேசத்தில் அழகான தனி வீடு ஒன்றை அசோக் செல்வனின் கதாபாத்திரம் வாங்குகிறது.
ஆனால், அந்தப் புதிய வீட்டிற்குள் குடியேறிய பிறகு ஏற்படும் விசித்திரமான நிகழ்வுகளும் மர்ம அச்சுறுத்தல்களும் அவர்களது அமைதியான வாழ்க்கையைப் புரட்டிப் போடுகின்றன.
இந்தச் சவால்களிலிருந்து அத்தம்பதி எவ்வாறு தப்பித்துத் தங்கள் வாழ்க்கையைக் காப்பாற்றிக் கொள்கிறார்கள் என்பதே விறுவிறுப்பான திரைக்கதையாக அமைக்கப்பட்டுள்ளது.
கதிர், பாலு, ரேவதி மற்றும் டெல்லி கணேஷ் உள்ளிட்டோர் முக்கிய வேடங்களில் நடித்துள்ளனர்.
70 அடி உயரம்
டூப் இல்லாமல் குதித்த அசோக் செல்வன்
இத்திரைப்படத்தில் இடம்பெற்றுள்ள தீவிரமான ஆக்ஷன் காட்சிகளில் அசோக் செல்வன் காட்டிய அர்ப்பணிப்பு படத்திற்குப் கூடுதல் பலம் சேர்த்துள்ளது.
குறிப்பாக, சண்டைக் காட்சிகளின் போது டூப் எதுவும் பயன்படுத்தாமல் சுமார் எழுபது அடி உயரத்தில் இருந்து தண்ணீரில் குதித்து அவர் துணிச்சலான ஆக்ஷன் காட்சியை நிகழ்த்தியுள்ளார். இந்த ஆபத்தான சண்டைக் காட்சி ரசிகர்களிடையே பரவலான கவனத்தைப் பெற்றது.
காதல், மர்மம் மற்றும் த்ரில்லர் அம்சங்கள் சரிவிகிதத்தில் கலந்த இந்தப் படைப்பை, வரும் நவம்பர் 13 முதல் உலகெங்கும் உள்ள ரசிகர்கள் தங்கள் இல்லங்களிலிருந்தே டிஜிட்டல் திரையில் கண்டு ரசிக்கலாம்.