பெட்ரோல் ஏற்றுமதி வரி 5 மடங்கு உயர்வு! டீசலுக்கு சலுகை! மத்திய அரசு புதிய அறிவிப்பு

எழுதியவர் Sekar Chinnappan

Oct 16, 2026

06:26 pm

செய்தி முன்னோட்டம்

சர்வதேச சந்தையில் கச்சா எண்ணெய் மற்றும் சுத்திகரிக்கப்பட்ட எரிபொருட்களின் விலையில் ஏற்படும் தீவிர ஏற்ற இறக்கங்களைக் கருத்தில் கொண்டு, பெட்ரோல், டீசல் மற்றும் விமான எரிபொருள் ஆகியவற்றின் ஏற்றுமதி வரிகளை மத்திய அரசு மாற்றி அமைத்துள்ளது. மத்திய நிதி அமைச்சகம் வெளியிட்டுள்ள புதிய உத்தரவின்படி, பெட்ரோல் ஏற்றுமதி மீதான சிறப்பு கூடுதல் கலால் வரி கணிசமாக உயர்த்தப்பட்டுள்ளது. அதேவேளையில், டீசல் ஏற்றுமதிக்கான வரி பெருமளவில் குறைக்கப்பட்டுள்ளது. இப்புதிய ஏற்றுமதி வரி விகிதங்கள் அக்டோபர் 16, 2026 முதல் உடனடியாக அமலுக்கு வந்துள்ளன.

வரி விவரம்

பெட்ரோல், டீசல் மற்றும் விமான எரிபொருள் வரி விவரம்

மத்திய அரசின் புதிய திருத்தங்களின்படி, பெட்ரோல் ஏற்றுமதி மீதான சிறப்பு கூடுதல் கலால் வரி லிட்டருக்கு ₹0.50-லிருந்து ஐந்து மடங்கு உயர்த்தப்பட்டு ₹2.50 ஆக நிர்ணயிக்கப்பட்டுள்ளது.

அதேநேரத்தில், டீசல் ஏற்றுமதியாளர்களுக்கு நிவாரணம் அளிக்கும் வகையில், அதன் மீதான ஏற்றுமதி வரி லிட்டருக்கு ₹16-லிருந்து ₹7.50 குறைக்கப்பட்டு ₹8.50 ஆகக் கொண்டு வரப்பட்டுள்ளது.

விமானப் போக்குவரத்துக்கான விமான எரிபொருள் ஏற்றுமதி வரி எந்தவித மாற்றமுமின்றி லிட்டருக்கு ₹10.50 ஆகத் தொடர்கிறது.

சாலை மற்றும் உள்கட்டமைப்பு வரி தொடர்ந்து பூஜ்ஜியமாகவே வைக்கப்பட்டுள்ளது.

மதிப்பாய்வு

இரண்டு வாரங்களுக்கு ஒருமுறை மதிப்பாய்வு செய்வதன் பின்னணி

மேற்கு ஆசியப் பிராந்தியத்தில் ஏற்பட்ட போர் பதற்றங்கள் மற்றும் சர்வதேச கச்சா எண்ணெய் விலையேற்றத்தைக் தொடர்ந்து, உள்நாட்டில் எரிபொருள் தட்டுப்பாடு ஏற்படுவதைத் தடுக்கவும், உள்நாட்டு விநியோகத்தை உறுதி செய்யவும் மார்ச் 27, 2026 அன்று இந்தச் சிறப்பு ஏற்றுமதி வரிகளை மத்திய அரசு அறிமுகப்படுத்தியது.

சர்வதேச சந்தையில் நிலவும் கச்சா எண்ணெய் மற்றும் சுத்திகரிக்கப்பட்ட எரிபொருட்களின் சராசரி விலையை கணக்கில் கொண்டு, அரசு ஒவ்வொரு இரண்டு வாரங்களுக்கும் ஒருமுறை இந்த ஏற்றுமதி வரிகளைத் தொடர்ந்து மதிப்பாய்வு செய்து மாற்றி அமைத்து வருகிறது.

தாக்கம்

உள்நாட்டு சந்தை மற்றும் சுத்திகரிப்பு நிறுவனங்கள் மீதான தாக்கம்

மத்திய அரசின் இப்புதிய வரி மாற்றங்களின் மூலம், தனியார் சுத்திகரிப்பு நிறுவனங்கள் பெட்ரோலை அதிக அளவில் வெளிநாடுகளுக்கு ஏற்றுமதி செய்வதைக் கட்டுப்படுத்தி, உள்நாட்டு சந்தையில் அதன் இருப்பை அதிகரிக்க முடியும்.

அதேநேரத்தில், சர்வதேச சந்தையில் டீசலுக்கான தேவை அதிகரித்துள்ள சூழலில், டீசல் ஏற்றுமதி வரியைக் குறைத்துள்ளதன் மூலம் இந்தியச் சுத்திகரிப்பு நிறுவனங்களின் ஏற்றுமதி வருவாய் உயரும் என எதிர்பார்க்கப்படுகிறது.

உள்நாட்டு சந்தையில் பெட்ரோல் மற்றும் டீசல் சில்லறை விற்பனை விலையில் இதனால் எந்தவித மாற்றமும் இருக்காது என்பது குறிப்பிடத்தக்கது.