செங்கல்லுக்கு செங்கல் உடைத்தெறிவோம்: சர்வதேச குற்றவியல் நீதிமன்றம் மீது அமெரிக்கா அதிரடித் தடை
செய்தி முன்னோட்டம்
நெதர்லாந்தின் தி ஹேக் நகரைத் தலைமையிடமாகக் கொண்டு செயல்படும் சர்வதேச குற்றவியல் நீதிமன்றத்தின் (International Criminal Court - ICC) முன்னாள் நீதிபதியான தென்னாப்பிரிக்க சட்ட நிபுணர் நவி பிள்ளைக்கு அமைதிக்கான நோபல் பரிசு அறிவிக்கப்பட்ட சில மணி நேரங்களிலேயே, அந்நீதிமன்றத்தின் மீது அமெரிக்கா அதிகாரப்பூர்வமாகப் புதிய பொருளாதாரத் தடைகளை விதித்துள்ளது. போர் குற்றங்களை விசாரிக்கும் நீதிமன்றத்தின் அதிகார எல்லை தொடர்பாக எழுந்துள்ள மோதல் தீவிரமடைந்துள்ள நிலையில், சர்வதேச குற்றவியல் நீதிமன்றத்தின் செயல்பாடுகளை முடக்கும் வகையில் இந்த அதிரடி நடவடிக்கை எடுக்கப்பட்டுள்ளது.
நீதிமன்றத்தை அடியோடு தகர்ப்போம்
மார்கோ ரூபியோ எச்சரிக்கை
இது தொடர்பாகப் பேசிய அமெரிக்க வெளியுறவுத்துறை அமைச்சர் மார்கோ ரூபியோ, "சர்வதேச குற்றவியல் நீதிமன்றம் தனது அச்சுறுத்தல்களை நிறுத்திக்கொள்ள வேண்டும்".
"இல்லையெனில் நாங்கள் அந்த நீதிமன்றத்தின் இருப்பையே முடிவுக்குக் கொண்டுவருவோம்" என்று எச்சரித்துள்ளார்.
நீதிமன்றம் அமெரிக்க அதிகாரிகளைக் குறிவைப்பதாகவும், நாட்டின் இறையாண்மையைச் சீர்குலைப்பதாகவும் அவர் குற்றம்சாட்டினார்.
அமெரிக்க குடிமக்களை அந்த நீதிமன்றம் விசாரிப்பதை அதிபர் டொனால்ட் டிரம்ப் ஒருபோதும் அனுமதிக்க மாட்டார் என்றும் அவர் குறிப்பிட்டார்.
எனினும், வாஷிங்டனின் கவலைகளைக் களைந்து தீர்வு காண உறுப்பினர் நாடுகளுக்கு அவகாசம் அளிக்கும் வகையில் ஆறு மாத கால விலக்கு நடைமுறைப்படுத்தப்பட்டுள்ளதாகத் தெரிவிக்கப்பட்டுள்ளது.
சர்வதேச அளவில் கண்டனம்
நவி பிள்ளை நோபல் வென்ற பின்னணி
சர்வதேச நீதித்துறையில் ஆற்றிய பணிகளுக்காக, தென்னாப்பிரிக்காவைச் சேர்ந்த 85 வயதான நவி பிள்ளைக்கு அமைதிக்கான நோபல் பரிசு அறிவிக்கப்பட்டுள்ளது.
இவர் ருவாண்டா இனப்படுகொலை விசாரணை, சர்வதேச குற்றவியல் நீதிமன்றப் பணி மற்றும் காசா தொடர்பான ஐநா ஆணையம் ஆகியவற்றில் ஆற்றிய பங்களிப்பு குறிப்பிடத்தக்கது.
இதனிடையே, ஐசிசி மீதான அமெரிக்காவின் தடைகளுக்கு சர்வதேச அளவில் கடும் எதிர்ப்பு கிளம்பியுள்ளது.
ஐசிசி நிர்வாகம் இதைச் சர்வதேச சட்டத்தின் மீதான தாக்குதல் எனக் கூறியுள்ளதுடன், ஐநா பொதுச்செயலாளர் அந்தோனியோ குத்தேரஸ் நீதித்துறைக்கு ஏற்பட்ட பின்னடைவு என அதிருப்தி தெரிவித்துள்ளார்.
ஐரோப்பிய ஒன்றியம், கனடா உள்ளிட்ட பல நாடுகள் எதிர்ப்பு தெரிவித்த நிலையில், இஸ்ரேல் பிரதமர் பெஞ்சமின் நெதன்யாகு அமெரிக்காவின் முடிவை வரவேற்றுள்ளார்.