உயிரிழப்பு 800-ஐ கடந்தநிலையில் நேபாளத்தில் மீண்டும் வெள்ள அபாய எச்சரிக்கை

எழுதியவர் Venkatalakshmi V

Aug 31, 2026

07:52 am

செய்தி முன்னோட்டம்

நேபாளம் மற்றும் திபெத் எல்லைப் பகுதிகளில் கடந்த ஆகஸ்ட் 26 அன்று ஏற்பட்ட பேரழிவு வெள்ளத்தைத் தொடர்ந்து, போதேகோஷி ஆற்றில் ஞாயிற்றுக்கிழமை மீண்டும் நீர்மட்டம் கணிசமாக உயர்ந்ததால் மக்கள் உடனடியாக பாதுகாப்பான இடங்களுக்குச் செல்லுமாறு நேபாள அரசு புதிய அவசர எச்சரிக்கையை விடுத்துள்ளது. இந்தத் திடீர் வெள்ள பேரழிவில் நேபாளம் மற்றும் திபெத் எல்லைப் பகுதிகளில் உயிரிழந்தோரின் எண்ணிக்கை 800-ஐக் கடந்துள்ளது. மக்கள் தங்களது தொலைபேசிகளில் தொடர்ச்சியாக வரும் அவசர வெள்ள அபாய எச்சரிக்கை மெசேஜ்களால் பெரும் அச்சத்திற்கும் மன உளைச்சலுக்கும் ஆளாகியுள்ளனர்.

புள்ளிவிவரங்கள்

தற்போதைய பேரழிவு புள்ளிவிவரங்கள் (ஞாயிற்றுக்கிழமை நிலவரம்)

நேபாளத்தில் உயிரிழந்தோரின் எண்ணிக்கை 788 ஆக அதிகரித்துள்ளது. மேலும் 2,502 பேரை காணவில்லை.

சீனா (திபெத்) பகுதியில் 16 பேர் உயிரிழந்துள்ளனர்; 546 பேர் காணாமல் போயுள்ளனர்.

திபெத் பகுதியில் மட்டும் 100-க்கும் மேற்பட்ட நேபாளிகள் உட்பட 261 வெளிநாட்டவர்கள் காணாமல் போயுள்ளனர்.

20,000-க்கும் மேற்பட்ட மக்களுக்கு மின்சாரம் வழங்கும் பிரதான நீர்மின் நிலையம் கடுமையாக சேதமடைந்துள்ளதால் பல மாவட்டங்கள் இருளில் மூழ்கியுள்ளன.

வெள்ள எச்சரிக்கை

மீண்டும் வெள்ள எச்சரிக்கை விடுக்கப்பட்டது ஏன்?

நேபாள தேசிய பேரிடர் அபாயக் குறைப்பு மற்றும் மேலாண்மை ஆணையத்தின் (NDRRMA) தலைமை நிர்வாகி தரம் ராஜ் உப்ரேட்டி கூறுகையில், "மேல் ஆற்றுப் பகுதியில் நீர்வரத்து அதிகரித்துள்ளதாக சீனா அளித்த தகவலின் பேரிலேயே எச்சரிக்கை விடுக்கப்பட்டது" எனக் குறிப்பிட்டார்.

மலையுச்சியில் புதிதாக உருவான செயற்கை ஏரியின் பெரும்பகுதி நீர் வடிந்துவிட்ட போதிலும், 5.6 கிலோமீட்டர் தொலைவில் உள்ள ஒரு பள்ளத்தாக்கு பள்ளத்தில் இன்னும் 14 லட்சம் கன மீட்டர் நீர் (370 மில்லியன் கேலன்) தேங்கியுள்ளது. இது எப்போது வேண்டுமானாலும் உடையலாம் என்பதால் தொடர் கண்காணிப்பு தேவைப்படுவதாகத் தெரிவிக்கப்பட்டுள்ளது.

பனிப்பாறை சரிவு

5.2 நிலநடுக்கத்திற்கு இணையான பனிப்பாறை சரிவு

ஆகஸ்ட் 26 அன்று இமயமலை பகுதியில் ஏற்பட்ட இந்த பேரிடருக்குப் பனிப்பாறை மற்றும் பாறைச் சரிவே காரணம் என செயற்கைக்கோள் படங்களை ஆய்வு செய்த அதிகாரிகள் தெரிவித்துள்ளனர்.

பாறைகளுடன் சேர்ந்து பிரம்மாண்ட பனிப்பாறை சரிந்து விழுந்த வேகம், நில அதிர்வுமானியில் 5.2 ரிக்டர் அளவிலான நிலநடுக்கமாகப் பதிவாகியுள்ளது.

இந்த அதிர்வாலும் உருகிய பனிநீராலும் எழுந்த ராட்சத அலையே ஆறுகளில் பாய்ந்து கிராமங்களைச் சூறையாடியுள்ளது.