ஐபிஎல் 2027-ல் விளையாடுவேனா? டிசம்பரில் முடிவை அறிவிக்கும் எம்.எஸ். தோனி
செய்தி முன்னோட்டம்
இந்தியன் பிரீமியர் லீக் 2027 கிரிக்கெட் தொடரில் சென்னை சூப்பர் கிங்ஸ் அணிக்காகக் களமிறங்குவது தொடர்பாக வரும் டிசம்பர் மாதத்திற்குள் உரிய முடிவை எடுக்கவுள்ளதாக முன்னாள் கேப்டன் எம்.எஸ். தோனி தெரிவித்துள்ளார். 45 வயதாகும் மூத்த வீரரான தோனி, தசைப்பிடிப்பு காயம் காரணமாக கடந்த ஐபிஎல் தொடரில் ஒரு போட்டியில் கூட விளையாட முடியாமல் போன நிலையில், அடுத்த சீசனில் விளையாடுவாரா அல்லது ஓய்வு பெறுவாரா என்ற விவாதம் கிரிக்கெட் வட்டாரங்களில் தொடர்ந்து நீடித்து வருகிறது. இந்நிலையில், பெங்களூருவில் நடைபெற்ற சுகாதார விழிப்புணர்வு நிகழ்ச்சியில் கலந்து கொண்டு பேசிய தோனி, மருத்துவப் பரிசோதனை அறிக்கைகள் மற்றும் உடல் வலிமையை ஆய்வு செய்த பின்னரே அடுத்த சீசனில் ஆடுவது குறித்து முடிவெடுக்கப்படும் எனத் தெரிவித்துள்ளார்.
மருத்துவ பரிசோதனை
மருத்துவப் பரிசோதனைக்குப் பிறகே முடிவு
நிகழ்ச்சியில் மருத்துவர்கள் மத்தியில் பேசிய தோனி நகைச்சுவையாகக் கூறுகையில், "நான் சில மருத்துவப் பரிசோதனைகளை மேற்கொள்ள வேண்டியுள்ளது.
மருத்துவர்கள் எனக்கு அந்த அறிக்கைகளை வழங்கிய பிறகு, டிசம்பர் மாதத்திற்குள் எனது உடல் நிலை அடுத்த ஒரு சீசனுக்கு விளையாடும் அளவுக்கு வலிமையாக உள்ளதா என்பதைப் பார்த்து முடிவெடுப்பேன்.
ஒருவேளை உடல் தகுதி போதுமானதாக இல்லாவிட்டால், பழைய வின்டேஜ் வாகனம் போன்ற எனது உடல் சீராக ஓடுவதற்குத் தேவையான அனைத்து சிகிச்சைகளையும் நீங்கள் தான் சரியாகச் செய்ய வேண்டும்.
எனவே அந்தப் பொறுப்பும் அழுத்தமும் மருத்துவர்களான உங்கள் மீது தான் உள்ளது" என்று குறிப்பிட்டார்.
தலைமை மாற்றம்
காசி விஸ்வநாதன் நம்பிக்கை
தோனி மீண்டும் விளையாடுவது குறித்து ஏற்கனவே பேசிய சென்னை சூப்பர் கிங்ஸ் அணியின் தலைமை நிர்வாக அதிகாரி காசி விஸ்வநாதன், சென்னைக்கு வந்த பிறகு தோனி தனது முடிவை அதிகாரப்பூர்வமாகத் தெரிவிப்பார் என்றும், அவர் மீண்டும் விளையாடுவதற்கான வாய்ப்புகள் அதிகம் இருப்பதாகத் தான் கருதுவதாகவும் நம்பிக்கை தெரிவித்திருந்தார்.
இதற்கிடையே, கடந்த சில சீசன்களாகச் சவால்களைச் சந்தித்த சிஎஸ்கே அணி நிர்வாகம், நீண்டகாலப் பயிற்சியாளராக இருந்த ஸ்டீபன் பிளெமிங்குடன் தனது பிணைப்பை முடித்துக் கொண்டு, புதிய தலைமைப் பயிற்சியாளராக முன்னாள் வேகப்பந்து வீச்சாளர் ஜாகீர் கானை நியமித்து அணியை மாற்றியமைக்கும் பணிகளைத் தொடங்கியுள்ளது குறிப்பிடத்தக்கது.