149 ஆண்டு வரலாற்றை மாற்றிய ஆஸ்திரேலியா: தென்னாப்பிரிக்காவுக்கு எதிராக விசித்திர சாதனை
செய்தி முன்னோட்டம்
தென்னாப்பிரிக்காவில் சுற்றுப்பயணம் செய்து விளையாடி வரும் ஆஸ்திரேலிய கிரிக்கெட் அணி, டர்பனில் தொடங்கிய முதல் டெஸ்ட் போட்டியில் 149 ஆண்டுகால சர்வதேச டெஸ்ட் கிரிக்கெட் வரலாற்றிலேயே முன்னெப்போதும் இல்லாத வகையில் ஒரு விசித்திரமான சாதனையைப் படைத்துள்ளது. களமிறங்கிய ஆஸ்திரேலிய அணியின் ஆடும் லெவனில் 30 வயதுக்குக் கீழ் ஒரு வீரர் கூட இடம்பெறவில்லை. 11 வீரர்களுமே 30 வயதைக் கடந்த மூத்த வீரர்களாகக் களம் கண்டனர். 1877-ஆம் ஆண்டு முதல் டெஸ்ட் போட்டி தொடங்கியதிலிருந்து, 20-களில் இருக்கும் ஒரு வீரர் கூட இல்லாமல் ஆஸ்திரேலிய அணி களமிறங்கியிருப்பது இதுவே முதல் முறையாகும்.
சாம் கோன்ஸ்டாஸ்
முடங்கிப்போன இளம் தலைமுறை தேடல்
ஆஸ்திரேலியாவின் டெஸ்ட் பேட்டிங் வரிசையில் அனுபவம் இருந்தாலும், அடுத்த தலைமுறை இளம் பேட்டர்களைக் கொண்டுவருவதில் அணி நிர்வாகம் கடுமையான சவால்களைச் சந்தித்து வருகிறது.
கடந்த 2024-ல் அறிமுகமான 25 வயதான நாதன் மெக்ஸ்வீனி மற்றும் 19 வயதான சாம் கோன்ஸ்டாஸ் ஆகியோருக்குத் தொடக்க வீரர்களாக வாய்ப்பளிக்கப்பட்டு, அவர்களால் அணியில் தங்களது இடத்தை நிலைநிறுத்திக் கொள்ள முடியவில்லை.
இதன் விளைவாக, நீண்ட இடைவெளிக்குப் பிறகு மூத்த வீரரான நிக் மேடின்சனை (Nic Maddinson) மீண்டும் அணிக்குள் கொண்டுவர நிர்வாகம் முடிவு செய்தது.
2016-க்குப் பிறகு டெஸ்ட் போட்டியில் விளையாடாத மேடின்சன், முதல்தர கிரிக்கெட்டிலிருந்து 579 நாட்கள் விலகியிருந்த பிறகு ஆஸ்திரேலிய அணிக்காகக் களம் கண்டார்.
ஏமாற்றிய மேடின்சன்
சரிந்த ஆஸ்திரேலிய பேட்டிங் வரிசை
ஆஸ்திரேலிய அணியில் மீண்டும் இடம்பிடித்த மேடின்சன், மார்கோ யான்சன் பந்துவீச்சில் 33 பந்துகளை எதிர்கொண்டு ரன் ஏதுமின்றி டக்-அவுட்டாகி அதிர்ச்சியளித்தார்.
இதன்மூலம் ஆஸ்திரேலிய டெஸ்ட் கிரிக்கெட் வரலாற்றில் ரன் எதுவும் எடுக்காமல் அதிக பந்துகளை எதிர்கொண்ட தொடக்க வீரர் என்ற தேவையற்ற சாதனையை அவர் படைத்தார்.
அவரைத் தொடர்ந்து டிராவிஸ் ஹெட் 9 ரன்களிலும், ஸ்டீவ் ஸ்மித் 25 ரன்களிலும் ஆட்டமிழந்தனர். நிதானமாக ஆடிய மார்னஸ் லபுஷேன் 37 ரன்களில் வெளியேறினார்.
தொடர்ந்து போ வெப்ஸ்டர், அலெக்ஸ் கேரி ஆகியோரும் அடுத்தடுத்து விக்கெட்டுகளைப் பறிகொடுத்ததால், ஆஸ்திரேலியா 124 ரன்களுக்கு 6 விக்கெட்டுகளை இழந்து கடும் சரிவைச் சந்தித்தது.
அனுபவ வீரர்களை மட்டுமே நம்பியிருக்கும் ஆஸ்திரேலிய அணிக்கு இச்சரிவு பலத்த எச்சரிக்கையாக அமைந்தது.