ஐபோன் 18 புரோவில் 2nm சிப்செட் மற்றும் புதிய கேமரா! செப்டம்பரில் அறிமுகமாகும் ஆப்பிளின் புதிய மாடல்; முழு விபரம்

எழுதியவர் Sekar Chinnappan

Aug 09, 2026

05:11 pm

செய்தி முன்னோட்டம்

தொழில்நுட்ப உலகில் பெரும் ஆவலை ஏற்படுத்தியுள்ள ஆப்பிள் நிறுவனத்தின் ஐபோன் 18 புரோ சீரீஸ், வரும் செப்டம்பர் 7 முதல் 9க்குள் அறிமுகமாகும் என எதிர்பார்க்கப்படுகிறது. இம்முறை சாதாரண ஐபோன் 18 மற்றும் ஏர் மாடல்களின் வெளியீடு 2027க்கு ஒத்திவைக்கப்பட்டுள்ளதால், ஆப்பிள் நிறுவனம் தனது புரோ மற்றும் புரோ மேக்ஸ் மாடல்களில் மட்டும் முழுக் கவனத்தையும் செலுத்தி அதிநவீன மாற்றங்களை அறிமுகப்படுத்தத் திட்டமிட்டுள்ளது. கூடுதல் விபரங்கள் இங்கே:-

கேமரா

2nm A20 புரோ சிப்செட் மற்றும் மேம்பட்ட கேமரா

இந்த புதிய ஐபோன் 18 புரோ தொடரில் டிஎஸ்எம்சி நிறுவனத்தின் 2nm தொழில்நுட்பத்தில் உருவான A20 புரோ சிப்செட் முதன்முறையாக பயன்படுத்தப்படவுள்ளது.

இது அதிவேக செயல்பாட்டையும், சிறந்த மின்திறனையும் வழங்கும்.

மேலும், 48 எம்பி பிரதான கேமராவில் வேரியபிள் அப்பர்ச்சர் வசதி சேர்க்கப்பட்டு, வெளிச்சத்திற்கு ஏற்பப் புகைப்படங்களின் தரத்தை மேம்படுத்தும் புதிய தொழில்நுட்பமும் டெலிபோட்டோ கேமரா மாற்றங்களும் அறிமுகமாகவுள்ளன.

பேட்டரி

பெரிய பேட்டரி மற்றும் சிறிய டைனமிக் ஐலேண்ட்

ஃபேஸ் ஐடி சாதனங்கள் திரைக்குக் கீழே கொண்டு செல்லப்படுவதால், திரையில் உள்ள டைனமிக் ஐலேண்ட் அளவு கணிசமாகக் குறைக்கப்படும்.

அத்துடன், 5,567mAh வரையிலான பெரிய அளவிலான பேட்டரி, ஆற்றல் திறன் வாய்ந்த LTPO+ திரை, செயற்கைக்கோள் 5ஜி இணைப்பு தரும் C2 மோடம் மற்றும் N2 வயர்லெஸ் சிப் ஆகியவை வழங்கப்படவுள்ளன.

டார்க் செர்ரி மற்றும் லைட் புளூ போன்ற புதிய நிறங்களிலும் இந்த போன் வரவுள்ளது.

விலை

இந்தியாவில் எதிர்பார்க்கப்படும் விற்பனை விலை

புதிய தொழில்நுட்பங்கள் சேர்க்கப்பட்டுள்ளதால், நடப்பாண்டு ஐபோன்களின் விலை முந்தைய மாடல்களை விட ரூ.20,000 வரை உயரக் கூடும் எனக் கூறப்படுகிறது.

இதன்படி இந்தியாவில் ஐபோன் 18 புரோவின் ஆரம்ப விலை சுமார் ரூ. 1,54,900 வரை இருக்கும் என மதிப்பிடப்பட்டுள்ளது.

அமெரிக்க சந்தையிலும் $200 முதல் $300 வரை விலை அதிகரிக்க வாய்ப்புள்ளதாகத் தகவல்கள் வெளியாகியுள்ளன.