பப்ளிஷர்களை மிரட்டுகிறதா கூகுள்? ஏஐ பயிற்சிக்குத் தரவுகளைத் தராவிட்டால் பணத்தை நிறுத்த முடிவு என தகவல்
செய்தி முன்னோட்டம்
உலகளாவிய செய்தி நிறுவனங்களுக்கும், கூகுள் போன்ற பெரிய தொழில்நுட்ப நிறுவனங்களுக்கும் இடையே உள்ள கன்டென்ட் பயன்பாட்டுப் பிரச்சனை தற்பொழுது மீண்டும் வெடித்துள்ளது. கூகுள் நிறுவனம் தனது ஜெமினி ஏஐ மாடல்களுக்குப் பயிற்சி அளிப்பதற்காக, தங்களுடன் இணைந்துள்ள செய்தி நிறுவனங்களின் கட்டுரைகளைப் பயன்படுத்த அனுமதி கேட்கத் தொடங்கியுள்ளதாகத் தகவல்கள் வெளியாகியுள்ளன. இதற்கு சம்மதிக்காத செய்தி நிறுவனங்களுக்கு தற்பொழுது கூகுள் ஷோகேஸ் திட்டம் மூலம் வழங்கப்பட்டு வரும் ஆண்டு நிதியுதவிகள் வருங்காலத்தில் நிறுத்தப்படலாம் என்று 'தி இன்ஃபர்மேஷன்' ஊடகம் வெளியிட்டுள்ள அறிக்கை தெரிவிக்கிறது.
புதிய ஏஐ நிபந்தனைகள்
செய்தி நிறுவனங்களுக்குக் கூகுள் விதித்துள்ள புதிய ஏஐ நிபந்தனைகள்
கூகுள் நிறுவனம் கடந்த டிசம்பர் மாதத்தில் தி வாஷிங்டன் போஸ்ட், தி கார்டியன் போன்ற முன்னணி ஊடகங்களுடன் இணைந்து புதிய 'நியூஸ் ஏஐ பைலட்' திட்டத்தை அறிமுகப்படுத்தியது. இதன் மூலம் கூகுள் நியூஸ் மற்றும் ஜெமினியின் ஏஐ செய்திச் சுருக்கங்களில் அந்த ஊடகங்களின் செய்திகள் முன்னிலைப்படுத்தப்படும் என்று கூறப்பட்டது. ஆனால், இந்தத் திட்டத்தில் இணையும் செய்தி நிறுவனங்கள், தங்களது அசல் உள்ளடக்கங்களை கூகுள் தனது ஏஐ மாடல்களுக்குப் பயிற்சி அளிக்கப் பயன்படுத்துவதற்கான பரந்த உரிமைகளையும் வழங்க வேண்டும் என்ற நிபந்தனை தற்பொழுது மறைமுகமாக முன்வைக்கப்பட்டுள்ளது.
ஷோகேஸ் திட்டம்
ஷோகேஸ் திட்டமும் மற்றும் நிறுத்தப்படும் நிதியுதவி அச்சமும்
கடந்த சில ஆண்டுகளாகவே செய்தி நிறுவனங்களின் தேர்ந்தெடுக்கப்பட்ட செய்திக் கட்டுரைகளைக் கூகுள் தளங்களில் காட்டுவதற்காக 'கூகுள் ஷோகேஸ்' திட்டத்தின் கீழ் ஊடகங்களுக்கு ஆண்டுதோறும் கூகுள் நிறுவனம் பணம் செலுத்தி வருகிறது. தற்போதைய புதிய திட்டத்தின்படி, இந்த ஷோகேஸ் திட்டத்தில் இருக்கும் நிறுவனங்கள் புதிய ஏஐ பைலட் திட்டத்திலும் இணைந்தால் அவர்களுக்குத் தொடர்ந்து அதே பணம் வழங்கப்படும். ஒருவேளை ஏஐ பயிற்சிக்குத் தரவுகளை வழங்க மறுக்கும் நிறுவனங்களுக்கு தற்போதைக்கு ஷோகேஸ் பணம் கிடைத்தாலும், வருங்காலத்தில் அந்தத் திட்டத்தைக் கூகுள் முழுமையாக முடக்கும்போது அவர்கள் அந்த நிதியுதவியை இழக்க நேரிடும்.
கூகுள் விளக்கம்
செய்தி நிறுவனங்களின் சட்டப்பூர்வப் போராட்டமும் கூகுள் தரப்பு விளக்கமும்
இந்த விவகாரம் குறித்துக் கூகுள் தரப்பு செய்தித் தொடர்பாளர் கூறுகையில், மக்களின் செய்தி விருப்பங்கள் மாறிவருவதால், ஏஐ தொழில்நுட்பம் மூலம் வாசகர்களை எவ்வாறு ஈர்ப்பது என்பதை ஆராயவே பல்வேறு பப்ளிஷர்களுடன் இணைந்து இந்த நியூஸ் ஏஐ பைலட் திட்டத்தை விரிவுபடுத்தி வருவதாகத் தெரிவித்துள்ளார். தங்களது அசல் மற்றும் காப்புரிமை பெற்ற உள்ளடக்கங்களை ஏஐ நிறுவனங்கள் தங்களது லாபத்திற்காக பயன்படுத்துவதற்கு எதிராக ஏற்கனவே உலக அளவில் பல்வேறு ஊடகங்கள் கூகுள் உள்ளிட்ட முன்னணி டெக் நிறுவனங்கள் மீது சட்டப்பூர்வமான வழக்குகளைத் தொடர்ந்து போராடி வருகின்றன.