உலகளவில் முடங்கியது Canva தளம்! மீடியா ஃபைல் அப்லோட் செய்ய முடியாமல் கன்டென்ட் கிரியேட்டர்கள் கடும் அவதி
செய்தி முன்னோட்டம்
யூடியூப், இன்ஸ்டாகிராம் போன்ற சமூக ஊடகங்களுக்குத் தேவையான, கன்டென்ட் கிரியேட்டர்கள், கிராபிக் டிசைனர்கள் மற்றும் டிஜிட்டல் விளம்பரதாரர்களின் முதன்மைத் தேர்வாக இருக்கும் டிசைனிங் தளமான கேன்வா (Canva), இன்று (ஜூலை 2) திடீரென உலகளவில் கடுமையான தொழில்நுட்பக் கோளாறை சந்தித்துள்ளது. இன்று மதியம் முதல் கேன்வா இணையதளம் மற்றும் மொபைல் ஆப் ஆகிய இரண்டுமே சரியாக வேலை செய்யாமல் முடங்கியதால், உலகம் முழுவதிலும் உள்ள லட்சக்கணக்கான டிஜிட்டல் கிரியேட்டர்கள் தங்களது தினசரி வேலைகளை செய்ய முடியாமல் கடுமையான மன உளைச்சலுக்கு ஆளாகியுள்ளனர்.
அப்லோட் செய்ய முடியவில்லை
அப்லோட் செய்ய முடியாமல் முடங்கிய கோர் அம்சம்
இன்று ஏற்பட்ட இந்த சர்வர் முடக்கத்தில் கேன்வாவின் மிக முக்கியமான அம்சமான 'மீடியா அப்லோட்' (Media Upload) தான் மிகக் கடுமையாகப் பாதிக்கப்பட்டுள்ளது. பயனர்கள் தங்களின் புதிய டிசைன்களுக்குத் தேவையான புகைப்படங்கள், வீடியோக்கள் அல்லது பிற கிராபிக்ஸ் ஃபைல்களைத் தங்களின் மொபைல் அல்லது கணினியில் இருந்து கேன்வாவுக்குள் அப்லோட் செய்ய முயலும் போது, அது தொடர்ந்து தோல்வியடைந்து 'Error' என்ற செய்தியைக் காட்டியுள்ளது. அதே சமயம், ஏற்கனவே சேமிக்கப்பட்ட சில பழைய மாடல்களை ஓபன் செய்யும் போதும் ஸ்கிரீன் அப்படியே ஃப்ரீஸ் ஆகி நிற்பதாகப் பயனர்கள் குற்றம் சாட்டியுள்ளனர்.
புகார்கள்
டவுன்டெக்ட்டரில் எகிறிய புகார்களின் எண்ணிக்கை
கேன்வா தளம் முடங்கிய அடுத்த சில நிமிடங்களிலேயே, சர்வதேச அவுட்டேஜ் டிராக்கிங் தளமான டவுன்டெக்ட்டரில் (Downdetector) ஆயிரக்கணக்கான புகார்கள் குவியத் தொடங்கின. இதில் பெரும்பாலான பயனர்கள் இமேஜ் அப்லோட் செய்வதில் தான் சிக்கலைச் சந்தித்ததாகப் பதிவு செய்துள்ளனர். பலர் தங்களது அவசர வேலைகள் பாதிக்கப்பட்டுள்ளதாக எக்ஸ் உள்ளிட்ட சமூக வலைத்தளங்களில் கேன்வா நிறுவனத்தைக் டேக் செய்து தங்களது குமுறல்களையும், மீம்ஸ்களையும் அள்ளி வீசத் தொடங்கினர்.
ஒப்புதல்
அதிகாரப்பூர்வமாகப் ஒப்புக்கொண்ட கேன்வா நிறுவனம்
இந்தத் திடீர் சர்வர் கோளாறு குறித்து கேன்வா நிறுவனம் தனது அதிகாரப்பூர்வ ஸ்டேட்டஸ் பக்கத்தில் விளக்கமளித்துள்ளது. தங்களது தளத்தில் மீடியா அப்லோட் செய்வதில் பயனர்களுக்கு சிக்கல் இருப்பதை ஒப்புக்கொண்ட நிறுவனம், "பயனர்கள் தங்களின் கேன்வா டிசைன்களில் மீடியாக்களைப் பதிவேற்றுவதில் பிழைகளை சந்திக்க நேரிடலாம், இதைத் தீர்க்க எங்கள் பொறியியல் குழுவினர் தீவிரமாகப் பணியாற்றி வருகின்றனர்" என்று குறிப்பிட்டிருந்தனர்.
தீர்வு
தற்போதைய நிலவரம் மற்றும் தற்காலிகத் தீர்வுகள்
தற்பொழுது கேன்வா நிறுவனத்தின் பொறியாளர்கள் இந்த சிக்கலைக் கண்டறிந்து அதற்கான 'ஃபிக்ஸ்' (Fix) முறையைச் செயல்படுத்தியுள்ளதால், உலகளவில் பெரும்பாலான பகுதிகளில் இந்த சேவை தற்பொழுது படிப்படியாக வழக்கம் போல செயல்படத் தொடங்கியுள்ளது. இருப்பினும் ஆஸ்திரேலியா மற்றும் நியூசிலாந்து போன்ற சில குறிப்பிட்ட பிராந்தியங்களில் மட்டும் தளம் சற்று மெதுவாக இயங்கி வருகிறது. கேன்வா முழுமையாக சீரடையும் வரை அவசரத் தேவைகளுக்குப் போட்டோபியா அல்லது மைக்ரோசாஃப்ட் டிசைனர் போன்ற மாற்றுத் தளங்களைப் பயன்படுத்திக் கொள்ளலாம் என்று தொழில்நுட்ப நிபுணர்கள் பரிந்துரைத்துள்ளனர்.