உற்பத்தித்திறனை அதிகரிக்க, உங்கள் ஒர்க் டெஸ்க்கில் இருந்தே செய்யக்கூடிய 5 டிப்ஸ்
செய்தி முன்னோட்டம்
மேசையில் அமர்ந்து பணிபுரியும் நேரத்தில், உங்கள் நேரத்தை பயனுள்ளதாக மாற்றிக்கொள்வதுதான் மேசைப் பணி உற்பத்தித்திறன். சில குறிப்பிட்ட பழக்கங்களைக் கடைப்பிடிப்பதன் மூலம், உங்கள் திறனை மேம்படுத்தி, ஒரு நாளில் அதிக வேலைகளை முடிக்க முடியும். இந்த பழக்கங்களை உங்கள் தினசரி வழக்கத்தில் எளிதாகச் சேர்த்துக்கொள்ளலாம், இவை உங்கள் வேலை செய்யும் விதத்தில் பெரிய மாற்றத்தை ஏற்படுத்தும். உங்களுக்கு அழுத்தம் கொடுக்காமல், உற்பத்தித்திறனை மேம்படுத்தும் ஐந்து மேசைப் பணிப் பழக்கங்கள் இங்கே கொடுக்கப்பட்டுள்ளன.
குறிப்பு 1
பணியிடத்தை ஒழுங்கமைத்தல்
உங்கள் பணியிடத்தை ஒழுங்காக வைத்திருப்பது, கவனமாக இருப்பதற்கும், சிறப்பாக வேலை செய்வதற்கும் மிக முக்கியம். குழப்பமில்லாத மேசை, கவனச்சிதறல்களைக் குறைக்கும்; உங்களுக்குத் தேவையான பொருட்களை விரைவாக கண்டறிய உதவும். ஒவ்வொரு நாளின் இறுதியிலும், ஐந்து நிமிடங்கள் ஒதுக்கி உங்கள் பணியிடத்தைச் சுத்தம் செய்யுங்கள். தேவையில்லாத பொருட்களை எடுத்துவைத்து, அத்தியாவசிய பொருட்களை கைக்கு எட்டும் தூரத்தில் அடுக்கிக்கொள்ளுங்கள். இந்த எளிய பழக்கம், மனக் குழப்பத்தை நீக்கி, அடுத்த நாளுக்கான வேலைக்கு ஒரு நேர்மறையான தொடக்கத்தை அமைக்கும்.
குறிப்பு 2
ஒரு நாளுக்கான தெளிவான இலக்குகளை நிர்ணயித்தல்
ஒவ்வொரு நாளின் தொடக்கத்திலும் தெளிவான இலக்குகளை நிர்ணயிப்பது, உங்கள் வேலைக்கு ஒரு திசையையும் நோக்கத்தையும் கொடுக்கும். ஒவ்வொரு காலையிலும், அன்றைய நாளின் முடிவில் நீங்கள் எதைச் சாதிக்க விரும்புகிறீர்கள் என்பதைத் திட்டமிடுவதற்கு சிறிது நேரம் செலவிடுங்கள். முக்கியத்துவம் மற்றும் அவசரத்தைப் பொறுத்து உங்கள் வேலைகளுக்கு முன்னுரிமை அளியுங்கள். இது, எது உண்மையிலேயே முக்கியமோ அதில் கவனம் செலுத்த உதவும். தெளிவான செயல் திட்டம் வைத்திருப்பது, உங்களை ஊக்கப்படுத்தும்; உங்கள் இலக்குகளை நோக்கி சீரான முன்னேற்றம் அடைவதை உறுதி செய்யும்.
குறிப்பு 3
சீரான இடைவெளியில் ஓய்வெடுத்தல்
நாள் முழுவதும் ஆற்றல் மட்டத்தையும், கவனத்தையும் பராமரிக்க, சீரான இடைவெளியில் ஓய்வு எடுப்பது அவசியம். Pomodoro டெக்னிக் என்பது ஒரு பிரபலமான முறை. இதில் 25 நிமிடங்கள் வேலை செய்துவிட்டு, ஐந்து நிமிடங்கள் ஓய்வு எடுக்கலாம். இந்த வழியில், நீங்கள் உங்கள் வேகத்தை இழக்காமல் புத்துணர்ச்சி பெற முடியும். ஓய்வு நேரத்தை புத்திசாலித்தனமாகப் பயன்படுத்துங்கள். உடலை நீட்டுதல் (ஸ்ட்ரெச்சிங்) அல்லது சிறு நடைபயணம் மேற்கொள்வதன் மூலம் ரத்த ஓட்டத்தை மேம்படுத்தி, மன அழுத்தத்தைக் குறைக்கலாம்.
குறிப்பு 4
டிஜிட்டல் கவனச்சிதறல்களைக் கட்டுப்படுத்துதல்
டிஜிட்டல் கவனச்சிதறல்கள் எல்லா இடங்களிலும் உள்ளன. ஆனால், உற்பத்தித்திறனுடன் இருக்க அவற்றைக் கட்டுப்படுத்துவது அவசியம். வேலை நேரங்களில் உங்கள் சாதனங்களில் இருந்து வரும் அத்தியாவசியமற்ற நோட்டிபிகேஷன்களை அணைத்துவிடுங்கள். இது இடையூறுகளைக் குறைக்கும். நாள் முழுவதும் உங்கள் வேலை ஓட்டத்தைத் தொந்தரவு செய்யாமல் இருக்க, இமெயில் அல்லது சோஷியல் மீடியாவை சரிபார்க்க குறிப்பிட்ட நேரங்களை ஒதுக்குங்கள்.
குறிப்பு 5
மைண்ட்புல்னெஸ் பயிற்சிகளைக் கடைப்பிடித்தல்
ஆழமான சுவாசம் அல்லது தியானம் போன்ற மைண்ட்புல்னெஸ் டெக்னிக்குகள், ஒரு பிஸியான நாளில் மனதை அமைதிப்படுத்தி, கவனத்தை மேம்படுத்த உதவும். வேலையில் உங்களுக்கு அதிக அழுத்தம் ஏற்பட்டாலோ அல்லது கவனம் சிதறினாலோ, இந்த பயிற்சிகளை இரண்டு நிமிடங்கள் மட்டும் செய்யுங்கள். இதன் மூலம், நீங்கள் புதுப்பிக்கப்பட்ட தெளிவுடனும், கவனத்துடனும் உங்கள் வேலைகளுக்குத் திரும்ப முடியும்.