ஈரோடு கிழக்கு இடைத்தேர்தல் தொகுதியில் இறுதிக்கட்ட பிரச்சாரம் நிறைவு
செய்தி முன்னோட்டம்
ஈரோடு கிழக்கு சட்டமன்ற தொகுதியில் நாளை மறுநாள் தேர்தல் நடைபெறவுள்ள நிலையில் அரசியல் தலைவர்கள் தங்கள் வேட்பாளருக்கு வாக்குகள் சேகரிப்பதில் மிக தீவிரமாக ஈடுபட்டு இறுதிக்கட்ட பிரச்சாரங்களை மேற்கொண்டனர்.
இன்று(பிப்.,25) மாலை 6 மணிக்கு முடிவடைந்த கடைசிகட்ட பிரச்சாரத்தில் அதிமுக மற்றும் திமுக வேட்பாளர்களை ஆதரித்து மு.க.ஸ்டாலினும், எடப்பாடி பழனிசாமியும் பிரச்சாரம் மேற்கொண்டார்கள்.
பிரச்சாரம் நிறைவடைந்த நிலையில் மாலை 6 மணி முதல் வாக்குப்பதிவு முடிவடையும் வரையில் 1951ம் ஆண்டு மக்கள் பிரதிநிதித்துவ சட்டப்பிரிவு 126ன் கீழ் பல்வேறு கட்டுப்பாடுகள் அமலுக்கு வந்துள்ளன என்று தகவல்கள் தெரிவிக்கிறது.
தேர்தல் கட்டுப்பாடுகள்
தேர்தல் தொடர்பான பொதுக்கூட்டமோ, ஊர்வலமோ நடத்த கூடாது
மேலும் தேர்தல் தொடர்பான பொதுக்கூட்டமோ, ஊர்வலமோ யாரும் ஒருங்கிணைக்கவோ நடத்தவோ கூடாது என்றும், பங்கேற்க கூடாது என்றும்,
தேர்தல் தொடர்பாக எந்தவொரு கருத்தையும் தொலைக்காட்சி, ரேடியோ அல்லது இணையம் வழியாக கூறக்கூடாது என்றும் தெரிவிக்கப்பட்டுள்ளது.
மக்கள் பார்வைக்கு வைக்கவும் கூடாது.
அதோடு வேட்பாளர்களுக்கு வழங்கப்பட்ட நட்சத்திர பேச்சாளர்கள் உட்பட வாகன அனுமதிகள் இன்று மாலை 6 மணிமுதல் செயல் திறனற்றதாகிவிட்டது என்றும் அறிவிக்கப்பட்டுள்ளது.
முன்னதாக இன்று மாலை 5 மணிக்கு இறுதிக்கட்ட பிரச்சாரம் முடிவடையும் என்று கூறப்பட்ட நிலையில் மேலும் ஒரு மணி நேரம் கூடுதலாக அளிக்கப்பட்டு மாலை 6 மணிக்கு தேர்தல் பிரச்சாரம் ஓய்ந்தது என்பது குறிப்பிடத்தக்கது.