இந்தியாவில் பெட்ரோல், டீசல் விற்பனைக் கட்டுப்பாடுகள் ஜூலை 1 முதல் நீக்கம்! மத்திய அரசு அறிவிப்பு
செய்தி முன்னோட்டம்
உலகளாவிய எரிபொருள் பற்றாக்குறை அச்சம் காரணமாக இந்தியாவில் தற்காலிகமாக விதிக்கப்பட்டிருந்த பெட்ரோல் மற்றும் டீசல் விற்பனை மீதான கட்டுப்பாடுகள் அனைத்தும் வரும் ஜூலை 1 முதல் முழுமையாக நீக்கப்படவுள்ளன. முன்னதாக, ஈரான் மீதான அமெரிக்க-இஸ்ரேல் போர் மற்றும் ஹார்முஸ் ஜலசந்தி மூடப்பட்டதால் ஏற்பட்ட சர்வதேச கச்சா எண்ணெய் விநியோகத் தடைகளைத் தொடர்ந்து, உள்நாட்டு எரிபொருள் தேவையைப் பாதுகாப்பதற்காக இந்த மாத தொடக்கத்தில் மத்திய அரசால் இந்த அவசரகால நடவடிக்கைகள் கொண்டு வரப்பட்டன.
கட்டுப்பாடுகள் முடிவு
வணிக நுகர்வோருக்கான கட்டுப்பாடுகள் முடிவு
எரிபொருள் பற்றாக்குறை ஏற்படுவதைத் தடுப்பதற்கான ஒரு முன்னெச்சரிக்கை நடவடிக்கையாக, வணிக நுகர்வோர்கள் சில்லறை எரிபொருள் நிலையங்களில் பெட்ரோல் மற்றும் டீசல் வாங்குவதற்கு மத்திய அரசு தடை விதித்திருந்தது. மேலும், பொதுமக்களுக்குத் தட்டுப்பாடின்றி டீசல் கிடைப்பதை உறுதி செய்வதற்காக, தினசரி டீசல் வாங்குவதற்கும் ஒரு குறிப்பிட்ட வரம்பு நிர்ணயிக்கப்பட்டிருந்தது. சர்வதேச அளவில் கச்சா எண்ணெய் விநியோகம் தற்பொழுது சீராகியுள்ளதால் இந்த இரண்டு கட்டுப்பாடுகளும் ஜூலை 1 முதல் முழுமையாக ரத்து செய்யப்படுகின்றன.
எரிவாயு சிலிண்டர்
வணிக எல்பிஜி சிலிண்டர் விநியோகம் சீரமைப்பு
முன்னதாக, வீட்டு உபயோக சமையல் எரிவாயு விநியோகத்திற்கு முன்னுரிமை அளிப்பதற்காக, வணிகப் பயன்பாட்டு எல்பிஜி சிலிண்டர்களுக்கான ஒதுக்கீட்டை மத்திய அரசு கடந்த மார்ச் மாதத்தில் குறைத்திருந்தது. இதனால் ஹோட்டல்கள், உணவகங்கள் மற்றும் தொழிற்சாலைகள் பெரும் பாதிப்பை சந்தித்தன. தற்பொழுது நிலைமை கட்டுக்குள் வந்துள்ளதால், எண்ணெய் நிறுவனங்கள் வணிக நுகர்வோருக்கு 100 சதவீத சிலிண்டர் விநியோகத்தை மீண்டும் தொடங்க வேண்டும் என்று மத்திய அரசு தற்பொழுது உத்தரவிட்டுள்ளது.
பிஎன்ஜி எரிவாயு
பிஎன்ஜி எரிவாயுவிற்கு மாறும் புதிய விதிமுறை
எரிபொருள் விநியோகம் பழைய நிலைக்குத் திரும்பினாலும், ஏற்கனவே குழாய் வழி இயற்கை எரிவாயுவிற்கு மாறிய வணிக மற்றும் தொழில்முறை நுகர்வோர்கள் மீண்டும் பழைய எல்பிஜி சிலிண்டர் பயன்பாட்டிற்கு மாற அனுமதிக்கப்பட மாட்டார்கள் என்று அரசு தெளிவுபடுத்தியுள்ளது. இந்தியாவில் சுற்றுச்சூழல் மாசுபாட்டைக் குறைக்கவும், தூய்மையான ஆற்றலை ஊக்குவிக்கவும் பிஎன்ஜி எரிவாயு பயன்பாட்டைத் தொடர்ந்து தீவிரப்படுத்தவே அரசு இந்த முக்கிய முடிவை எடுத்துள்ளது.