ஈரோடு கிழக்கு தொகுதி இடைத்தேர்தலில் திடீர் திருப்பம்-வேட்பாளரை வாபஸ் பெற்ற ஓ.பி.எஸ்.
ஈரோடு கிழக்கு தொகுதி இடைத்தேர்தல் வரும் 27ம்தேதி நடைபெறவுள்ள நிலையில், ஓ.பி.எஸ். அணி மற்றும் ஈ.பி.எஸ். அணி என இருவரும் இரு அணிகளாக பிரிந்து தனித்தனி வேட்பாளர்களை அறிவித்தனர். எனவே, அதிமுக'வின் இரட்டை இலை சின்னம் முடக்கப்பட அதிக வாய்ப்புகள் உள்ளதாக பேச்சுக்கள் வலம் வந்தநிலையில், இதுகுறித்து ஈ.பி.எஸ். தரப்பில் அளிக்கப்பட்ட இடையீட்டு மனுகுறித்த விசாரணை உச்சநீதிமன்றத்தில் நடந்தது. இதனையடுத்து, இந்த விவகாரத்திற்கு உச்சநீதிமன்றம் இடைக்கால தீர்ப்பு ஒன்றினை அளித்தது. அதன்படி, ஈரோடு கிழக்கு இடைத்தேர்தலுக்கான ஓ.பி.எஸ். தரப்பினரையும் உள்ளடக்கிய பொதுக்குழு நடத்தப்பட்டு, வாக்கு அடிப்படையில் அதிமுக வேட்பாளரை தேர்ந்தெடுக்கலாம். அவ்வாறு தேர்தெடுக்கப்படும் வேட்பாளர் தேர்தல் ஆணையத்திற்கு தமிழ்மகன் உசேன் அனுப்ப வேண்டும் என்று உத்தரவிடப்பட்டது. இதற்கு அனைத்து தரப்பினரும் ஒப்புக்கொண்டனர்.
திடீர் திருப்பமாக வேட்பாளர் செந்தில் முருகனை வாபஸ் பெற்ற ஓ.பி.எஸ். அணி
இதனைதொடர்ந்து, தென்னரசுவை வேட்பாளாராக ஏற்பது தொடர்பாக பதிலளிக்க ஓ.பி.எஸ். தரப்பு உள்ளிட்ட அனைத்து பொதுக்குழு உறுப்பினர்களுக்கும் அதிமுக அவை தலைவர் தமிழ் மகன் உசேன் கடிதம் அனுப்பியதாக கூறப்படுகிறது. இது ஒருதலைப்பட்சமானது என்று ஓ.பி.எஸ்.கண்டனம் தெரிவித்துள்ளார். இருப்பினும், பொதுக்குழு உறுப்பினர்களின் கடிதத்தை தேர்தல் ஆணையத்தில் சமர்ப்பிக்க தமிழ் மகன் உசேன் டெல்லி சென்றுள்ளார். இந்நிலையில் தற்போது திடீர் திருப்பமாக ஓ.பி.எஸ்.அணியின் மூத்த தலைவர்களான கு.ப.கிருஷ்ணன், வைத்திலிங்கம் ஆகியோர் இந்த இடைத்தேர்தலில் இரட்டைஇலை சின்னம் வெற்றி பெறுவதற்காக வேட்பாளர் செந்தில்முருகனை வாபஸ் பெறுவதாக செய்தியாளர்களிடம் தெரிவித்துள்ளார்கள். மேலும், இரட்டைஇலை சின்னம் எந்தவகையிலும் முடங்கி விடக்கூடாது என்பதே தங்கள் நோக்கம் என்றும் தெரிவித்தனர். இதனால், அதிமுக சார்பில் தென்னரசு இந்த இடைத்தேர்தலில் போட்டியிடுவது உறுதியாகியுள்ளது குறிப்பிடத்தக்கது.
